ބައިނަލްއަޤުވާމީ ދަރަންޏާއި ބޭރު ފައިސާގެ ރިޒާވް ހީނަރުވަމުންދާ ދަނޑިވަޅެއްގައި، ކަރަންސީ ސޮވެޕް ފެސިލިޓީގެ މުއްދަތު އިތުރުކޮށްދިނުމަށް ރާއްޖެއިން އަނެއްކާވެސް އިންޑިއާގައި އެދިއްޖެއެވެ.

ނިއުސްޕްރެސް އިންޑިއާއިން ރިޕޯޓުކޮށްފައިވާ ގޮތުގައި، ރާއްޖޭގެ މާލީ ހާލަތު މިހާރު ވަނީ ވަރަށް ބޮޑަށް ގޯސްވެފައެވެ. ފިޗް ފަދަ ބައިނަލްއަޤުވާމީ ރޭޓިން އެޖެންސީތަކުން ރާއްޖޭގެ ސޮވެރިން ރޭޓިން ސީސީ އަށް ދަށްކޮށްފައިވާއިރު، މިއީ ދަރަނި ނުދެއްކުމުގެ ފުރުސަތު ބޮޑުކަން ދައްކައިދޭ މިންގަނޑެކެވެ.

Advertisement

މި އެޕްރީލް މަހު ގާތްގަނޑަކަށް އެއް ބިލިއަން ޑޮލަރުގެ ދަރަނި އަނބުރާ ދެއްކުމުގެ ޕްރެޝަރު ރާއްޖެއަށް އޮތެވެ. ސޮވެރިން ޑިވެލޮޕްމެންޓް ފަންޑު ބޭނުންކޮށްގެން 500 މިލިއަން ޑޮލަރުގެ ސުކޫކް ބޮންޑް ދައްކާފައިވީ ނަމަވެސް، އެ ފިޔަވަޅުގެ ސަބަބުން ބޭރު ފައިސާގެ ރިޒާވް ގާތްގަނޑަކަށް ހުސްވެފައިވާ ކަމަށް އެ ރިޕޯޓުގައި ބުނެފައިވެއެވެ. އިންޑިއާއިން 2024 ވަނަ އަހަރުގެ އޮކްޓޫބަރުގައި ރާއްޖެއަށް 400 މިލިއަން ޑޮލަރުގެ ކަރަންސީ ސޮވެޕް ފެސިލިޓީއެއް ފޯރުކޮށްދީފައިވާއިރު، އެ ފެސިލިޓީގެ މުއްދަތު މިހާރު ވެސް ދެ ފަހަރު އިތުރުކޮށްދީފައިވެއެވެ. އޭގެ އިތުރުން ކޮންމެ ފަހަރަކު 50 މިލިއަން ޑޮލަރުގެ ޓްރެޜަރީ ބިލްގެ މުއްދަތު ދިގުކޮށްދީ، އިންފްރާސްޓްރަކްޗާ ތަރައްޤީއަށް 565 މިލިއަން ޑޮލަރުގެ ލައިން އޮފް ކްރެޑިޓެއް ވެސް އިންޑިއާއިން ފޯރުކޮށްދީފައިވެއެވެ. ނަމަވެސް އިންޑިއާގެ ޤަވާއިދުތައް ބުނާ ގޮތުން، ދެ ފަހަރު ފައިސާ ނެގުމާ ދެމެދު ވަކި މުއްދަތެއް (ކޫލިން-އޮފް ޕީރިއަޑް) އޮންނަން ޖެހޭ އިރު، ލޯނު އިތުރުކުރެވޭ މިންވަރަށް ވެސް ވަކި ލިމިޓެއް ކަނޑައެޅިފައިވެއެވެ.

މި ޓެކްނިކަލް ހުރަސްތަކާ ހެދި މި ފަހަރު އެ ފެސިލިޓީ އިތުރުކޮށްދިނުން އިންޑިއާއަށް ބޮޑު ގޮންޖެހުމަކަށް ވެފައިވާ ކަމަށް ރިޕޯޓުގައި ފާހަގަކޮށްފައިވެއެވެ. ރާއްޖޭގެ އިޤުތިޞާދު މައިގަނޑު ގޮތެއްގައި ބިނާވެފައި ވަނީ ފަތުރުވެރިކަމުގެ މައްޗަށް ނަމަވެސް، މެދުއިރުމަތީގެ ހަމަނުޖެހުންތަކުގެ ސަބަބުން ފަތުރުވެރިކަމުގެ ސިނާޢަތަށް ބޮޑެތި ގެއްލުންތަކެއް ވެފައިވެއެވެ. ތެލުގެ އަގު އުފުލުމާއި ބައިނަލްއަޤުވާމީ ލޯނު ލިބުމުގައި ދިމާވެފައިވާ ލަސްވުންތަކުގެ ސަބަބުން ހާލަތު އިތުރަށް ގޯސްވެފައިވާ ކަމަށް ވެސް އެ ރިޕޯޓުގައި ބުނެފައިވެއެވެ.