ގދ. ތިނަދޫ ނެރުމައްޗަށް މަސް ދޯންޏެއް އުރިއްޖެ

ގދ. ތިނަދޫ ނެރުމައްޗަށް ދޯންޏެއް އެރުމާ ގުޅިގެން އެމްއެންޑީއެފް ސަދަން އޭރިއާ ކޯސްޓްގާޑު ސްކޮޑްރަންއިން އެހީތެރިކަން ފޯރުކޮށްދީފިއެވެ.

އެމްއެންޑީއެފުން ބުނެފައިވާގޮތުގައި "ފަހިމަގު" ނަމަކަށް ކިޔާ މަސް ދޯންޏެއް، ގދ. ތިނަދޫ ނެރުމައްޗަށް އަރައިގެން އެމްއެންޑީއެފް ކޯސްޓްގާޑުގެ އެހީތެރިކަމަށް އެދިފައިވަނީ ރޭ 20:40 ހާއިރުއެވެ.

ހާދިސާގެ ރިޕޯޓް ލިބުމާއެކު އެމްއެންޑީއެފް ސަދަން އޭރިއާ ކޯސްޓްގާޑު ފޯތު ސްކޮޑްރަންގެ ސިފައިން ވަނީ އެ ސަރަހައްދަށް ގޮސް، ދޯނީގެ ނަގިލި ލުމުގައި އެހީތެރިކަން ފޯރުކޮށްދީފައި ކަމަށާއި އަދި ދިޔަވަރު ބޮޑުވުމުން ދޯނި ފުންކުރުމުގެ މަސައްކަތް ފަށައި، ރޭ 01:10 ހާއިރު އެ ދޯނި ވަނީ ފުންކުރެވިފައި ކަމަށް އެމްއެންޑީއެފުން ބުނެފައިވެއެވެ.

އިތުރަށް ބުނެފައިވަނީ މިހާދިސާ ހިނގިއިރު އެ ދޯނީގައި 15 މީހުން ތިބި ކަމަށާއި އަދި އެންމެންގެ ހާލު ވެސް ރަނގަޅު ކަމަށެވެ.