އޮސްޓްރޭލިއާގައި ޣައިރު ޤާނޫނީ ގޮތުގައި ކުރަފި ބްރީޑް ކުރަމުން ދިޔަ މީހެއްގެ އަތުން 100,000 އަށް ވުރެ ގިނަ ދިރޭ ކުރަފި އަތުލައިގެންފިއެވެ.

މިއީ އެ ޤައުމުގެ ތާރީޚުގައި މިފަދަ އެންމެ ބޮޑު އޮޕަރޭޝަނެވެ.

Advertisement

މެއި މަހު ނިއު ސައުތު ވޭލްސް ސްޓޭޓުގެ ބެތާސްޓް ސިޓީގެ ވިޔަފާރި ބްރީޑަރެއްގެ އަތުން އަތުލީ މެޑަގަސްކާ ހިސިންގް ކުރަތްޕާއި އާއި ޑޫބިއާ ކުރަފިއެވެ. މި ދެ ބާވަތް ވެސް އޮސްޓްރޭލިއާއަށް އެތެރެކުރުމާއި ގެންގުޅުމާއި ވިއްކުން މަނާ ކަމަށް އެ ޤައުމުގެ ތިމާވެށި ވުޒާރާއިން ބުނެއެވެ. އަތުލައިގަތް ކުރަފީގެ އަގު 200,000 އޮސްޓްރޭލިއަން ޑޮލަރު (142,000 އެމެރިކާ ޑޮލަރު) އަށް އަރައެވެ.

މެޑަގަސްކާ ހިސިންގް ކުރަފިއަކީ ދުނިޔޭގެ އެންމެ ބޮޑެތި ކުރަފީގެ ތެރޭގައި ހިމެނޭ ބާވަތެކެވެ. މި ބާވަތުގެ ކުރަފީގެ ދިގުމިނުގައި ފަސް ސެންޓިމީޓަރާއި އަށް ސެންޓިމީޓަރާއި ދެމެދުގެ ދިގުމިނެއް ހުރެއެވެ. އެއީ އޮސްޓްރޭލިއާގައި ޢާންމުކޮށް ފެންނަ ކުރަފީގެ ބާވަތްތަކަށް ވުރެ ތިން ގުނަ ބޮޑު ސައިޒެކެވެ. ބެލެވޭ ގޮތުގައި މި ބޮޑެތި ކުރަފި ބްރީޑް ކުރީ ގެންގުޅޭ ބޮއް ފަދަ ޖަނަވާރުތަކަށް ކާންދޭ ކާނާގެ ގޮތުގައި ވިއްކުމަށެވެ.

އޮސްޓްރޭލިއާއަކީ ދަނޑުވެރިކަމާއި ދޭސީ ދިރޭ ތަކެތި ޙިމާޔަތްކުރުމަށް ބޯޑަރުތަކުގައި ހަރުކަށި ބަޔޯސެކިއުރިޓީ ފިޔަވަޅުތައް އަޅާ ޤައުމެކެވެ. ތިމާވެށި ވުޒާރާއިން ބުނީ މި ބާވަތުގެ ކުރަފީގެ ސަބަބުން ބަލި ފެތުރުމާއި ދޭސީ ދިރޭ ތަކެއްޗަށް ގެއްލުން ލިބުމުގެ ނުރައްކާ އޮތް ކަމަށެވެ. ބްރީޑަރުގެ މައްޗަށް ދައުވާ ނުކުރާ ކަމަށާއި، އަތުލައިގަތް ކުރަފިތައް ނައްތައިލާނެ ކަމަށް ވެސް އެ ވުޒާރާއިން ބުނެއެވެ.