ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ސެންޓަރ ފޮރ ސެކިއުރިޓީ އެންޑް ސްޓްރެޓީޖިކް ސްޓަޑީޒް (ސީއެސްއެސްއެސް) އާއި ފޮރިން ސަރވިސް އިންސްޓިޓިއުޓް އޮފް މޯލްޑިވްސް (ފޮސިމް) ގުޅިގެން "ސްމޯލް ސްޓޭޓްސް ސެކިއުރިޓީ އެންޑް ފޮރިން ޕޮލިސީ" ޖޮއިންޓް ސެމިނާ ސިލްސިލާގެ ފުރަތަމަ ސެޝަން މިއަދު އެމްއެންޔޫ ސެންޓްރަލް އޮޑިޓޯރިއަމްގައި ބާއްވައިފިއެވެ.

މި ސެމިނާގައި މަތީ ފެންވަރުގެ ސިޔާސަތު ކަނޑައެޅުންތެރިންނާއި، އެކެޑެމިކް ބޭފުޅުންނާއި، ދަރިވަރުން ބައިވެރިވެ، ބައިނަލްއަޤުވާމީ މައިދާނުގައި ރާއްޖެ ފަދަ ކުދި ދައުލަތްތަކުން ސްޓްރެޓީޖިކް ދައުރު އަދާކުރާ ގޮތާ ގުޅޭ ގޮތުން މަޝްވަރާ ކުރެވުނެވެ. މޫސުމީ ބަދަލުތަކާއި، ކަނޑުގެ ނުރައްކާތަކާއި، ސަރަޙައްދީ ޖިއޯޕޮލިޓިކްސް ފަދަ ގޮންޖެހުންތަކުގެ ތެރޭގައި ޤައުމީ މަސްލަޙަތު ހިމާޔަތްކުރުމަށް ސެމިނާގައި ވަނީ އަލިއަޅުވާލައިފައެވެ.

Advertisement

ސެމިނާ ފެށިގެންދިޔައީ އެމްއެންޔޫގެ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމްގެ ފެށުމުގެ ބަސްފުޅަކުންނެވެ. އެ ކަމަނާ ވަނީ ރާއްޖެއަށް ސްޓްރެޓީޖިކް ގޮތުން މުހިންމު ސަލާމަތީ އަދި ޚާރިޖީ ސިޔާސަތުގެ މައްސަލަތަކާ ގުޅޭ ޢިލްމީ މަޢުލޫމާތު އުފެއްދުމާއި މަޝްވަރާ ކުރިއެރުވުމުގައި ޤައުމީ ޔުނިވަރސިޓީގެ ދައުރުގެ މައްޗަށް އަލިއަޅުއްވާލައްވައިފައެވެ. ސެމިނާގެ ކީނޯޓް އެޑްރެސް ދެއްވީ ސްރީ ލަންކާގެ ބަންޑާރަނައިކެ ސެންޓަރ ފޮރ އިންޓަނޭޝަނަލް ސްޓަޑީޒް (ބީސީއައިއެސް) ގެ ޑިރެކްޓަރ އޮފް އެޑިއުކޭޝަން ޑރ. ބާގްޔާ ސެނަރަތުނެ އެވެ. ޑރ. ސެނަރަތުނެ ވަނީ ކުދި ދައުލަތްތަކުގެ ސްޓްރެޓީޖިކް މިނިވަންކަމާއި އިންޑިއާ ކަނޑުގެ ސަރަޙައްދީ އެއްބާރުލުމުގެ މުހިންމުކަން ފާހަގަކުރައްވައިފައެވެ.

ސެމިނާގައި ބޭއްވި ޕެނަލް ޑިސްކަޝަން މޮޑަރޭޓް ކުރެއްވީ އެމްއެންޔޫ ރިސާޗް ޑިވެލޮޕްމަންޓް އޮފީހުގެ އިސްމާޢީލް ޢައްޒާމް ވަޖީހެވެ. ޕެނަލިސްޓުންގެ ތެރޭގައި ޑރ. ބާގްޔާ ސެނަރަތުނެގެ އިތުރުން، މިނިސްޓްރީ އޮފް ފޮރިން އެފެއާޒްގެ ޖޮއިންޓް ސެކްރެޓަރީ މަރިޔަމް މިދުފާ ނަޢީމް އަދި އެމްއެންޔޫގެ ޕޮލިޓިކަލް ސައިންސް އެންޑް އިންޓަނޭޝަނަލް ރިލޭޝަންސް ކޯޑިނޭޓަރ މުޙައްމަދު ހޫދު އިބްރާހީމް ހިމެނިވަޑައިގެންނެވިއެވެ. ޕެނަލުން ނިންމީ ކުދި ދައުލަތްތަކަކީ ބައިނަލްއަޤުވާމީ މައިދާނުގައި ދުވަހެއް ދުވަހަކަށް ހަރަކާތްތެރި ބައިވެރިންނަށް ވަމުންދާ ބައެއް ކަމަށާއި، ޢިލްމީ މުއައްސަސާތަކާއި ސިޔާސަތު ކަނޑައެޅުމުގެ މުއައްސަސާތަކާ ދެމެދު ސްޓްރެޓީޖިކް ޕާޓްނަރޝިޕްތައް ބިނާކުރުމަކީ ކޮންމެހެން ބޭނުންތެރި ކަމެއް ކަމަށެވެ.

މި ސެމިނާ އަކީ ސީއެސްއެސްއެސް އިން ފޮސިމާ ގުޅިގެން ކުރިއަށް ގެންދާ ސެމިނާ ސިލްސިލާގެ ފުރަތަމަ ސެޝަނެވެ. މި ސިލްސިލާ މެދުވެރިކޮށް އެމްއެންޔޫ އިން މަސައްކަތް ކުރަނީ ސިޔާސަތާ ގުޅުންހުރި ޢިލްމީ މަޝްވަރާ ދެމެހެއްޓެނިވި ގޮތެއްގައި ކުރިއެރުވައި، ޤައުމީ ޤާބިލުކަން ބިނާކުރުމަށް އެހީތެރިވެދިނުމަށެވެ.