މާލޭގެ ހަނި މަގުތަކުގައި ދުއްވާލާ ކޮންމެ މީހަކަށް ވެސް މި މަންޒަރު ފެންނާނެއެވެ. ކުރިމަތީގައި ދުއްވާފައި ދާ ސައިކަލު ނުވަތަ ކާރު ކުއްލިއަކަށް ގޯޅި އަޅަނީއެވެ. ސިގްނަލެއް ނެތެވެ. ނުވަތަ ސިގްނަލް އެޅަނީ ގޯޅިއާ ހަމައަށް އެރުމަށްފަހު އެންމެ ފަހު ސިކުންތުގައެވެ. ފަހަތުން އަންނަ މީހާއަށް ބްރޭކް ޖައްސާނެ ފުރުޞަތުވެސް ނުލިބޭހާ ނުރައްކާތެރި ކޮށެވެ.

ސޮސައިޓީ އޮފް އޮޓޯމޯޓިވް އެންޖިނިއާސް (އެސްއޭއީ) ގެ ދިރާސާއަކުން ދައްކާ ގޮތުގައި ސިގްނަލް ނާޅައި ނުވަތަ ރަނގަޅަށް ނާޅައި ދުއްވުމުގެ ސަބަބުން ހަމައެކަނި އެމެރިކާގައި ވެސް އަހަރަކު ދެ މިލިއަނަށް ވުރެ ގިނަ އެކްސިޑެންޓް ހިނގައެވެ. މިއީ ފޯނާ ކުޅެމުން ދުއްވައިގެން ހިނގާ އެކްސިޑެންޓްތަކަށް ވުރެ ދެ ގުނަ އިތުރު ޢަދަދެކެވެ. ޔުނިވާސިޓީ އޮފް މިޝިގަންގެ ޓްރާންސްޕޯޓޭޝަން ރިސާޗް އިންސްޓިޓިއުޓުގެ ދިރާސާއެއް ބުނާ ގޮތުގައި ސިގްނަލް ރަނގަޅަށް ބޭނުންކުރާ ނަމަ އެކްސިޑެންޓް ވުމުގެ ފުރުޞަތު 40 އިންސައްތައާ ހަމައަށް ދަށްކުރެވެއެވެ.

ޓްރެފިކް ސޭފްޓީ އެކްސްޕާޓުންގެ ލަފާއަކީ ގޯޅިއަކަށް އެޅުމުގެ މަދުވެގެން 30 މީޓަރު (ގާތްގަނޑަކަށް 100 ފޫޓު) ކުރިން ސިގްނަލް ދިނުމެވެ. މިއީ ގާތްގަނޑަކަށް ތިނެއް ނުވަތަ ހަތަރު ކާރު ދިގުމިނެވެ. ހައިވޭ ނުވަތަ ބާރު ސްޕީޑުގައި ދުއްވާ ނަމަ ފަސް ސިކުންތު ކުރިން ސިގްނަލް ދިނުން ލާޒިމެވެ. ސަބަބަކީ ބާރު ސްޕީޑުގައި ވެހިކަލް ހުއްޓުވުމަށް ބޭނުންވާ ދުރުމިން ވެސް ބޮޑުތަނުން އިތުރުވާތީއެވެ.

ނަމަވެސް މާލެ ފަދަ ތޮށްޖެހިފައިވާ ތަނެއްގައި މި ދުރުމިނަށް ނުދެވިދާނެއެވެ. އެކަމަކު މާލޭގެ ހަނި ގޯޅިތަކުގައި ސައިކަލެއް ދުއްވާ ސްޕީޑުގައި ވެސް ދެ ތިން ސިކުންތު ކުރިން ސިގްނަލް އެޅުމަކީ ފަހަތުން އަންނަ ފަރާތަށް ތައްޔާރުވެލާނެ ވަގުތު ލިބޭ ކަމެކެވެ. މައްސަލައަކީ ސިގްނަލް ނާޅައި ކުއްލިއަކަށް ގޯޅި އެޅީމައި، ފަހަތުން އަންނަ މީހާއަށް ރިއެކްޓްކުރާނެ ވަގުތު ނުލިބުމެވެ.

