"ކާންދޭ އަތުގައި ދަތް ނޭޅުމަށް" ގޮވާލާ ރެމް އިން އަނެއްކާވެސް މުޒާހަރާއަށް

"ކާންދޭ އަތުގައި ދަތް ނޭޅުމަށް" ގޮވާލައި، ރެސްޓޯރެންޓް އެސޯސިއޭޝަން އޮފް މޯލްޑިވްސް (ރެމް) އިން އަނެއްކާވެސް މާދަމާ އިހުތިޖާޖަށް ނިކުންނަން ނިންމައިފިއެވެ.

މި އިހުތިޖާޖު އޮންނާނީ މާދަމާ ހަވީރު 04:00 ގައި ކާނިވާ ސަރަހައްދުގައެވެ.

ރެމްގެ މި އިހުތިޖާޖަކީ ކޯވިޑް-19 ހުއްޓުވުމަށް ސަރުކާރުން އަޅާފައިވާ ފިޔަވަޅުތަކުގެ ސަބަބުން ރެސްޓޯރަންޓުތަކަށް ދިމާވެފައިވާ ދަތިތަކާ ގުޅިގެން ބައްވާ އިހުތިޖާޖެކެވެ. ހާއްސަކޮށް ކާފިއު ވަގުތުތަކުގައެވެ.

މީގެ ކުރިންވެސް މި ޖަމިއްޔާއިން މި މައއްސަލައިގަ މުޒާހަރާ ކޮށްފައިވެ އެވެ.

މާލޭގައި މިހާރު ކާފިއު ގަޑިއަކީ އިރުއޮއްސި 6:00އިން ފެށިގެން ފަތިހު 4:00އަށެވެ. ކާފިއު ވަގުތުތަކުގައި ދެވޭނީ ހަމައެކަނި ޑެލިވަރީ ޚިދުމަތެވެ.

އެކަމަކު ހެނދުނު 8:00އިން ފެށިގެން އިރުއޮއްސި 6:00އާ ހަމައަށް ފުލުހުންގެ ހުއްދައާއެކު ފިހާރަތަކުން ވިޔަފާރިކުރުމާއި ކެފޭ ރެސްޓޯރެންޓުތަކުން ޓޭކްއަވޭ ނެގުމުގެ ފުރުސަތު ލިބެއެވެ. މިގަޑިތަކުގައި ބޭރުގައި އުޅުމަށް ބޭނުންކުރާނީ މިހާރު މެންދުރު 12:00އިން ހަވީރު 4:00އާ ހަމައަށް، ގެއިންބޭރުގައި އުޅުމަށް ގޭބިސީތަކަށް ފުލުހުން ދޫކުރާ ފާސް އެވެ.

ކޯވިޑް-19އާއެކު އަޅާފައިވާ ފިޔަވަޅުތަކުގެ ސަބަބުން ޢާއްމުންނަށާއި ވިޔަފާރިތަކަށް ގިނަ ދަތިތަކެއް އަންނަނީ ކުރިމަތިވަމުންނެވެ. މިކަމަށް ކޮންމެވެސްވަރެއްގެ ޙައްލެއް ގެނައުމަށްޓަކައި ކުރިއަށްއޮތް ދެހަފްތާގެ ތެރޭގައި އިތުރު ލުއިތަކެއް ދިނުމަށް ނިންމާފައިވާކަމަށް އެޗްއީއޯސީން ބުނެއެވެ.