ކުރީގެ ރައީސް، ރައީސް މައުމޫން ޢަބްދުޤައްޔޫމްގެ އަނބިކަނބަލުން ނަސްރީނާ އިބްރާހިމް ހޮސްޕިޓަލުގައި އެނދުމަތި ކުރެވި ފަރުވާ ދެމުން އަންނަކަން ހާމަކޮށްފިއެވެ.

މިކަން ހާމަކޮށްފައިވަނީ ކުރީގެ ރައީސް، ރައީސް މައުމޫންގެ އޮފީހުގެ ފަރާތުންނެވެ.

Advertisement

އެ އޮފީހުން އިއްޔެ މީޑިއާތަކަށް ފޮނުވި ނޫސްބަޔާނެއްގައި ބުނެފައިވަނީ ރައީސް އަލްއުސްތާޛު މައުމޫން ޢަބަދުލްޤައްޔޫމްގެ އަނބިކަނބަލުން އަލްފާޟިލާ ނަސްރީނާ އިބްރާހިމް އިންފެކްޝަނަކަށް ފަރުވާ ހޯއްދެއްވުމަށްޓަކައި ފާއިތުވި ހަފްތާއިން ފެށިގެން ދަރުމަވަންތަ ހޮސްޕިޓަލުގައި ވަނީ އެޑްމިޓް ކުރެވިފައި ކަމަށާއި މާތްﷲ ގެ ހެޔޮރަޙްމަތްފުޅުން މިވަގުތު އެކަމަނާގެ ހާލުކޮޅު ރަނގަޅުވަމުން އަންނަވާހަކަ އުފަލާއެކު ދަންނަވާކަމަށެވެ.

"މެޑަމް ނަސްރީނާއަށް ފަރުވާ ދެއްވުމުގައި ދަރުމަވަންތަ ހޮސްޕިޓަލުގެ ޑޮކްޓަރުންނާއި، ނަރުހުންނާއި އަދި އެހެނިހެން މުވައްޒަފުން ދައްކަވަމުން ގެންދަވާ އޯގާތެރިކަމާއި، އަޅާލުން އުފަލާއެކު ފާހަގަކުރަމު، މިކަމަށްޓަކައި ރައީސް މައުމޫން އާއި އެމަނިކުފާނުގެ ޢާއިލާ ވަރަށް ބޮޑަށް ޝުކުރުވެރިވެވަޑައިގަންނަވާ" އެ އޮފީހުން ބުނެފައިވެއެވެ.

އޭގެ އިތުރުން، ހެޔޮއެދޭ ފަރާތްތަކުންނާއި، އާންމު ރައްޔިތުންގެ ފަރާތުން ލިބެމުންދާ ހެޔޮދުޢާތަކާއި، މެސެޖުތަކުން ޢާއިލާއަށް ވަރަށް ބޮޑު ހިތްހަމަޖެހުމެއް ލިބެމުންދާތީ ހުރިހާ ބޭފުޅުންނަށް ޢާއިލާގެ ފަރާތުން ވަރަށް އިޚްލާސްތެރިކަމާއެމު ޝުކުރު ދަންނަވާކަމުގައިވެސް ބުނެފައިވެއެވެ.