އިރާނުގެ ފޮރިން މިނިސްޓަރު އައްބާސް އަރަޤްޗީ ވިދާޅުވެފައިވަނީ އެމެރިކާއަށް އިސްރާއީލުން އިރާނަށް ދެމުންދާ ހަމަލާތައް އެންމެ ފޯނު ކޯލަކުން ހުއްޓުވޭނެ ބާރު ލިބިގެންވާ ކަމަށެވެ.
ސޯޝަލް މީޑިއާގައި ހިއްސާކުރި ބަޔާނެއްގައި އަރަޤްޗީ ވިދާޅުވެފައިވަނީ އިސްރާއީލުން ހަމަނުޖެހުން ހިންގަމުންދާ ކަމަށާއި، އެމެރިކާގެ ރައީސް ޑޮނަލްޑް ޓްރަމްޕް މިކަމުގައި އަވަހަށް އަމަލުކުރަން ޖެހޭ ކަމަށެވެ. ”ރައީސް ޓްރަމްޕް ޑިޕްލޮމަސީއާ މެދު ސީރިއަސްކަމެއް ދެއްވާނަމަ، މިހާރު އަމަލުކުރަން ވެއްޖެ. ވޮޝިންގްޓަނުން ކުރާ އެންމެ ފޯނު ކޯލަކުން ނަތަންޔާހޫ ހިފެހެއްޓޭނެ،“ އަރަޤްޗީ ވިދާޅުވިއެވެ.
މި ބަސްފުޅުތައް އައިސްފައިވަނީ އިސްރާއީލާއި އިރާނާ ދެމެދު ހަމަނުޖެހުން އިތުރުވަމުންދާ ދަނޑިވަޅެއްގައެވެ. އަރަޤްޗީ އިންޒާރު ދެއްވާފައިވަނީ އިސްރާއީލުން އެ ޤައުމުގެ އަސްކަރީ ހަމަލާތައް ނުހުއްޓުވާނަމަ، އިރާނުން ބަދަލު ހިފުން ކުރިއަށް ގެންދާނެ ކަމަށެވެ. ”އަހަރެމެން ފިނޑިންނަށް ވަރުގަދައަށް ހަމަލާދޭނަން، ހަމަލާތައް ހުއްޓެންދެން،“ އެމަނިކުފާނު އިތުރަށް ވިދާޅުވެފައިވެއެވެ. މިގޮތަށް ވިދާޅުވެފައިވަނީ އިސްރާއީލުގެ ވެރިންނަށް އިޝާރާތްކުރައްވައެވެ.
މިހެން ވިދާޅުވެފައިމިވަނީ އިރާނުގެ އެންމެ މަތީ ވެރިޔާ އަވަހާރަކޮށްލުމަށް އިސްރާއީލުން ރާވާފައިވާ ޕްލޭނެއް ޓްރަމްޕް ވީޓޯކުރެއްވި ކަމަށް ރިޕޯޓުތައް ކޮށްފައިވަނިކޮށެވެ. އަދި އެމެރިކާއިން އިސްރާއީލާ ކައިރި ސަރަހައްދުތަކަށް އަސްކަރީ ވަސީލަތްތައް ޖަމާކޮށް، ހަމަޖެހުމަށް ގޮވާލާފައިވާ ދަނޑިވަޅެއްގައެވެ.
މި ހަނގުރާމަ އިތުރަށް ހޫނުވަމުންދާއިރު، ބައިނަލްއަޤްވާމީ އިސް ފަރާތްތަކުން މި ހަނގުރާމަ ހުއްޓާލުމަށް ގޮވާލާ ގޮވާލުންތައް އިތުރުވަމުންދެއެވެ. ނަމަވެސް ދެފަރާތުން އަދިވެސް ދަނީ އެއްބަޔަކު އަނެއްބަޔަކަށް ހަމަލާދެމުންނެވެ.
