އިސްރާއީލުގެ އެންމެ އިސް އަސްކަރީ ވަކީލު، ގާޒާގައި ކާބޯތަކެތީގެ އެހީ ބަހާ މަރުކަޒުތަކާ ކައިރީގައި އިސްރާއީލުގެ ސިފައިން ފަލަސްޠީނު އާންމު ރައްޔިތުންގެ ގަޔަށް ބަޑިޖެހިކަމުގެ ތުހުމަތުތަކާ ގުޅިގެން ހަނގުރާމައިގެ ޖަރީމާގެ ތަޙުޤީޤެއް ފެށުމަށް އަމުރުކޮށްފައެވެ. އިސްރާއީލުގެ ނޫސް ”ހާރެޒް“ ގައި ޝާއިޢުކޮށްފައިވާ ރިޕޯޓެއްގައި ބަޔާންކޮށްފައިވާ ގޮތުގައި، ބައެއް ސިފައިންނަށް އަންގާފައިވަނީ އާންމު ރައްޔިތުންގެ ޖަމާޢަތްތައް ރޫޅާލުމަށްޓަކައި ބަޑިޖެހުމަށެވެ. މި ހާދިސާތަކުގައި ވޭތުވެދިޔަ މަހުގެ ތެރޭގައި އެތައްސަތޭކަ މީހުނެއް ޝަހީދުވެފައިވާކަމަށް ވަނީ ރިޕޯޓުކޮށްފައެވެ.
އިސްރާއީލުގެ ސިފައިންގެ ފަރާތުން މިފަދަ އަމުރުތަކެއް ދީފައިވާކަމަށް ދެކޮޅުހަދާފައިވީ ނަމަވެސް، އެ ފަރާތުން ވަނީ ހާދިސާތައް މުރާޖަޢާކޮށް، އެހީ ދޭ ސަރަޙައްދުތަކުގެ ސަލާމަތްތެރިކަން އިތުރުކުރުމަށް މަސައްކަތްކުރަމުންދާކަން ޤަބޫލުކޮށްފައެވެ. މި ގޮތުން، ފެންސް ޖެހުމާއި ކާބޯތަކެތީގެ މަރުކަޒުތަކަށް ދެވޭ މަގުތައް އިތުރުކުރުންފަދަ ފިޔަވަޅުތައް އަޅާފައިވާކަމަށް އެ ފަރާތުން ބުނެފައިވެއެވެ. އަދި އަސްކަރީ ޤަވާޢިދުތަކާ ޚިލާފުވެފައިވާ ކޮންމެ ކަމެއް ތަޙުޤީޤުކޮށް، އެކަމަށް އެކަށީގެންވާ ފިޔަވަޅު އަޅާނެކަމަށްވެސް އިސްރާއީލުގެ ސިފައިންގެ ފަރާތުން ވަނީ ބަޔާންކޮށްފައެވެ.
ގާޒާގެ ޞިއްޙީ އިދާރާތަކުން ދީފައިވާ މަޢުލޫމާތުގެ މައްޗަށް ބިނާކޮށް، މޭ މަހުގެ ފަހުކޮޅުން ފެށިގެން އެހީ ބެހުމުގެ ސަރަޙައްދުތަކާ ކައިރީގައި 500 އަށްވުރެ ގިނަ ފަލަސްޠީނުގެ ޝަހީދުވެފައިވާކަމަށް ވަނީ ރިޕޯޓުކޮށްފައެވެ. މީގެ އިތުރުން، އެތައް ސަތޭކަ ބަޔަކަށް ޒަޚަމްވެފައިވާކަމަށްވެސް ބުނެފައިވެއެވެ.
އެމެރިކާގެ އެހީތެރިކަމާއެކު ހިންގާ ގާޒާ ހިއުމެނިޓޭރިއަން ފައުންޑޭޝަން (ޖީ.އެޗް.އެފް) އިން ބަޔާންކޮށްފައިވާ ގޮތުގައި، އެ ޖަމްޢިއްޔާގެ ވަކި ސަރަޙައްދުތަކުގައި މަރުގެ ހާދިސާތަކެއް ހިނގާފައި ނުވި ނަމަވެސް، އިސްރާއީލުން މި ރިޕޯޓުތައް ފުރިހަމައަށް ތަޙުޤީޤުކޮށް، އޭގެ ނަތީޖާތައް ޢާންމުކުރުމަށް އެ ފަރާތުން ގޮވާލާފައިވެއެވެ.
