ގޭންގު ކެޓަގަރީއަށް ފެތޭ ގޭންގެއް މިހާރަކު ރާއްޖޭގައި ނެތް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު މިހެން ވިދާޅުވީ ސަރުކާރަށް ދެ އަހަރު ފުރުމުގެ މުނާސަބަތުގައި މިރޭ ބޭއްވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުންނެވެ.

Advertisement

އެ މޭރުމުން ވާހަކަފުޅު ދައްކަވަމުން ރައީސް ވިދާޅުވީ ގޭންގުތަކުގައި ކުރިން އުޅުނު ހުރިހާ ފަރާތްތަކަކުން އެކަން ހުއްޓާލާފައިވާއިރު އެ ކުދިން އެކަން ހުއްޓާލައި މިހާރު ވިޔަފާރި ކުރުމާއި އަބުރުވެރި ދިރިއުޅުމެއް އުޅެވޭތޯ އާދައިގެ ދިރިއުޅުމަކަށް ގޮސްފައިވާކަމަށެވެ.

ރައީސް މިރޭ މިހެން ވިދާޅުވެފައިވާއިރު ގޭންގުތަކާއި ރާވައިގެން ހިންގާ ކުށްތަކާއި ދެކޮޅަށް ހަރުކަށި ފިޔަވަޅު އެޅޭގޮތަށް ހެދި ގޭންގު ކުށްތަކުގެ ޤާނޫނަށް މި އަހަރުގެ އޯގަސްޓްމަހު ޢަމަލުކުރަން ފަށާފައިވާއިރު އެ ޤާނޫނުގެ ދަށުން އަދި މިހާތަނަށް އެއްވެސް ގޭންގެއް ކަނޑައަޅައި ލިސްޓުކޮށްފައެއް ނުވެއެވެ.