އެމްއާރްއެމްގެ ރިޔާސީ ޕްރައިމަރީގައި ވާދަކުރައްވަން ފާރިސް ފޯމު ހުށަހަޅައިފި

މޯލްޑިވްސް ރިފޯމް މޫވްމަންޓް (އެމްއާރްއެމް) އިން ރިޔާސީ އިންތިހާބާއި ދިމާކޮށް އެ ޕާޓީން ކެނޑިޑޭޓެއް ނެރުމަށް ބާއްވާ ޕްރައިމަރީގައި ވާދަ ކުރައްވަން ފާރިސް މައުމޫން ފޯމު ހުށަހަޅުއްވައިިއެވެ.

އެ ޕާޓީން ވަނީ ރިޔާސީ އިންތިހާބަށް ކެނޑިޑޭޓަކު ނެރުމަށްޓަކައި ޕްރައިމަރީއަކަށް ހުޅޫވާލާފައެވެ. އަދި ފޯމު ހުށަހެޅުމުގެ ފުރުސަތު ހަމަވާނީ މިއަދުހަވީރު 04:00 އަށެވެ.

https://twitter.com/MRM_Office/status/1684479975985135616

“އިންތިހާބަށް ކުރިމަތިލުމަށް އެދޭ ފޯމު ފުރިހަމަކުރުމަށްފަހު ޕާޓީ އޮފީހަށް ހުށަހެޅުން އެދެން” ލިޔެކިޔުންތައް އެ ޕާޓީގެ ވެބްސައިޓްގައި ހުންނާނެކަން ހާމަކޮށް އެމްއާރްއެމްއިން ބުނެފައިވެއެވެ.

އެ ޕާޓީން އިންތިހާބަށް ފާރިސް ނެރެން އުޅޭކަން މީގެ ކުރިން ވަނީ ނުރަސްމީކޮށް ކަށަވަރު ކޮށްދީފައެވެ.

އެގޮތުން އެމްއާރްއެމްގެ ސެކްރެޓަރީ ޖެނެރަލް އަބްދުލްއަލީމް އާދަމް “ދުވަސް”އަށް ވިދާޅުވީ ރަސްމީކޮށް އެކަން އިއުލާނު ނުކުރި ނަމަވެސް ނުރަސްމީކޮށް އެކަން ނިންމާފައިވާ ކަމަށެވެ.

ޕާޓީގެ މެމްބަރުން ހަމަ ނޫންކަމަށް އީސީން ބުނާ ނަމަވެސް، މެމްބަރުން ހަމަވާނެ ކަމަށާއި އެ މައްސަލަ މިހާރު ކޯޓަށް ހުށަހަޅާފައި ވާކަމަށް އަލީމް ވިދާޅުވިއެވެ. އަދި އެ މައްސަލަ މިހާރު ޝެޑިއުލް ކުރަން ކައިރިވެފައި ވާނެ ކަމަށް އަލީމް ވިދާޅުވިއެވެ.

އެމްއާރްއެމްގައި މިވަގުތު ތިބީ 2،892 މެންބަރުން ކަމަށް އީސީގެ ލިސްޓުގައިވެއެވެ.

އެކަމާ ގުޅިގެން އެމްއާރްއެމްގެ ރަޖިސްޓްރަރ އަދި އެންވަޔަރަންމެންޓް މިނިސްޓްރީގެ ޑެޕިއުޓީ މިނިސްޓަރ ފާތިމަތު ޝަހީދާ ވިދާޅުވެފައި ވަނީ އިލެކްޝަންސް ކޮމިޝަނުން ބޭނުންވާއިރަށް ސައްހަ ނޫން މައުލޫމާތު މީޑިޔާތަކަށް ދީގެންވެސް ޕާޓީތަކުގެ އަގު ވައްޓާލެވޭ ކަމަށެވެ. އަދި މިއީ ޒިންމާދާރު މިނިވަން މުއައްސަސާގެ ދައުރުތޯ އޭނާ ވަނީ ސުވާލު އުފައްދާފައެވެ.

“ހުށައަޅާފައި ހުންނަ ފޯމު ޕްރޮސެސް ނުކޮށް ރައްޔިތުންނަށް ކޯޗެއް އޮޅުވާލަންތޯ ތިޔަ ޓުވީޓް ކުރައްވަނީ” ޝަހީދާ ވިދާޅުވިއެވެ.

އެމްއާރްއެމްގެ ފަރާތުން ފާރިސަށް ވާދަ ނުކުރެވޭނަމަ އަމިއްލަ ގޮތުންވެސް ވާދަ ކުރައްވާނެކަން “ދުވަސް” އަށް ވަނީ ކަށަވަރު ވެފައެވެ.