ރޯދަމަސް ފެށުމާ ދިމާކޮށް އިޒްރޭލުގެ ފުލުހުން، ހައްދުފަހަނައެޅި ޔަހޫދީ ގުރޫޕުތައް އަލް-އަޤްޞާ މިސްކިތުގެ ގޯތިތެރެއަށް ވަންނަ ވަގުތު އެއް ގަޑިއިރަށް އިތުރުކޮށް، އެއާ އެކު ހުޅަނގު އައްސޭރީގެ ފަލަޟްޠީނު ރައްޔިތުންނަށް މިސްކިތަށް ވަނުމުގެ ފުރުޞަތު ބޮޑުތަނުން ހަނިކޮށްފިއެވެ.

ޤުދުސް ޑިސްޓްރިކްޓް ކޮމާންޑަރު އަވްޝާލޮމް ޕެލެޑް ނިންމި ނިންމުމެއްގެ ދަށުން، ޔަހޫދީ ގުރޫޕުތަކަށް ދެން މިސްކިތުގެ ގޯތިތެރޭގައި ފަސް ގަޑިއިރު ހޭދަކުރެވޭނެއެވެ. ކުރީން ހަތެއް ޖަހާއިރު ފެށި ވަނުން މިހާރު ހެނދުނު 6:30 ގައި ފެށޭ ގޮތަށް ބަދަލުކޮށް، 11:30 ގައި ނިމޭ ގޮތަށް ވަނީ ހަމަޖައްސާފައެވެ. ޕެލެޑަކީ ނެޝެނަލް ސެކިއުރިޓީ ވަޒީރު އިޓަމާރު ބެން ގަވީރު މިދިޔަ މަހު އެ މަގާމަށް ކަނޑައެޅި މީހެކެވެ.

Advertisement

ރޯދަމަހުގެ ފުރަތަމަ ދުވަހު ހެނދުނު، ހަތިޔާރު އެޅި ފުލުހުންގެ ހިމާޔަތުގައި ޔަހޫދީ ހައްދުފަހަނައެޅި ގުރޫޕުތައް މިސްކިތުގެ ގޯތިތެރެއަށް ވަދެ، ލަވަ ކިޔައި ނެށި ކަމަށް ރިޕޯޓުތައް ބުނެއެވެ.

ހަމައެއާ އެކު، ރޯދަމަހު ހުކުރު ނަމާދަށް ހުޅަނގު އައްސޭރީގެ ފަލަޟްޠީނު ރައްޔިތުންގެ ތެރެއިން ވައްދާނީ އެންމެ 10,000 މީހުން ކަމަށް ވަނީ ކަނޑައަޅާފައެވެ. ވައްދާނީ 50 އަހަރުން މަތީ މީހުންނާއި 12 އަހަރުން ދަށުގެ ކުދީން އެކަންޏެވެ. އަދި ކޮންމެ މީހަކަށްވެސް ދުރާލާ އިޒްރޭލު ސިފައިންގެ ހުއްދައެއް ބޭނުންވާނެއެވެ. އާންމު ގޮތެއްގައި ރޯދަމަހު އެތައް ލައްކަ ފަލަޟްޠީނު ރައްޔިތުންނެއް ނަމާދަށް ޖަމާވާ މިސްކިތަށް ވަނުން މި ފިޔަވަޅުތަކުން ބޮޑުތަނުން ހަނިވެގެން ދާނެއެވެ.

ހޯމަ ދުވަހު، އަލް-އަޤްޞާ މިސްކިތުގެ އިމާމު ޝެއިޚް މުޙައްމަދު އަލް-ޢައްބާސީ، އެއްވެސް ސަބަބެއް ނާންގައި މިސްކިތުގެ ގޯތިތެރެއިން ހައްޔަރުކޮށްފައިވާ ކަމަށް ފަލަޟްޠީނުގެ ވަފާ ނޫސް އެޖެންސީން ރިޕޯޓުކޮށްފައިވެއެވެ. އަދި ޤުދުސްގެ ކުރީގެ ގްރޭންޑް މުފްތީ ޝެއިޚް ޢިކްރިމާ ޞަބްރީ ވިދާޅުވީ، މި ފިޔަވަޅުތަކުން ހާމަވަނީ "އަލް-އަޤްޞާއާ މެދު އިޒްރޭލުގެ އަމިއްލަ އެދުން އިސްކުރާކުރުން" ކަމަށާއި، ރޯދަމަހު މުސްލިމުން ހަމަޖެހިގެން އަޅުކަން ކުރިޔަ ނުދޭން އިޒްރޭލުން މަސައްކަތް ކުރާ ކަމަށެވެ.

ރޯދަމަހުގެ ފަހު 10 ދުވަހު — އެތައް ލައްކަ ބަޔަކު ޖަމާވެ، ގިނަ ބަޔަކު އިޢުތިކާފަށް ތިބޭ ދުވަސްތަކުގައި — ޔަހޫދީ ގުރޫޕުތައް ވައްދާނެތޯ ނުވައްދާނެތޯ އަދި ގޮތެއް ނިންމާފައި ނުވާ ކަމަށް ވެސް ރިޕޯޓުތައް ބުނެއެވެ. ކުރީ އަހަރުތަކުގައި ފަހު 10 ދުވަހު ވެއްދުން މަނާކޮށްފައި ވެއެވެ. މީގެ އިތުރުން، 2026 ވަނަ އަހަރު ފެށުނީއްސުރެ 250 އަށް ވުރެ ގިނަ ފަލަޟްޠީނު މީހުންނަށް މިސްކިތަށް ވަނުން މަނާކުރާ އަމުރު ނެރެފައިވާ ކަމަށް ޤުދުސް ގަވަރުނޮރޭޓުން ބުނެއެވެ.