އަވަށްޓެރި އިންޑިއާއަކީ އަބަދުވެސް އާދަޔާ ޚިލާފު އެތައް ކަމެއް ހިނގަމުން އަންނަ ޤައުމެކެވެ. މިއީ އަނެއްކާވެސް ނިމިދިޔަ ހަފުތާގައި އިންޑިއާގެ އަހްމަދުއާބާދުގައި ހިނގި ހާދިސާއެއްގެ ވާހަކައެވެ.

އުމުރުން 28 އަހަރުގެ އަންހެނަކު ފުލުހުންނަށް ކުރި ރިޕޯޓެއްގައި ބުނެފައިވަނީ 13 އަހަރު ވާންދެން އޭނާ އިނދެގެން އުޅުނު ފިރިހެން މީހާގެ ދައްތައަކާއި ފިރިހެން މީހާގެ ފިރިހެން ދެ ކޮއްކޮއަކު ގުޅިގެން އޭނާގެ އަތް ކެކެމުންދިޔަ ތެޔޮ ތަވަޔަކަށް ލީ ކަމަށާއި އެކަން އެގޮތަށްކުރީ އިޚްލާސްތެރިކަން ޔަޤީންކުރަންކަމަށްބުނެ ކަމަށެވެ.

Advertisement

އިންޑިއާ މީޑިއާގައި ރިޕޯޓުކޮށްފައިވާގޮތުގައި ފިރިމީހާގެ ޢާއިލާގެ މެންބަރުން އެ ތެޔޮ ތަވާ ރަނގަޅަށް ހޫނު ކުރުމަށްފަހު ކެކެމުންދިޔަ ތަވަޔަށް އަތް ލުމަށް އެ އަންހެން މީހާއަށް އަމުރުކުރިއެވެ. އަދި ކޮއްޕާ އެ ތަވަޔާ ދިމާއަށް ގެންގޮސް ގަދަކަމުން އެ އަންހެން މީހާގެ އަތް ތަވަޔަށް ލިއެވެ. އަދި އަޑެއް ލައްވައިފިނަމަ އިޚްލާސްތެރިކަން ނެތީކަމަށްބުނެ އެ ތަވައިން ތެޔޮ ނަގާ އެ އަންހެން މީހާގެ ފައިގެ ފަލަމަސްގަނޑަށްވެސް އެ ތެޔޮ އެޅި ކަމަށް ބުނެފައިވެއެވެ.

މިހާރު ހޮސްޕިޓަލުގައި ފަރުވާ ހޯދަމުން އަންނަ އެ އަންހެންމީހާ ސަލާމަތްކުރީ ހަޅޭކުގެ އަޑަށް އަވަށްޓެރިންނާއި އެ އަންހެންމީހާގެ ބައްޕަ އެ ގެއަށް ގޮހެވެ.