ރާއްޖޭގެ ފަތުރުވެރިކަމުގެ ސިނާއަތް އަމާޒު ހިފާފައިހުރި ތިމާވެއްޓާ ރަށްޓެހި ފަތުރުވެރިކަމަކަށް ކަމުގައި ފަތުރުވެރިކަމާއި ތިމާވެއްޓާއިބެހޭ ވުޒާރާގެ ވަޒީރު ޠާރިޤު އިބްރާހީމް ވިދާޅުވެއްޖެއެވެ.

ވަޒީރު މިހެން ވިދާޅުވީ ސައުދީ އަރަބިއްޔާގެ ރިޔާޛުގައި މިހާރު ކުރިއަށްދާ އދ ގެ ފަތުރުވެރިކަމާބެހޭ އާންމު ޖަލްސާގެ ހަވާސާގައި އަރަބް ނިއުސް އަށް ދެއްވި އިންޓަވިއުއެއްގައެވެ.

Advertisement

އެ އިންޓަވިއުގައި ވަޒީރު ވިދާޅުވީ ރާއްޖޭގައި ލަގްޒަރީ ރިސޯޓުތައް ހިންގަމުން އެދަނީ ވަން ރިޒޯޓް ވަން އައިލެންޑް ކޮންސެޕްޓްގައި ކަމަށާއި އެހެން ޤައުމުތަކާ ރާއްޖޭތެ ފަތުރުވެރިކަން ތަފާތުވާ އެންމެ ބޮޑު އެއް ސަބަބަކީ އެއީ ކަމަށެވެ.

"ރިސޯޓެއް ތަރައްޤީކުރާއިރު އެ ރިސޯޓެއް ތަރައްޤީކުރާ ފަރާތަކުން އެންވަޔަރަންމަންޓަލް އެސެސްމަންޓް ރިޕޯޓެއް އެބަ ހަދަންޖެހޭ، ރިސޯޓުތަކުގަ އަމިއްލަ ނަރުދަމާ ނިޒާމު ގާއިމުވެފަ ހުންނަން ޖެހޭ، އަމިއްލައަށް ކުނި މެނޭޖު ކުރެވޭނެ ނިޒާމު ގާއިމުވެފަ ހުންނަންޖެހޭ، ވޯޓަރ ސަޕްލައި އަދި ވޯޓަރ ޕްރޮޑަކްޝަން ސިސްޓަމް ހުންނަންޖެހޭ، ހަކަތަވެސް އުފައްދަނީ އެ ރިސޯޓަކުން އަމިއްލައަށް" ވަޒީރު ވިދާޅުވިއެވެ.  

ވަޒީރު ފާހަގަކުރެއްވި ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ އެންމެ މުހިންމު އެއް ވައުދަކީ 2028 ގެ ނިޔަލަށް ރާއްޖޭގައި ބޭނުންކުރާ ހަކަތައަކީ 33 އިންސައްތައަކީ އިޢާދަކުރަނިވި ހަކަތައަށް ހެދުމުގެ ވަޢުދެވެ. އަދި އެ ވަޢުދަށް ރިސޯޓުތަކުން އަމާޒު ހިފާފައިވާކަން ފާހަގަކުރައްވައި ބަޒީރު ވިދާޅުވީ މިހާރުވެސް ބައެއް ރިސޯޓުތަކުން އުފައްދާ ހަކަތައިގެ 50 ނުވަތަ 60 އިންސައްތައަކީ އިޢާދަކުރަނިވި ހަކަތަ ކަމަށެވެ.