މެންޗެސްޓަރ ސިޓީގެ ތަރި ސްޓްރައިކަރު އަރލިންގ ހާލަންޑް އޭނާގެ ކެރިއަރުގެ 300 ވަނަ ގޯލް ޖަހައި، މުހިންމު މައިލްސްޓޯނެއް ހާސިލުކޮށްފިއެވެ. މި ގޯލު ޖެހީ ކެމްޕިއަންސް ވޯލްޑް ސްޓޭޑިއަމްގައި ބޭއްވުނު ކްލަބް ވޯލްޑް ކަޕްގެ ގްރޫޕް މަރުހަލާގެ މެޗެއްގައި މެންޗެސްޓަރ ސިޓީން ޖުވެންޓަސްއާ ދެކޮޅަށް ކުޅެ، 5-2 އިން މޮޅުވި މެޗުގައެވެ.
މި މޮޅުވުމާއެކު މެންޗެސްޓަރ ސިޓީން ގްރޫޕް ޖީގެ އެއްވަނަ ހޯދައި، މުބާރާތުގެ ގަދަ 16އިގެ ބުރުގައި ކުރިމަތިލާނީ ސައުދީ އަރަބިއާގެ އަލް-ހިލާލާއެވެ. މެންޗެސްޓަރ ސިޓީގެ މެނޭޖަރު ޕެޕް ގާޑިއޯލާ ޓީމުގެ މުޅި ކުޅުމަށް ތަޢުރީފުކޮށް، މިއީ ފާއިތުވި މަސްތަކުގައި އެމީހުން ދެއްކި އެންމެ ފުރިހަމަ ކުޅުންތަކުގެ ތެރެއިން އެކެއް ކަމަށް ފާހަގަކުރިއެވެ.
މެންޗެސްޓަރ ސިޓީގެ ގޯލުތައް ޖެހީ ޖެރެމީ ޑޮކޫ، ޕިއޭރ ކަލޫލޫގެ ބައިކޮޅަށް ޖެހި ގޯލެއް، އަރލިންގ ހާލަންޑް، ފިލް ފޯޑެން، އަދި ޖޫލިއަން ސަވިންހޯގެ 20 ޔާޑުގެ ހައިރާންކުރުވަނިވި ޝޮޓަކުންނެވެ. ޖުވެންޓަސްގެ ފަރާތުން ޓިއުން ކޫޕްމޭނަރސް އަދި ޑުޝަން ވްލާހޮވިޗް ގޯލު ޖެހި ނަމަވެސް، ގިނަ ވަގުތު ކުޅުނީ ބަލިކަށިކޮށެވެ.
މި މެޗުގައި ރޮޑްރީ ވެސް ދިގު މުއްދަތެއްގެ އިންޖަރީއަކަށްފަހު އަނބުރާ ފުރަތަމަ އެގާރައަށް އައިސް، 65 މިނެޓު ކުޅެފައިވާތީ ގާޑިއޯލާއަށް ބޮޑު ހިތްހަމަ ޖެހުމެއް ލިބިފައިވެއެވެ.
ހާލަންޑްގެ މައިލްސްޓޯން އައީ މަތިއޫސް ނޫނެސްގެ އެހީތެރިކަމާއެކު ބޯޅަ ތަންކޮޅެއް ފުންމާލައިގެން ޖެހި ގޯލަކުންނެވެ. މިއާއެކު އުމުރުން އެންމެ 24 އަހަރުގައި އޭނާގެ ކެރިއަރ ގޯލުގެ އަދަދު 300 އަށް އަރައިފިއެވެ.
"300 ގޯލަށް މަރުހަބާ - ފާހަގަކޮށްލަންޖެހޭ ކަމެއް ނޫންތޯ؟ އޭނާގެ މެނޭޖަރަށް ޖެހުނީ އެންމެ 11 ގޯލު." ގާޑިއޯލާ ސަމާސާ ކުރަމުން ބުނެފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް