ޖުމްލަ 54 ކްލާސްރޫމާއެކު މި ސަރުކާރުން ފުރަތަމަ ބިނާކުރި ސްކޫލު ރަސްމީކޮށް ހުޅުވައިފިއެވެ.

މި ސަރުކާރުން ތަރައްގީކޮށް ހުޅުވި ފުރަތަމަ ސްކޫލު "ޝަހީދު އަލީ" ސްކޫލު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިއަދު ވަނީ ރަސްމީކޮށް ހުޅުވައިދެއްވައިފައެވެ. 

Advertisement

ހުޅުމާލޭގެ ދެވަނަ ފިޔަވަހީގައި ދިރިއުޅޭ ރައްޔިތުންނަށް އަމާޒުކޮށްގެން ތަރައްގީކޮށްފައިވާ މި ސްކޫލަކީ އެންމެ ޒަމާނީ ފެންވަރަށް ތަރައްގީކިޮށްފައިވާ އަދި އޭސީ ކޮށްފައިވާ 54 ކްލާސްރޫމުގެ ސްކޫލެކެވެ.

އާރްސީސީއާއި ހަވާލުކޮށް ދެ އަހަރުތެރޭގައި ނިންމާފައިވާ މި ސްކޫލު ހުޅުވުމަށް މިއަދު ބޭއްވި ރަސްމިއްޔާތުގައި ވަނީ ސްކޫލުގެ ލޯގޯ އިފްތިތާހުކޮށްފައެވެ.

މިއަދު ރަސްމީކޮށް ހުޅުވާފައިވާ މި ސްކޫލުގައި މަލްޓިޕާޕަސް ހޯލަކާއި ޓާފް ދަނޑަކާއި އިންޑޯ ކުޅިވަރުތައް ކުޅެވޭނޭ ހޯލެއް ވަނީ ގާއިމްކޮށްފައެވެ. މީގެ އިތުރުން 400 ކުދީންގެ އޮޑިޓޯރިއަމަކާއި ލައިބްރަރީއަކާއި، ތިން ސައިސް ލެބާއި ކޮމްޕިއުޓަރު ލެބާއްގެ އިތުރުން ގްރައުޑްގައިވެސް ކުޅިވަރު ކުޅެވޭނޭ އިންތިޒާމު ވަނީ ހަމަޖައްސާފައެވެ.

1،500 ކުދީންގެ ޖާގައިގައި ފަރުމާކޮށްފައިވާ މި ސްކޫލުގައި ދެ ދަންފަޅިއަށް ބަހާލައިގެން ޖުމްލަ 2،500 ދަރިވަރުންނަށް ކިޔަވައިދެވޭނޭ ކަމަށް އެޑިއުކޭޝަން މިނިސްޓްރީއިން ވަނީ ބުނެފައެވެ. 

ޝަހީދު އަލީ ސްކޫލަކީ ހުޅުމާލޭގެ ދެވަނަ ފިޔަވަހީގައި ތަރައްގީކުރި ދާއިމީ ދެވަނަ ސްކޫލެވެ. އެތަނުގައި ފުރަތަމަ ތަރައްގީ ސަލާހުއްދީން ސްކޫލެވެ.