އާންމު ޑްރައިވަރަކު ކުރިމަތީގައި ނުރައްކަލެއް ފެނިގެން ބްރޭކަށް ފައި ޖައްސަން ގާތްގަނޑަކަށް 0.75 ސިކުންތު ނަގައެވެ. މިއީ ހަމައެކަނި ފައި ގެންދިއުމުގެ ވަގުތެވެ. ނުރައްކާ ފެނި، ސިކުނޑިން ސިގްނަލް ފޮނުވައި، ފައި ގެންގޮސް ބްރޭކް ޖެއްސައި، ވެހިކަލް ހުއްޓެން ޖުމުލަ ހައެއް ނުވަތަ ހަތެއް ސިކުންތު ނަގައެވެ.

މާލެ ސިޓީ ކައުންސިލުން 2025 ވަނަ އަހަރު ކުރި ދިރާސާއަކުން ދައްކާ ގޮތުގައި މާލެ، ހުޅުމާލެ އަދި ވިލިމާލެ ސަރަހައްދުގައި 103,000 އަށް ވުރެ ގިނަ ސައިކަލު ދުއްވައެވެ. މިއީ މި ސަރަހައްދުގެ ޖުމުލަ 119,472 ވެހިކަލްގެ ތެރެއިން 92 އިންސައްތައެވެ. 2025 ވަނަ އަހަރުގެ ފުރަތަމަ ހަ މަސް ދުވަހު މާލެ ސަރަހައްދުގައި 1,101 އެކްސިޑެންޓް ރެކޯޑުކޮށްފައިވާ ކަމަށް ފުލުހުންގެ ތަފާސް ހިސާބުތައް ދައްކައެވެ. އޭގެ ތެރެއިން 84 އިންސައްތަ ހާދިސާ ހިނގާފައި ވަނީ މާލެ ސިޓީގައެވެ. އަދި 27 އިންސައްތަ ހާދިސާގައި ސައިކަލު ހިމެނެއެވެ.

ހަނި މަގުތަކުގައި، ގޯޅި ގިނަ ތަންތަނުގައި، ސައިކަލާއި ކާރު އެކީ ދުއްވާ ތޮށްޖެހޭ މާހައުލެއްގައި ސިގްނަލް ނާޅައި ނުވަތަ ފަހު ވަގުތު ސިގްނަލް އެޅުމަކީ ހީކުރާ ވަރަށް ވުރެ ނުރައްކާ ބޮޑު ކަމެކެވެ.

ސިގްނަލް ދިނުމަކީ އާދައަކަށް ހެދުން އެންމެ މުހިންމެވެ. ގޯޅިއަކަށް އެޅުމުގެ ކުރިން ލޯގަނޑު ބެލުމާއި ސިގްނަލް ދިނުމާއި ސްޕީޑް ދަށްކުރުން އެއް ސީކުއެންސަކަށް ހެދުމުން، އޮޓޯއިން އެ ކަމަށް ހޭނެއެވެ. ފަހަތުން އަންނަ ޑްރައިވަރުންނަށް ވެސް ކުރިމަތީގައި ދާ ވެހިކަލްގެ ހަރަކާތްތައް ފަހުމްވާނެއެވެ. ސިގްނަލް ފެނުމުން ދެން ވާނެ ގޮތް ލަފާކުރެވި، ތައްޔާރުވެލެވެއެވެ.

ގޯޅި އެޅުމަށްފަހު ސިގްނަލް ނިވާލުން ވެސް ހަނދާން ބެހެއްޓުން މުހިންމެވެ. ސިގްނަލް ޖައްސާފައި ބައިންދައިގެން ސީދާ ދުއްވުމަކީ ވެސް އެހެން ޑްރައިވަރުންނަށް އޮޅުން އެރުމެއް ދިމާވެދާނެ ހާލަތެކެވެ.

ސިގްނަލް ދިނުމަކީ ކުޑަ ކުޑަ ކަމެކެވެ. އެކަމަކު އެ ކުޑަ ކަންތައް ނުކޮށް ދޫކޮށްލީމައި ދިމާވެދާނެ ހާލަތު ހީކުރާ ވަރަށް ވުރެ މާ ނުރައްކަލެވެ.