ރަމަޟާން މަހާ ބައްދަލުވާ އިރު ގިނަ ބައެއްގެ ސަމާލުކަން ދެވެނީ ކެއުންބުއިމާއި ރޯދައިގެ އަޅުކަމާ ހިސާބަށެވެ. އެކަމަކު މި މާތް މައްސަރުގައި ނަފްސާނީ ގޮތުން ބުރަހެލިވާ ބަޔަކު ވެސް ދިވެހި މުޖުތަމައުގައި ތިބެއެވެ. ނިދި މަދުވެ، ކޮފީއާ ދުރުވެ، ކެއުމުގެ ރޫޓީން ބަދަލުވުމުގެ ސަބަބުން ސިކުނޑިއަށް ބާރުބޮޑުވެ، ރުޅިގަދަވެ، ހާސްވެ، ނުވަތަ މާޔޫސީ އިހުސާސްތައް ކުރެވުމަކީ ދިމާވެދާނެ ހާލަތެކެވެ. މިއީ ހާސްވެ ކަންބޮޑުވާންވީ ކަމެއް ނޫނެވެ.

ރޯދައަށް ހުންނަ ވަގުތު ހަށިގަނޑު ކެއުމެއް ނެތި ފަރުޖެއްސި ނަމަވެސް، ސިކުނޑިއަށް ބޭނުންވާ ގުލޫކޯޒް މަދުވުމުގެ ސަބަބުން ކެތްތެރިކަން ކުޑަވެ، ޖަޒުބާތުތައް ކޮންޓްރޯލް ކުރަން އުނދަގޫ ވެދާނެއެވެ. ޚާއްޞަކޮށް ކުރިން ވެސް ނަފްސާނީ ބައްޔަކާ ހަނގުރާމަ ކުރާ މީހެއް ނަމަ، ރަމަޟާން މަހު އެ ހާލަތު ގޯސްވެދާނެ ކަމަށް ވިސްނައިގެން ތިބުން މުހިންމެވެ. ބޭސް ކާ ގަޑި ބަދަލުވާ ނަމަ ޑޮކްޓަރެއްގެ ލަފާ ހޯދުމަކީ ކޮންމެހެން ކުރަން ޖެހޭ ކަމެކެވެ.

Advertisement

ނަފްސާނީ ދުޅަހެޔޮކަން ދެމެހެއްޓުމަށް އެންމެ ފުރަތަމަ ކުރެވޭނެ ކަމަކީ ނިދި ރަނގަޅު ކުރުމެވެ. ރޭގަނޑު ހަތަރު ދަމު ހޭލައި ހެނދުނު ނިދައި، ހަވީރު ހޭލާ ރޫޓީނަކީ ސިކުނޑި ވަރުބަލިކޮށްލާ ގޮތެކެވެ. ހާރު ކާން ތެދުވެ، ފަތިސް ނަމާދު ކޮށް، ނިދާފައި ހެނދުނު ހެޔޮ ވަގުތެއްގައި ތެދުވެ ދުވަސް ފެށުމަކީ ނަފްސަށް ވެސް ލިބޭ ބޮޑު ހަމަޖެހުމެކެވެ. ހުކުރު ދުވަހެއް ނަމަ، ހުކުރު ނަމާދަށް ފަހު ކުޑަ ވަގުތުކޮޅަކަށް ނިދާލުމަކީ ހަށިގަނޑާއި ސިކުނޑި ތާޒާކޮށްލަން ރަނގަޅު ކަމެކެވެ.

ރަމަޟާން މަހު ސޯޝަލް މީޑިއާގައި ހޭދަކުރާ ވަގުތު ގިނަ ވެސް ވެއެވެ. އެކަމަކު ފޯނު ސްކްރީނާ ދުރުވެ، ޤުރުއާން ކިޔެވުމާއި ޒިކުރު ކުރުމުގައި ވަގުތު ހޭދަކުރުމަކީ ނަފްސާނީ ހަމަޖެހުން ގެނެސްދޭ ކަމެކެވެ. ކޮންމެ ދުވަހަކު ވެސް 15 މިނެޓު ނަމަވެސް އެކަނި ހިމޭންކޮށް ވިސްނާލައި، ނަފްސާ ވާހަކަ ދައްކާލައި، ދުޢާ ކޮށްލުމަކީ ސިކުނޑި ލުއި ކޮށްދޭ ކަމެކެވެ. އަދި ގާތް މީހަކާ ހާލު ހިއްސާ ކޮށްލުމަކީ ވެސް ނަފްސާނީ ބުރަ ލުއި ކޮށްދޭ ގޮތެކެވެ.

ރޯދަ ވީއްލުމުގެ ވަގުތު ހަށިގަނޑަށް ބޭނުންވާ ފެނާއި ކާނާ ރަނގަޅަށް ލިބޭ ގޮތް ހެދުމަކީ ނަފްސާނީ ދުޅަހެޔޮކަމާ ވެސް ސީދާ ގުޅުން ހުރި ކަމެކެވެ. ހަކުރު ގިނަ ބުއިންތަކާއި ތެލުލި ހެދިކާއިން ބަނޑު ފުރާލުމުގެ ބަދަލުގައި، ކަދުރާއި ފެނާއި ރިހަ ބަތާ އެކު ރޯދަ ވީއްލައި، ތަރާވީޙު ނަމާދަށް ފަހު ލުއި ކެއުމެއް ކެއުމަކީ ހަށިގަނޑާއި ސިކުނޑި އެކުއެކީގައި ބެލެންސް ކޮށްދޭ ގޮތެކެވެ.

ރަމަޟާން މަހަކީ ހަމައެކަނި ކެއުންބުއިމުން ދުރުހެލިވާ މައްސަރެއް ނޫނެވެ. މިއީ ނަފްސު އިޞްލާޙު ކޮށް، ރޫޙާނީ ގޮތުން ހަކަތަ ހޯދައި، ހިތުގެ ހަމަޖެހުން ހޯދާ މައްސަރެވެ. އެ ހަމަޖެހުން ލިބެން ފަށާނީ ސިކުނޑީގެ ދުޅަހެޔޮކަމަށް ވެސް ސަމާލުކަން ދީގެންނެވެ.