ކުރީގެ ޑިފެންސް މިނިސްޓަރު ކާނަލް ރިޓަޔަޑް މުހައްމަދު ނާޒިމްގެ މައްޗަށް 11 އަހަރުގެ ޖަލު ހުކުމެއް ރޭ އިއްވާފައިވާއިރު ނާޒިމްގެ ބޭސްތަކާ ހަވާލުވާން ކަރެކްޝަނަލް ސާވިސް އިން ދެކޮޅު ހަދާ ކަމަށް ނާޒިމްގެ ވަކީލުންގެ ޓީމުން ބުނެފި އެވެ.
ވަކީލުންގެ ޓީމުން މިހެން ބުނެފައިވަނީ އެ ޓީމުގެ ޓްވިޓާ އެކައުންޓުން ދެންމެ ކުރި ޓްވީޓެއްގަ އެވެ. އެ ޓްވީޓްގައި ބުނެފައިވަނީ ނާޒިމްގެ ބޭސްތަކާ ކަރެކްޝަންސް އިން ހަވާލު ނުވަނީ އެ ބޭސްތަކުގެ "ޕްރިސްކްރިޕްޝަންސް" ނެތް ކަމަށްބުނެ ކަމަށެވެ. އަދި ނާޒިމްގެ ބޭސްފަރުވާގެ ހުރިހާ ލިޔެކިޔުމެއް ހުރީ ފުލުހުންގެ އަތުގައި ކަމަށް ވަކީލުންގެ ޓީމުން ބުނެފައި ވެ އެވެ. އަދި ކުރިއަށް ދެން އޮތީ ކޮންކަމެއް ކަމާމެދު ވަކީލުންގެ ޓީމުން ސުވާލު އުފައްދާފައި ވެ އެވެ.
https://twitter.com/nazimlegalteam/status/581396679389097984
ނާޒިމްގެ މައްޗަށް ދައުލަތުން އުފުލާފައިވާ ނުރައްކާތެރި ހަތިޔާރު އެތެރެކޮށް ގެންގުޅުމުގެ ދައުވާގައި ހުކުމް އިއްވުމަށް ރޭ ބޭއްވި ޝަރީއަތުގައި އޭނާގެ މައްޗަށް ކުށް ސާބިތުވާކަމަށް މައްސަލަ ބެއްލެވި ތިން ފަނޑިޔަރުންގެ އިއްތިފާގުން ކަނޑައަޅާފައިވަނީ އެ އެޕާޓްމަންޓުން ފެނުނު ހަތިޔާރަކީ ނާޒިމްގެ އެއްޗެހި ނޫންކަން ކޯޓުގައި އޭނާއަށް ސާބިތުކޮށްދެވިފައި ނުވާ ކަމަށް ބުނެ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް