ޗައިނާގެ ސެމިކޮންޑަކްޓަރ ސިނާޢަތް އެމެރިކާއަށް ނުހުއްޓުވުނު

ޗައިނާގެ ސެމިކޮންޑަކްޓަރ ސިނޢަތުގެ ފައިދާއާއި ކުރިއެރުން ހުއްޓުވުމުގައި އެމެރިކާ ފެއިލްވެއްޖެ އެވެ.

އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކާއެކުވެސް ޗައިނާގެ ސެމިކޮންޑަކްޓަރ މެނުފެކްޗަރިން އިންޓަނޭޝަނަލް ކޯޕަރޭޝަން (އެސްއެމްއައިސީ) އާއި ޓެކްނޮލޮޖީގެ މައި ކުންފުނި ވާވޭ އިން ޗިޕް ޓެކްނޮލޮޖީގެ ދާއިރާއިން ފާހަގަކޮށްލެވޭ ކުރިއެރުންތަކެއް ހޯދާފައިވާ ކަމަށް ޓައިވާން ސެމިކޮންޑަކްޓަރ މެނުފެކްޗަރިންގް ކޮމްޕެނީ (ޓީ.އެސް.އެމް.ސީ)ގެ ކުރީގެ ނައިބު ރައީސް ބާން ޖޭ ލިން މިވަނީ އިއުލާން ކުރައްވާފައެވެ.

ބްލޫމްބާގް އަށް ދިން އިންޓަވިއުއެއްގައި ހިއްސާކުރި ލިންގެ ވިސްނުންތަކުން ޗައިނާގެ ޗިޕް ޓެކްނޮލޮޖީ ކުރިއެރުވުމަށް މުޅިން ހުއްޓުވަން އެމެރިކާއަށް ނުކުޅެދިފައިވާ ކަން ހާމަކޮށްދެ އެވެ. އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ޓެކްނޮލޮޖީގެ ހަރުކަށި ހުރަސްތަކެއް ކުރިމަތިވި ނަމަވެސް، އެސްއެމްއައިސީއިން ވަނީ ސެމީކޮންޑަކްޓަރ އުފެއްދުމުގެ ޤާބިލުކަން ކުރިއެރުވުމުގައި ފާހަގަކޮށްލެވޭ ފަދަ ހަރުދަނާކަމާއި އުފެއްދުންތެރިކަން ދައްކުވައިދީފައެވެ.

އެސްއެމްއައިސީން ދާދި ފަހުން ވަނީ އެ ކުންފުނީގެ ސެކަންޑް ޖެނެރޭޝަން 7އެންއެމް ކްލާސް ފެބްރިކޭޝަން ޕްރޮސެސް ތަރައްގީކޮށް ބޮޑު ކާމިޔާބީއެއް ހޯދާފަ އެވެ. މި ކާމިޔާބީއާއެކު ފާހަގަކޮށްލެވޭ އުފެއްދުންތަކެއް ލިބި، ވާވޭއަށް 70 މިލިއަން ސްމާޓްފޯން ސަޕްލައި ކުރުމުގެ ޕްލޭންތައް ހެދުމުގެ ފުރުސަތު ލިބުނެވެ. މި ކާމިޔާބީގެ މައިގަނޑު މަގްސަދަކީ 7 އެންއެމް އަދި 5 އެންއެމް ކްލާސް ޕްރޮސެސް ޓެކްނޮލޮޖީ ބޭނުންކޮށްގެން ޗިޕް އުފެއްދުމުގެ ގާބިލުކަން ލިބިފައިވާ ޑީޕް އަލްޓްރާވައިލެޓް (ޑީޔޫވީ) ލިތޮގްރަފީ ސްކޭނަރެއް ކަމަށްވާ އޭއެސްއެމްއެލްގެ ޓްވިންސްކޭން އެންއެކްސްޓީ:2000އައި ލިތޮގްރަފީ ޓޫލް ބޭނުންކުރުމެވެ.

ފާހަގަކޮށްލެވޭ ގޮތުގައި މި ވަސީލަތް ޗައިނާއަށް އެކްސްޕޯޓްކުރުން ނެދަލޭންޑްސް ސަރުކާރުން ވަނީ މިއަހަރުގެ ކުރީކޮޅު މަދުކޮށްފައެވެ.

