ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ 2026 ވަނަ އަހަރުގެ ފުރަތަމަ ސެމިސްޓަރގެ ސްކޮލަރޝިޕްތައް ލިބުނު ދަރިވަރުންނަށް ސެޓްފިކެޓް ދިނުމުގެ ޚާއްޞަ ރަސްމިއްޔާތެއް ބާއްވައިފިއެވެ. މި ރަސްމިއްޔާތުގައި ފުރަތަމަ ފަހަރަށް އެމްއެންޔޫގައި "މައުމޫން ފައުންޑޭޝަން ސްކޮލަރޝިޕް" ވެސް ހަވާލުކޮށްފައިވެއެވެ.

މައުމޫން ފައުންޑޭޝަނުގެ ފަރާތުން އެމްއެންޔޫގެ މާސްޓަރ އޮފް އެޑިއުކޭޝަން ޕްރޮގްރާމްތަކުގައި ކިޔަވާ ދަރިވަރުންނަށް ހުޅުވައިލި މި ފުރުޞަތަށް ހަ ދަރިވަރުން ކުރިމަތިލީ އިރު، ހޮވުނީ އެއް ދަރިވަރެކެވެ. އެ ދަރިވަރަށް ސެޓްފިކެޓް ހަވާލުކޮށްދެއްވީ މައުމޫން ފައުންޑޭޝަންގެ އެގްޒެކެޓިވް ކޮމިޓީގެ މެންބަރު ދުންޔާ މައުމޫނެވެ. މި ސްކޮލަރޝިޕަކީ ތަޢުލީމީ ދާއިރާއިން ރަނގަޅު ނަތީޖާ ހޯދައި އިސްނެގުމުގެ ހުނަރު ހުރި ދަރިވަރުންނަށް ހިތްވަރު ދިނުމުގެ ގޮތުން ދެވޭ ފުރުޞަތެކެވެ.

Advertisement

މީގެ އިތުރުން، އެމްއެންޔޫ ސްކޮލަރޝިޕްތަކަށް ޖުމްލަ 64 ދަރިވަރުން ކުރިމަތިލީ އިރު، އިވެލުއޭޝަން މަރުހަލާއަކަށް ފަހު 11 ދަރިވަރަކު ހޮވިފައިވެއެވެ. މި އެވޯޑުތައް ހަވާލުކޮށްދެއްވީ ޑރ. ޝެހެނާޒް އާދަމެވެ.

މިފަހަރު ދެވުނު ސްކޮލަރޝިޕްތަކުގެ ތެރޭގައި އެމްއެންޔޫ ފުލް ސްކޮލަރޝިޕާއި، ޓިއުޝަން ފީ ސްކޮލަރޝިޕާއި، ޕީއެޗްޑީ ސްކޮލަރޝިޕާއި ޝަހީދު އެވޯޑު ހިމެނެއެވެ. މި ސްކޮލަރޝިޕްތަކުގެ މައިގަނޑު މަޤުޞަދަކީ ކިޔެވުމުގެ ޚަރަދުތަކަށް ލުޔެއް ހޯދައިދީ، ދަރިވަރުންގެ ތަޢުލީމީ އަދި ފަންނީ ކުރިއެރުމަށް މަގުފަހިކޮށްދިނުމެވެ.