އަންހެނުންނަކީ ޢާއިލީ ދިރިއުޅުމުގައި ވަރަށް އިޚްތިރާމު ލިބިގެންވާ ބައެއް ކަމަށާއި ދިވެހި އަންހެނުންނަކީ ގޭގެ ވެރިން ކަމުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ވަޒީރު ޑޮކްޓަރ ޢާއިޝަތު ޝިހާމް ވިދާޅުވެއްޖެއެވެ.

ވަޒީރު މިހެން ވިދާޅުވީ މިރޭ ކުރިއަށްދާ، ރެހެންދި އެވޯޑު ދިނުމުގެ ހަފުލާގައި ވާހަކަފުޅު ދައްކަވަމުން، އިބްނު ބަތޫތާގެ ފޮތް "ރިޙްލާ" ގައި ދިވެހި އަންހެނުން ސިފަކުރައްވާފައިވާގޮތް ހާމަކުރައްވަމުންނެވެ.

ވަޒީރު ވިދާޅުވީ އަންހެނުންނަކީ ޒަމާނުއްސުރެ މި މުޖުތަމަޢު ބައްޓަންކުރުމުގެ މޭސްތިރިންކަމަށާއި ގޭގެ ވެރިން ގޮތުގައި ތިއްބަވައިގެން އިހުގެ އަންހެނުން ގެންދިޔައީ ގާބިލް ޖީލުތައް ތަރުބިއްޔަތު ކުރަމުން ކަމަށެވެ. ބަލިވީމާ އެހީތެރިވަމުން، މުސްކުޅިވީމާ އަޅާލުމާއި އޯގާތެރިކަމާއި އެކު ޢާއިލާތަކަށް ޚިދުމަތްކޮށްދެމުން ކަމަށެވެ. ޖީލަކަށް ފަހު ޖީލެއްގެ ޤާބިލުކަން އިތުރުކުރެވޭނެހެން ތަރުބިއްޔަތު ކުރަމުން ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެރިކަމާ ހަވާލުވެވަޑައިގަތުމުގެ ކުރިން ރާއްޖޭގެ ކަންކޮޅުތަކުގައިވާ ގިނަ އަންހެނުންގެ އަޑު އައްސަވާ، ހާލަތު ދެނެވަޑައިގެންނެވިކަން ފާހަގަކުރައްވައި ވަޒީރު ވިދާޅުވީ އެގޮތުން އިޤްތިޞާދީ ގޮތުން ކުރިއެރުމަށް ހުރި ދަތި ތަކުގެ ވާހަކަތައް އޮޅުން ފިލުއްވި ކަމަށެވެ.

މިކަމަށް ނިމުމެއް ގެންނެވުމަށްޓަކައި އަންހެނުންނަށް ޚާއްސަ 100 މިލިޔަން ރުފިޔާގެ ލޯންނު ސްކީމެއް އެކުލަވާލައްވައި އަދި އެލޯން ސްކީމަކީ ޝާމިލް ކުރުވަނިވި ލޯން ސްކީމް އެއްގެ ގޮތަށް ހެއްދެވުމަށްޓަކައި ލޯން ސްކީމްގެ %25  ނުކުޅެދުންތެރިކަން ހުރި އަންހެނުންނަށް ޚާއްސަ ކުރެއްވިކަން ވަޒީރު ފާހަގަކުރެއްވިއެވެ. އިޤްތިޞާދީ ގޮތުން އަންހެނުން ބާރުވެރިކުރުމަށް މި ސަރުކާރުން ފަށާފައިވާ މަސައްކަތްތަކުގެ ނަތީޖާ މިއަދު ދަނީ ފެންނަމުން. 83 ފަރާތަކަށް ވަނީ މިލޯން ދެވިފައިވާކަންވެސް ވަޒީރު ފާހަގަކުރެއްވިއެވެ.

