ކުރިއަށް އޮތް ރޯދަ މަހުގެ ޕީކް ސީޒަނަށް ތައްޔާރުވުމުގެ ގޮތުން، ސްޓެލްކޯއިން ވިލިމާލޭގައި 1،200 ކިލޯވޮޓްގެ ޖެންސެޓެއް ބޭނުންކުރަން ފަށައިފިއެވެ.

ސްޓެލްކޯއިން ބުނެފައިވާގޮތުގައި، އަލަށް ބޭނުންކުރަން ފެށި ޖެންސެޓާއެކު ވިލިމާލޭގެ ކަރަންޓް ކެޕޭސިޓީ އިތުރުވެ، ރައްޔިތުންނަށް ދެމުންދާ ކަރަންޓުގެ ޚިދުމަތުގެ ޔަގީންކަން އިތުރަށް ކަށަވަރުކުރެވޭނެއެވެ.

Advertisement

ކަރަންޓުގެ ޕީކް ސީޒަނުގެ ގޮތުގައި ބަލަނީ ކޮންމެ އަހަރެއްގެ ވެސް ރޯދަ މަހާ ދިމާވާ ދުވަސްވަރެވެ. ރޯދަ މަހު ސްކޫލުތަކާއި އޮފީސްތައް ހިނގާ ވަގުތު މަދުވެ، ގޭގައި ހޭދަކުރާ ވަގުތު އިތުރުވުމާ ގުޅިގެން ކަރަންޓު ބޭނުންކުރާ މިންވަރު ވަރަށް ބޮޑަށް އިތުރުވެއެވެ. މި އަހަރުގެ ރޯދަ މަހުގެ ފުރަތަމަ ދުވަހަކީ ކަލަންޑަރުގައިވާ ގޮތުން ފެބްރުއަރީ 17 ވަނަ ދުވަހެވެ.

މިދިޔަ އަހަރުގެ ރޯދަ މަހާ ދިމާކޮށް ވެސް ސްޓެލްކޯއިން ވަނީ ހުޅުމާލޭގައި އާ އިންޖީނުގެއެއް ހުޅުވައިފައެވެ. އެ އިންޖީނުގޭގައި 1.6 މެގަވޮޓްގެ ޖުމްލަ 12 ޖަނަރޭޓަރު ސެޓް ބަހައްޓާފައިވެއެވެ.