މެޒޯ މޯޑްގެ ލަވަތައް ހިމެނޭ ދިވެހި ސީޕީއާރު ޕްލޭލިސްޓެއް ނެރެފި

ހިތުގެ ބަލީގައި މީހަކު ވެއްޓޭ ވަގުތު ސީޕީއާރު ދޭއިރު ބޭނުންކުރެވޭ ދިވެހި ލަވަތަކުގެ ޕްލޭލިސްޓެއް، މެޒޯ މުހައްމަދުގެ ތިން ލަވައާ އެކު، ދިވެހި ރެޑް ކްރެސެންޓް (އެމްއާރުސީ) އާއި ޓައިނީ ހާޓްސް އޮފް މޯލްޑިވްސް (ޓީއެޗްއެމް) ގުޅިގެން މިއަދު އާންމުކޮށްފިއެވެ.

އެވިޑް ކޮލެޖުގައި ބޭއްވި ހަރަކާތެއްގައި މި ޕްލޭލިސްޓް ނެރުމާ އެކު، ދެ ޖަމިއްޔާ ގުޅިގެން "ހިތްވަރުގަދަ" ނަމުގައި ހިތުގެ ސިއްހަތާއި ފުރާނަ ސަލާމަތްކުރުމަށް ހާއްސަ ކެމްޕެއިނެއް ވެސް ފެށީ ދުނިޔޭގެ ރީސްޓާޓް އަ ހާޓް ޑޭ 2026 އާ ގުޅުވައިގެންނެވެ. ކެމްޕެއިން ރަސްމީކޮށް އިފުތިތާހުކޮށްދެއްވީ އެމްއާރުސީގެ ރައީސް އަލީ ނާޝިދާއި ޓީއެޗްއެމްގެ ބާނީން ކަމުގައިވާ ހިޝްމަތު ފައިޒް އަދި އަލީ މުއާޒެވެ.

ދިވެހި ސީޕީއާރު ޕްލޭލިސްޓަކީ ސީޕީއާރު ދޭއިރު ބޭނުންކުރަން ލަފާ ދީފައިވާ މިނެޓަކު 100 އިން 120 ބީޓާ ދިމާވާ ރާގު ހުރި ދިވެހި ލަވަތައް ހިމެނޭ ކަލެކްޝަނެކެވެ. ސްޓްރޯކެއް ޖެހިގެން ނިޔާވި، ރާއްޖޭގެ އެންމެ ލޯބި ލިބުނު ފަންނާނުންގެ ތެރޭގައި ހިމެނޭ މެޒޯ މުހައްމަދުގެ "ރޯއަނު އެހެދުރު"، "އަކިރި ދެމޭ"، "މަސްތު" މި ތިން ލަވައަކީ ޕްލޭލިސްޓްގެ ފުރަތަމަ ތިން ލަވައެވެ. އެ ލަވަތައް މި ބޭނުމަށް ހިމެނުމުގެ ހުއްދަ ދެއްވީ އޭނާގެ އާއިލާއިންނެވެ.

އޭނާގެ އާއިލާއިން ހާމަކޮށްފައިވާ ގޮތުގައި، ބެލުންތެރިންގެ ދިރިއުޅުމާ ގުޅިފައިވާ އެ ލަވަތައް މިހާރު ފުރާނަ ސަލާމަތްކުރުމަށް މަގުފަހިވާ ވަސީލަތަކަށް ވުމަކީ ފުން މާނައެއް ދޭ ކަމެއް ކަމަށެވެ. ކުއްލި ސިއްހީ ހާދިސާއެއްގައި ލޯބިވާ މީހަކު ގެއްލިފައިވާ އާއިލާއެއްގެ ހައިސިއްޔަތުން، މެޒޯ މުހައްމަދުގެ ލަވަތައް މެދުވެރިކޮށް ގިނަ ބަޔަކު ސީޕީއާރު ދަސްކޮށް، ފުރާނަ ސަލާމަތްކުރުމުގެ އަމަލުން އޭނާގެ ލެގަސީ ކުރިއަށް ގެންދިއުމަކީ އާއިލާގެ އެދުމެކެވެ.

"ހިތްވަރުގަދަ" ކެމްޕެއިނުގެ ޝިއާރަކީ "ސްޓްރޯންގް ހާޓް، ރެޑީ ހޭންޑްސް" ނުވަތަ ވަރުގަދަ ހިތެއް، ތައްޔާރަށް ތިބި އަތްތަކެކެވެ. މި ކެމްޕެއިން ބިނާވެފައި އޮތީ ތިން ތަނބެއްގެ މައްޗަށެވެ: ހިތުގެ ސިއްހަތާ މެދު ހޭލުންތެރިކަން އިތުރުކުރުމާއި، ސީޕީއާރު ދޭން ދަސްކޮށްދީ މުޖުތަމައުތައް ތައްޔާރުކުރުމާއި، އޭއީޑީ ފަދަ ވަސީލަތްތައް ފޯރުކޮށްދީ ހިތާ ގުޅޭ ކުއްލި ހާލަތްތަކަށް ތައްޔާރު މުޖުތަމައުތައް ބިނާކުރުމެވެ.

ރާއްޖޭގައި ހިތާއި ލޭ ހޮޅީގެ ބަލީގެ ސަބަބުން ކޮންމެ ތިން މަރުގެ ތެރެއިން ގާތްގަނޑަކަށް އެއް މީހަކު ނިޔާވާ ކަމަށާއި، ބޮޑެތި މީހުންގެ ތެރެއިން ގާތްގަނޑަކަށް ތިންބައިކުޅަ އެއް ބައި މީހުން ލޭ މައްޗަށް ދިއުމުގެ މައްސަލައާ ކުރިމަތިލާ ކަމަށް އެ ނޫސް ބަޔާނުގައި ފާހަގަކޮށްފައިވެއެވެ. ގިނަ ރަށްތަކެއްގައި މީހުން ދިރިއުޅޭ ރާއްޖެ ފަދަ ގައުމެއްގައި ކުއްލި ފަރުވާ ލިބުމަށް ވަގުތު ނެގުމަކީ ކައިރީގައި ތިބޭ މީހުންގެ ދައުރު އިތުރަށް މުހިންމުވާ ސަބަބެއް ކަމަށް ވެސް ބުނެފައިވެއެވެ. ދެ ޖަމިއްޔާއިން ވެސް ވީހާ ގިނަ ދިވެހި ފަންނާނުން ޕްލޭލިސްޓަށް ލަވަ ހުށަހެޅުމަށް ހިތްވަރު ދީފައިވެއެވެ.