ޤައުމު ބިނާކުރުމުގައި އަންހެނުންގެ ހިއްސާ އިތުރުކޮށް، ކަންކަން ނިންމާ ފެންވަރުގައި އަންހެނުންގެ ނިސްބަތް އިތުރުކުރުމަކީ މި ސަރުކާރުގެ މުހިއްމު އެއް ސިޔާސަތުކަން ފާހަގަކުރައްވަމުން ވަޒީރު ވިދާޅުވީ މި ސިޔާސަތާއި އެއްގޮތަށް ޢައްޔަންކުރެވޭ މަޤާމްތަކުގައި އަންހެނުންގެ ނިސްބަތްވަނީ އިތުރުކޮށްފައިވާކަމަށާއި މިގޮތުން ސަރުކާރު ހިއްސާވާ ކުންފުނިތަކުގެ ބޯޑުތަކަށް ޢައްޔަންކުރެވޭ އަންހެނުންގެ ނިސްބަތް 27 އިންސައްތައަށް އިތުރުކޮށްފައިވާކަމަށެވެ. އަދި ނޭޝަނަލް ސޯޝަލް ޕްރޮޓެކްޝަން އޭޖެންސީ، އާސަންދަ ކޮމްޕެނީ ލިމިޓެޑް، ކެޕިޓަލް މާކެޓް ޑިވެލޮޕްމަންޓް އޮތީރިޓީ، މޯލްޑިވްސް ޕެންޝަން އެޑްމިނިސްޓްރޭޝަން އޮފީސް އަދި މޯލްޑިވްސް އެއަރޕޯޓްސް ކޮމްޕެނީ ލިމިޓެޑްފަދަ އިދާރާތަކުގެ އެންމެ އިސް މަޤާމްތަކުގައި މިއަދު ތިއްބެވީ އަންހެނުންކަން އުފަލާއިއެކު ފާހަގަކުރައްވާކަމަށާއި އަދި މިނޫންވެސް އެތައް އަގުހުރި ބުރަ މަސައްކަތްތައް ކުރައްވަމުން ގެންދަވާ އެތަކެއް އަންހެން ބޭފުޅުން ގިނަ މަގާމުތަކެއްގައި އެބަ ތިއްބެވިކަން ވަޒީރު ފާހަގަކުރެއްވިއެވެ.

ވަޒީރުގެ ވާހަކަފުޅުގައި އިތުރަށް ވިދާޅުވީ މި ކާމިޔާބީތަކާއެކުވެސް، އަންހެނުންނަށް ރައްކާތެރިކަން ކަށަވަރުކޮށްދީ، ކުރިއަށް ދިއުމުގައި ގިނަ މަސައްކަތްތަކެއް ކުރަން އެބަ ހުރިކަމަށާއި އަންހެނުންގެ ކުރިއެރުމަށް އޮތް މައިގަނޑު އެއް ހުރަހަކީ އަންހެނުންނަށް އެކި ގޮތްގޮތުން ކުރާ އަނިޔާ ކަމަށެވެ. މިކަން ހުއްޓުވުމަށް ކުރާ މަސައްކަތުގެ ތެރޭގައި، ޚާއްސަ އިސްކަމެއްދީގެން ޤާނޫނުތަކާއި ޤަވާއިދުތަކަށް އިސްލާހުގެނައުމުގެ މަސައްކަތް ކުރަމުން އަންނަކަން ފާހަގަކުރައްވަމުން ވަޒީރު ވިދާޅުވީ އަދި މި އިސްލާހުތަކުގެ ތެރެއިން މިހާރު އުފެދެމުން އަންނަ މައްސަލަތަކަށް ރިޢާޔަތްކޮށް ޤާނޫނީގޮތުން އަންހެނުންގެ ޙައްޤުތަކާއި ރައްކާތެރިކަން ކަށަވަރުކުރުމަށް އިތުރު ފިޔަވަޅުތައް އެޅިގެންދާނެ ކަމަށެވެ.