ދިވެހިރާއްޖޭގެ ޑިޖިޓަލް ކުރިއެރުމުގައި އަންހެން ކުދިންނަކީ މުހިއްމު ބައިވެރިންނަށް ވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.

ބައިނަލްއަޤްވާމީ ގޮތުން ފާހަގަކުރާ "ގާރލްސް އިން އައިސީޓީ ޑޭ" އާ ގުޅިގެން ދެއްވި ޚިޠާބުގައި، މިއަހަރުގެ ޝިޢާރު ކަމަށްވާ "އޭއައި ފޯރ ޑިވެލޮޕްމަންޓް: ގާރލްސް ޝޭޕިންގ ދަ ޑިޖިޓަލް ފިއުޗަރ" އަށް އިޝާރާތްކުރައްވައި، ސަރުކާރުން ޓެކްނޮލޮޖީއަށް ދޭ އަހައްމިއްޔަތު އެމަނިކުފާނު ހާމަކުރެއްވިއެވެ. ވަކިން ޚާއްޞަކޮށް ތަޢުލީމީ، ޞިއްޙީ އަދި ދައުލަތް ހިންގުމުގެ ނިޒާމު ހަރުދަނާކުރުމުގައި އާޓިފިޝަލް އިންޓެލިޖެންސް (އޭއައި) ގެ މުހިއްމުކަން އެމަނިކުފާނު ފާހަގަކުރެއްވިއެވެ.

Advertisement

ރައީސުލްޖުމްހޫރިއްޔާ ވިދާޅުވި ގޮތުގައި އޭއައިގެ ދާއިރާއިން އަންހެން ކުދިން ކުރިއަށް ދިއުމަކީ ހަމައެކަނި ފަންނީ ކުރިއެރުމެއް ނޫނެވެ. އެއީ މުޖުތަމަޢުގައި އޮންނަ މިންތީގެ ތަފާތުތައް ކުޑަކޮށް، ޑިޖިޓަލް ދުނިޔޭގައި ހަމަހަމަ ފުރުޞަތުތަކެއް ހޯދައިދިނުމަށް އެޅޭ މުހިއްމު ފިޔަވަޅެކެވެ. "މޯލްޑިވްސް 2.0" އިސްތިރާތީޖީގެ ދަށުން ސަރުކާރުގެ އަމާޒަކީ، މީގެ ކުރިން އަންހެނުންގެ ބައިވެރިވުން މަދު ދާއިރާތައް ކަމަށްވާ ރޮބޮޓިކްސް، ކޮމްޕިއުޓަރ ޕްރޮގްރާމިންގ އަދި ޑިޖިޓަލް އިޤްތިޞާދު ފަދަ ރަންގުތަކުގައި އަންހެން ކުދިންނަކީ ނުފޫޒުގަދަ، ބާރުވެރި ބަޔަކަށް ހެދުމެވެ.

މީގެ އިތުރުން، އަންހެން ކުދިންނަކީ ހަމައެކަނި ޓެކްނޮލޮޖީ ބޭނުންކުރާ ބަޔަކަށް ވުމުގެ ބަދަލުގައި، އައު އީޖާދުތައް އުފައްދާ ބާރުވެރި ބަޔަކަށް ވާންޖެހޭނެ ކަމަށް ރައީސުލްޖުމްހޫރިއްޔާ ވިދާޅުވިއެވެ. އެމަނިކުފާނު ވަނީ އޭއައިގެ ދާއިރާގައި އަންހެން ކުދިންގެ ބައިވެރިވުން އިތުރުކުރުމަށް ބައިނަލްއަޤްވާމީ ފެންވަރުގައި މަސައްކަތް ކުރުމަށް ގޮވާލައްވައި، ހަމަހަމަ ފުރުޞަތުތަކެއް އޮތް ކުރިމަގަކަށް އުއްމީދު ކުރައްވާކަން ހާމަކުރައްވާފައެވެ.

މި މުނާސަބަތާ ގުޅިގެން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދުވެސް ވަނީ އަންހެނުންނާއި އަންހެން ކުދިން ޓެކްނޮލޮޖީގެ ދާއިރާއިން ކުރިއަށް ދިއުމަށް ހިތްވަރު ދެއްވާފައެވެ. އެކަމަނާގެ މެސެޖުގައި، އައިސީޓީ ދާއިރާގައި ހުރި ހުރަސްތައް ނައްތާލައި، އެންމެންގެ ބައިވެރިވުން ހިމެނޭ ފަދަ ގޮތަކަށް ކުރިމަގު ބައްޓަން ކުރުމަށް ހުރިހާ ފަރާތްތަކެއްގެ އެހީތެރިކަމަށް އެދިވަޑައިގެންފައިވެއެވެ.