ނަމަވެސް 5އެންއެމް ކްލާސް ޕްރޮސެސް ޓެކްނޮލޮޖީތަކަށް ބޭނުންވާ ހަރުދަނާ ރިޒޮލިއުޝަން ހާސިލްކުރުމުގައި ޗިޕް އުފައްދާ ކުންފުނިތަކުން ގިނަ ފަހަރަށް މަލްޓި ޕެޓާނިން އަށް މަސައްކަތް ކުރެ އެވެ. ސެމިކޮންޑަކްޓަރ އުފެއްދުމުގައި މި މެތަޑުގެ ސަބަބުން އިތުރު ފުރިހަމަކަމާއި ތަފްޞީލުތައް ލިބިގެންދާއިރު، މިކަމުގެ ސަބަބުން ކޮންމެ ވެފަރއަކަށް ލިބޭ އުފެއްދުންތައް މަދުވުމާއި ޗިޕް އުފެއްދުން މަދުވުން، ޢާންމުގޮތެއްގައި އިޤްތިޞާދީ ވިސްނުމުގެ ސަބަބުން ބޭނުންކުރުން މަދުވުން ފަދަ ގޮންޖެހުންތައް ކުރިމަތިވެއެވެ.

އެސް.އެމް.އައި.ސީ.އަށް ޒަމާނީ ފެންވަރުގެ ލިތޮގްރަފީ ޓޫލްސް ލިބުން މަދުވުމުގެ ސަބަބުން ބޭނުންވާ ރިޒޮލިއުޝަންތައް ހާސިލްކުރުމަށް މަލްޓި ޕެޓާނިން ބޭނުންކުރަން މަޖުބޫރުވިއެވެ. ފާހަގަކޮށްލެވޭ ގޮތުގައި އެ ކުންފުނިން ވާވޭއަށް ބަލައިގަނެވޭ ފަދަ އުފެއްދުންތަކެއް ހާސިލްކޮށްފައިވާއިރު، ޗައިނާގެ ސެމިކޮންޑަކްޓާ ސެކްޓާއާ ދެކޮޅަށް އެމެރިކާ ސަރުކާރުން އަޅާފައިވާ ދަތިކުރުމުގެ ފިޔަވަޅުތަކުގެ އަސަރު ހުރިކަމާ މެދު ސުވާލު އުފެދެ އެވެ.

މިކަންކަމާ ގުޅިގެން ލިން ލަފާ ދެއްވަނީ ޗައިނާގެ ކުރިއެރުމަށް ހުރަސް އެޅުމުގެ ބަދަލުގައި ޗިޕް ޑިޒައިންގައި ލީޑާޝިޕް ދެމެހެއްޓުމަށް އެމެރިކާގެ ސަމާލުކަން ބަދަލުކުރަން ޖެހޭ ކަމަށެވެ. އަދި ޗައިނާގެ ޗިޕް އިންޑަސްޓްރީ ކުރިއެރުވުމަށް ޗައިނާއިން ކުރާ މަސައްކަތަކީ ދެބަސްވެވެން ނެތް ކަމެއް ކަމަށާއި، މި ކުރިއެރުން ކުޑަކުރުމަކީ ބޭކާރު މަސައްކަތެއް ކަމަށާއި އެކަމުގެ ސަބަބުން ދުނިޔޭގެ އިގްތިސާދީ ގޮތުން ބޮޑެތި ގެއްލުންތަކެއް ކުރިމަތިވެދާނެ ކަމަށް އޭނާ ފާހަގަކުރެއްވި އެވެ.

ޝައުގުވެރިވާ ކަމަކީ އެމެރިކާގެ ދަތިކުރުމުގެ ފިޔަވަޅުތަކުގެ ސަބަބުން ޓީއެސްއެމްސީއަށް ޗައިނާގެ ބައެއް ފަރާތްތަކާ ގުޅުން ބަދަހިކުރުން މަނާކޮށް، ނޭނގި އެސްއެމްއައިސީއަށް ފުރުސަތުތައް ތަނަވަސްވެފައިވާ ކަމެވެ. ޓީ.އެސް.އެމް.ސީ.އަށް ދަތިތަކާ ކުރިމަތިލާން ޖެހުމުން، އެސް.އެމް.އައި.ސީއިން ވަނީ އެކުންފުނީގެ އުފެއްދުންތެރިކަމުގެ ޓެކްނޮލޮޖީއާއި ޓެކްނޮލޮޖީގެ ޤާބިލުކަން އިތުރުކުރުމަށް މަގުފަހިކޮށްދީ، އެކަށީގެންވާ އޯޑަރުތައް ކެޕިޓަލައިޒްކުރުމަށް މަސައްކަތްކޮށްފައެވެ.

ދުނިޔޭގެ ބާރުތަކުގެ މެދުގައި މިހާރު ހިނގަމުންދާ ސެމިކޮންޑަކްޓަރ ވާދަވެރިކަން ކުރިއަރަމުން އަންނައިރު، ޓެކްނޮލޮޖީގެ ކުރިއެރުންތަކުގެ އިތުރުން އިޤްތިޞާދީ ގޮތުންނާއި ޖިއޮޕޮލިޓިކަލް ގޮތުން ވެސް ބޮޑެތި އަސަރުތަކެއް ކުރެއެވެ.