ސިއްހީ ދާއިރާއާއި ތައުލީމީ ދާއިރާއިން ދިވެހިރާއްޖެ އާއި ކިއުބާއާ ދެ ގައުމުގެ ދޭތެރޭ އޮތް ގުޅުން އިތުރަށް ވަރުގަދަ ކުރެވިދާނެ ގޮތްތަކާ ބެހޭގޮތުން މަޝްވަރާކޮށްފި އެވެ.
މިމަޝްވަރާތައް އޮތީ ކިއުބާ ސަރުކާރުން ރާއްޖެއަށް ކަނޑައެޅުއްވި އާ ސަފީރު، ފްލޮރެންޓީނޯ ބަޓިސްޓާ ގޮންޒާލޭޒް، އޭނާގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ އަބްދުﷲ ޔާމިނަށް އެރުއްވުމަށް މިއަދު ރައީސް އޮފީހުގައި އޮތް ރަސްމިއްޔާތަށްފަހު ދެ ބޭފުޅުން ބޭއްވި ބައްދަލުކުރެއްވުމުގައި އެވެ.
ރައީސް އޮފީހުން ބުނީ މިބައްދަލުވުމުގައި ދިވެހިރާއްޖެއާއި ކިއުބާއާ ދެ ގައުމުގެ ދެމެދުގައި އޮތް ގުޅުމާއި، އެގުޅުން އިތުރަށް ބަދަހިކުރެއްވުމާ ގުޅޭގޮތުން ދެބޭފުޅުން މަޝްވަރާ ކުރެއްވި ކަަމަށެވެ. ހާއްސަކޮށް ސިއްހީ އަދި ތައުލީމީ ދާއިރާއިން ގުޅުން ބަދަހިކުރެވިދާނެ ގޮތްތަކާއި މެދު ދެ ބޭފުޅުން މަޝްވަރާކުރެއްވި ކަމަށެވެ.
މީގެ އިތުރަށް ކުދި ގައުމުތަކުގެ ހައިސިއްޔަތުންް ދިވެހިރާއްޖެއާއި ކިއުބާއަކީ ތިމާވެށީގެ ގޮތުންނާއި، ބައިނަލްއަގްވާމީ ސިޔާސީ މަސްރަހުގައި ވަރަށް އެއްގޮތް ގޮންޖެހުންތަކެއް ދިމާވެފައިވާ ދެ ގައުމުކަން ދެބޭފުޅުންގެ މަޝްވަރާތަކުގައި ފާހަަގަކުރެއްވި އެވެ. އެގޮތުން އިންސާނީ ހައްގުތައް ހިމާޔަތްކުރުމަށާއި، ޖައްވު ހޫނުވުމުގެ ސަބަބުން ދިމާވެފައިވާ ތިމާވެށީގެ މައްސަލަތައް ދުނިޔޭގެ ސަމާލުކަމަށް ގެނައުމަށްޓަކައި ދިވެހިރާއްޖެއިން އަދާކުރާ މުހިއްމު ރޯލު ފާހަގަކުރައްވައި، އެކަމަށްޓަކައި ކިއުބާގެ ސަފީރު ދިވެހި ސަރުކާރަށް ތައުރީފުކުރެއްވި ކަމުގައިވެސް ރައީސް އޮފީހުން ބުނެ އެވެ.
މި ބައްދަލުކުރެއްވުމުގައި މިނިސްޓަ އޮފް ފޮރިން އެފެއާޒް ދުންޔާ މައުމޫން ބައިވެރިވެވަޑައިގެންނެވި އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް