ސަރުކާރުން 2025 ވަނަ އަހަރުގެ ނޮވެމްބަރު މަހުން ފެށިގެން މުސާރައިގެ އޮނިގަނޑު އެއްހަމަކުރުމުގެ ސިޔާސަތެއް ތަންފީޛުކުރަން ނިންމާފައިވަނީ، މާލީ ދެމެހެއްޓެނިވިކަން ހިފެހެއްޓޭނޭގޮތެއްގެ މަތިން، ސަރުކާރުގެ އެކި ދާއިރާތަކުގައި މަސައްކަތްކުރާ މުވައްޒަފުންގެ މުސާރަ އެއްހަމައަކަށް ގެނައުމަށް ކަމަށް މާލީ ވުޒާރާއިން ބުނެފިއެވެ.

ރައްޔިތުންގެ މަޖިލީހުގެ ބަޖެޓު ދިރާސާކުރާ ކޮމިޓީގައި ވާހަކަދައްކަވަމުން، މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރުގެ ނައިބު އަޙްމަދު ސާޢިދު މުޞްޠަފާ ވިދާޅުވީ، ދައުލަތުގެ މުވައްޒަފުންގެ ޕޭ ހާމަނައިޒްކުރުމަށް ރާވާފައިވަނީ، ދައުލަތުގެ އާމްދަނީއަށްވުރެ ރިކަރަންޓް ޚަރަދު ބޮޑު ނުވާނެ ގޮތެއްގެ މަތީން ފިސްކަލް ދެމެހެއްޓެނިވިކަމަށް އިސްކަންދީގެންނެވެ. 

Advertisement

ސާޢިދު ފާހަގަކުރެއްވި ގޮތުގައި 2026 ވަނަ އަހަރުގެ ދައުލަތުގެ ބަޖެޓުގައި ސަރުކާރުގެ އޮފީސްތަކާއި، މިނިވަން މުއައްސަސާތަކާއި އަދި ދައުލަތުގެ އިދާރާތަކުގައި މަސައްކަތްކުރާ މުވައްޒަފުންގެ މުސާރައަށް 14.8 ބިލިއަން ރުފިޔާ ހިމެނިފައިވާއިރު، ޕެންޝަނުގެ ގޮތުގައި 2.3 ބިލިއަން ރުފިޔާ ހޭދަވާނެކަމަށް ލަފާކުރެވެއެވެ. މިއާއެކު ދައުލަތުގެ ބަޖެޓުގައި މުވައްޒަފުންގެ ޚަރަދަށް 17.1 ބިލިއަން ހިމަނާފައިވެއެވެ. އަދި މިއީ މުޅި ޖުމުލަ ބަޖެޓުގެ ހަތަރުބައިކުޅަ އެއްބަޔަށްވުރެ އިތުރު މިންވަރެކެވެ. 

ސާއިދު އިތުރަށް ފާހަގަކުރެއްވި ގޮތުގައި، ސަރުކާރުގެ މައިގަނޑު ސިޔާސަތަކީ، މުސާރައިގެ ހަމަހަމަކަން ގެނައުމާއެކު، ހަރުދަނާ ފިސްކަލް މެނޭޖްމަންޓާއި، މިހާރު ލިބެންހުރި އިންސާނީ ވަސީލަތްތައް ރަނގަޅަށް ބޭނުންކުރުމާއި، އަދި މުޅި ދައުލަތުގެ ސެކްޓަރުގައި ނަތީޖާއަށް އަމާޒުކުރެވޭ އުސޫލުތައް ތަޢާރަފުކުރުމެވެ.

މިއަދު ބޭއްވުނު ބަޖެޓު ދިރާސާކުރާ ކޮމިޓީގެ ޖަލްސާގައި މަޝްވަރާކުރެވިފައިވަނީ މިނިވަން މުއައްސަސާތަކުގެ ބަޖެޓުތަކާގުޅޭގޮތުންނެވެ. އެގޮތުން، މިނިވަން މުއައްސަސާތަކަށް ކަނޑައަޅާފައިވާ ބަޖެޓުން މުސާރައާއި އިނާޔަތްތައް ހަމަޖައްސަން ދަތިވާނެކަމަށް ފާހަގަކޮށްފައިވެއެވެ. ޑެޕިއުޓީ މިނިސްޓަރ އޮފް ފިނޭންސް އެންޑް ޕްލޭނިންގ އަޙްމަދު ސާއިދު މުސްޠަފާ މިކަމާގުޅޭގޮތުން ޖަވާބުދާރީވަމުން، ބަޖެޓު އެކުލަވާލުމުގައި ރިކަރަންޓް ޚަރަދުތައް އިތުރުވާ މިންވަރު އާމްދަނީ އިތުރުވާ މިންވަރަށްވުރެ ދަށްކުރުމަށް ރިއާޔަތްކުރުމަށް ދައުލަތުގެ ފިސްކަލް ޒިންމާގެ ޤާނޫނުގެ ދަށުން ލާޒިމުކޮށްފައިވާކަން ފާހަގަކޮށްފައިވެއެވެ. މިގޮތުން ދައުލަތަށް ލިބޭނެކަމަށް ލަފާކުރާ އާމްދަނީއިން ދައުލަތުގެ ރިކަރަންޓް ޚަރަދުތައް ހަމަޖެއްސުމުގެ މުހިއްމުކަމަށް އަލިއަޅުވާލާފައިވެއެވެ. އަދި ބަޖެޓު އެކުލަވާލާފައިވަނީ އެގޮތުގެ މަތިންކަމުގައި ފިނޭންސްގެ ޑެޕިއުޓީ މިނިސްޓަރ ސާއިދު ވިދާޅުވެފައިވެއެވެ. މީގެ އިތުރުން، ބަޖެޓު ދިރާސާކުރާ ކޮމިޓީން މިނިވަން މުއައްސަސާތަކުގެ ބަޖެޓު ދިރާސާކުރުމުގައި މިކަންކަމަށް ރިއާޔަތްކުރުމަށް އެދެފައިވެއެވެ. އަދި ފިސްކަލް ޒިންމާގެ ޤާނޫނާ އެއްގޮތްވާ ގޮތުގެ މަތިން މި ބަޖެޓާއެކު ހުށަހަޅާފައިވާ ފިސްކަލް އަމާޒުތަކަށް ބުރޫނާރާ ގޮތަށް، މަޖިލީހުގެ ކޮމިޓީން ލަފާދޭގޮތަކަށް ހުށަހަޅާފައިވާ ބަޖެޓަށް ބަދަލުގެނެވިދާނެކަމަށް ދަންނަވާފައިވެއެވެ.

ދައުލަތުން 2026 ވަނަ އަހަރަށް ލަފާކޮށް ހުށަހަޅާފައިވަނީ ފާއިތުވި ސަރުކާރުތަކުން ނަގާފައިވާ ދަރަނިތަކުގެ ތެރެއިން އެކީ އެއްފަހަރާ އަދާކުރަންޖެހޭގޮތަށް ނަގާފައިވާ 9.3 ބިލިއަން ރުފިޔާ ހިމަނާއިގެން 64.2 ބިލިއަން ރުފިޔާގެ ބަޖެޓެކެވެ. ބަޖެޓުގެ ޚަރަދުގެ ގޮތުގައި 49.3 ބިލިއަން ރުފިޔާ އެކަށައަޅާފައިވާ އަންނަ އަހަރު 40.4 ބިލއަން ރުފިޔާގެ އާމްދަނީއެއް ލިބޭނެކަމަށް އަންދާޒާކުރެވެއެވެ.