އިސްތިއުމާރީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ، ދެކުނު ލުބުނާނުގައި ތިބި އިސްރާއީލު ސިފައިންގެ ގާތަށް ޒިޔާރަތްކުރި ކަމަށް ބުނެ، ހިޒްބުﷲ ގެ ފައިޓަރުން ލައްވައި އެރުމުގެ ނުރައްކާ ނައްތާލެވިފައިވާ ކަމަށް ބުނެފިއެވެ.

ނަތަންޔާހޫގެ އޮފީހުން އާންމުކުރި ވީޑިއޯއެއްގައި ފެންނަ ގޮތުން އޭނާ ހުރީ ބުލެޓް ޕްރޫފް ޖެކެޓެއް ލައިގެން، މޫނު ނިވާކޮށްގެން ތިބި ސިފައިންގެ ތެރޭގައެވެ. "ހަނގުރާމަ ކުރިއަށް އެބަ ދޭ، ލުބުނާނުގެ ސެކިއުރިޓީ ޒޯން ތެރޭގައި ވެސް،" ނަތަންޔާހޫ ބުންޏެވެ. "މި ސެކިއުރިޓީ ޒޯނު މެދުވެރިކޮށް ލުބުނާނުން އެރުމުގެ ނުރައްކާ ނާކާމިޔާބުކޮށްލެވިއްޖެ ކަމަށް ފެންނަނީ،" ކަމަށާއި އޭނާ އާއެކު ދިފާއީ ވަޒީރު އިސްރާއީލް ކެޓްޒް އަދި އަސްކަރީ ވެރިޔާ އީޔާލް ޒަމީރު ބައިވެރިވި ކަމަށް ބުންޏެވެ. ދެކުނު ލުބުނާނުގެ ބިމުގައި ހިންގާ އޮޕަރޭޝަންތަކުގެ ސަބަބުން އިސްރާއީލުގެ އުތުރުގެ އާބާދީތަކަށް ހިޒްބުﷲ އިން ފޮނުވާ ރޮކެޓް ހަމަލާތައް "ކޮންޓެއިން" ކުރެވެމުންދާ ކަމަށާއި، އެ ސަރަހައްދުގައި ހަމާސް އާ ވެސް "ކުރިމަތިލަމުންދާ" ކަމަށް ނަތަންޔާހޫ ބުންޏެވެ. "ކުރަން ޖެހޭ އިތުރު ކަންކަން އެބަ ހުރި، އަދި އެކަންކަން ކުރެވެމުން އެބަ ދޭ،" ކަމަށް ވެސް ބުންޏެވެ.

Advertisement

އިސްރާއީލުގެ ހޯމް ފްރަންޓް ކޮމާންޑުން ބުނި ގޮތުގައި އާދީއްތަ ދުވަހު ލުބުނާނުން އިސްރާއީލަށް މަދުވެގެން 10 ރޮކެޓް ހަމަލާ ދީފައިވެއެވެ. ނަމަވެސް އެއްވެސް މީހަކު މަރުވި ކަމުގެ ރިޕޯޓެއް ލިބިފައެއް ނުވެއެވެ.

ނަތަންޔާހޫ ދެކުނު ލުބުނާނަށް ދިޔަ ކަމަށް ބުނީ، ލުބުނާނާއި އިސްރާއީލާއި އެމެރިކާގެ މަސްއޫލުވެރިން ވޮޝިންޓަނުގައި ސީދާ މަޝްވަރާތައް ފެށުމުގެ ދެ ދުވަސް ކުރިންނެވެ. ހޮނިހިރު ދުވަހު ނަތަންޔާހޫ ބުނީ "ހިޒްބުﷲ ގެ ހަތިޔާރު ރޫޅާލުމާއި، ޖީލުތަކަށް ދެމިގެންދާނެ ހަގީގީ ސުލްހައިގެ އެއްބަސްވުމެއް ބޭނުންވާ" ކަމަށެވެ.

އޭއެފްޕީ ބުނި ގޮތުގައި، އެމެރިކާ-އިސްރާއީލުގެ ހަމަލާތަކުގައި ހަނގުރާމައިގެ ފެށުމުގައި ފެބްރުއަރީ 28 ވަނަ ދުވަހު އީރާނުގެ ރޫހީ ލީޑަރު އަވަހާރަކޮށްލުމާ ގުޅިގެން ހިޒްބުﷲ އިން އިސްރާއީލަށް ރޮކެޓް ހަމަލާ ދޭން ފެށުމުން ލުބުނާން މި ހަނގުރާމައިގެ ތެރެއަށް ވެއްދުނީއެވެ. އިސްރާއީލުން ވަނީ ވަރުގަދަ ވައިގެ ހަމަލާތަކާއި ދެކުނު ލުބުނާނަށް އެއްގަމު އެރުމެއް ދީފައެވެ.