މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ރަން ދިހަފަހެއް ނޫޓު ސީރީޒްގެ 20 ރުފިޔާ އަދި 100 ރުފިޔާގެ އައު ޗާޕެއް މިއަދުން ފެށިގެން ދައުރުވާ ފައިސާގެ ތެރެއަށް ދޫކުރަން ފަށައިފިއެވެ.

އެމްއެމްއޭ އިން ބުނީ މި ނޫޓުތައް އަލަށް ޗާޕުކޮށް ނެރެނީ އިގުތިސާދުގައި ނަގުދު ފައިސާއަށް އަލަށް އުފެދޭ ޑިމާންޑާއި ބައުވެ ހަލާކުވެގެން ނަގާ ނޫޓުތަކުގެ ބަދަލުގައި ބޭނުންކުރުމަށް ކަމަށެވެ. މީގެ ތެރެއިން 100 ރުފިޔާގެ ނޫޓު މި މަހުގެ ދެ ވަނަ ދުވަހު އެ އޮތޯރިޓީއަށް ގެނެސްފައިވާ އިރު، 20 ރުފިޔާގެ ނޫޓު ގެނެސްފައި ވަނީ މި މަހުގެ 15 ވަނަ ދުވަހުއެވެ.

Advertisement

މި ދެ ނޫޓުގައި ސޮއިކުރައްވާފައި ވަނީ އެމްއެމްއޭގެ ގަވަރުނަރު އަލްފާޟިލް އަޙްމަދު މުނައްވަރެވެ. ނޫޓުގައިވާ ތާރީޚަކީ 31 ޖުލައި 2025 (6 ޞަފަރު 1447) އެވެ.

އެމްއެމްއޭ އިން ފާހަގަކުރި ގޮތުގައި، 20 ރުފިޔާގެ މި އައު ޗާޕުގެ ދެފުށުގައި ދިވެހި ރުފިޔާގެ ނިޝާން އަލަށް ހިމަނާފައިވާނެއެވެ. އެ ނިޝާން ހިމަނާފައި ވަނީ ނޫޓުގެ މޫނުމަތީގެ ވައަތް ފަރާތުން މަތީގައާއި ފަހަތުގެ ކަނާއަތް ފަރާތުން މަތީގައި، މޫނުމަތީ އަގާ އެކުގައެވެ. ހަމައެއާއެކު 100 ރުފިޔާގެ އައު ޗާޕުގައި ވެސް، 7 ޖުލައި 2024 ގައި އެންމެ ފަހުން ނެރުނު 100 ރުފިޔާގެ ނޫޓެކޭ އެއްފަދައިން، ރުފިޔާގެ ނިޝާން ހިމަނާފައިވެއެވެ.

މި އައު ޗާޕާ އެކު، މިހާރު ދައުރުވަމުންދާ 20 ރުފިޔާ އާއި 100 ރުފިޔާގެ ނޫޓު ވެސް ކުރިއެކޭ އެއްގޮތަށް ދައުރުވަމުން ދާނެ ކަމަށް އެމްއެމްއޭ އިން ބުނެއެވެ.