ބޮޑުތަކުރުފާނު މަގު ލޯކަލް މާރުކޭޓު ސަރަހައްދުގައި ގަވައިދާ ހިލާފަށް ޕާކުކޮށްފައި ހުރި އުޅަނދުތައް ފުލުހުން ޓޯކޮށްފި އެވެ.

ފުލުހުން ބުނީ އެ ސަރަހައްދުގައި ނުގަވައިދުން ޕާކުކޮށްފައި ހުރި އުޅަނދުތައް ޓޯކުރަން ފެށީ އިއްޔެ ރޭ ކަމަށެވެ. އޭރުން ފެށިގެން ކުރަމުންދާ މަސައްކަތުން ރެއާ ހަމައަށް ހަތަރު ފުރޮޅުލީ ނުވަ އުޅަނދު ޓޯކޮށްފައިވާ ކަމަށް ބުނެފައިވެ އެވެ.

Advertisement

ފުލުހުން ބުނީ މި މަސައްކަތް އަދިވެސް ކުރިޔަށް ގެންދާނެ ކަމަށެވެ.

އެހެންކަމުން، މަގުމަތީގައި ގަވާއިދާ ހިލާފަށް އުޅަނދު ޕާކުނުކުރުމަށާއި، އަދި އެގޮތަށް ޕާކުކޮށްފައިވާ އުޅަނދުތައް ނެގުމަށް އިލްތިމާސްކޮށްފައިވެ އެވެ. މި މަސައްކަތުގައި އާންމު ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކޮށް، ފުލުހުން ވަނީ ޝުކުރު އަދާކޮށްފައި އެވެ.

ބޮޑުތަކުރުފާނު މަގު މާރުކޭޓު ސަރަހައްދުގައި ގަވައިދާ ހިލާފަށް ޕާކުކޮށްފައި ހުރި ހަތަރު ފުރޮޅުލީ އުޅަނދުތައް ޓޯކުރަނީ -- ފޮޓޯ: ޕޮލިސް

މާރުކޭޓާއި ނޯތް ހާބަރު ހިމެނޭ ސަރަހައްދަކީ ބާރުބޮޑު ސަރަހައްދެކެވެ.

އެ ސަރަހައްދު ޒަމާނީ ފެންވަރަށް ތަރައްގީކޮށް މަގު ފުޅާކޮށް މަގުގެ ދެ ފަރާތުގައި ޕާކު ކުރުން ވަނީ މަނާކޮށްފައި އެވެ. އެގޮތަށް ހަމަޖެއްސުމުން އެ މަގު ބޭނުން ކުރާ ފަރާތްތަކަށް ބޮޑު ލުޔެއް ލިބުނު ނަމަވެސް މި ފަހުން ގަވައިދާ ހިލާފަށް ހަތަރު ފުރޮޅުލީ އުޅަނދުތައް ޕާކުކޮށް މުޅި އެ ސަރަހައްދު އޮންނަނީ ފުރިފައި އެވެ. 

އަދި ކުރިއެކޭ އެއްގޮތަށް އެމަގުން ދުއްވަން އުނދަގޫވެފައިވާ ކަމަށް މީހުން ދަނީ ޝަކުވާ ކުރަމުންނެވެ.