ކުދި އަދި މެދުފަންތީގެ ވިޔަފާރިތަކަށް ތިން މަސްތެރޭގައި ޓެކްސް ލުޔާއި ޑޮލަރު ލިބޭނެ ގޮތް ހަދައިދޭނަން: ރައީސް

ކުދި އަދި މެދުފަންތީގެ ވިޔަފާރިތަކަށް ޓެކްސް ލުޔާއި ޑޮލަރު ލިބޭނެ ގޮތް ހިމެނޭ ފުރުޞަތުތަކެއް ކުރިއަށް އޮތް ތިން މަހުގެ ތެރޭގައި ތަޢާރަފުކުރާނެ ކަމަށް ރައީސުލްޖުމްހޫރިއްޔާ ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ރޭ ބޭއްވި "މޯލްޑިވްސް އެކްސްޕޯ 2026" ގެ އިނާމު ދިނުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

ބާސެލޯ ނަސަންދުރާގައި ބޭއްވި ރަސްމިއްޔާތުގައި ރައީސް، ނޮވެމްބަރު މަހާއި 2027 ވަނަ އަހަރުގެ ޖެނުއަރީ މަހާ ދެމެދު ތަންފީޒުކުރައްވަން ރާވާފައިވާ ކަންކަމުގެ ތަފްސީލު ހާމަކޮށްދެއްވި އެވެ.

އެގޮތުން ނޮވެމްބަރު 1 އިން ފެށިގެން ދުނިޔޭގެ ކޮންމެ ހިސާބަކުން ވިޔަފާރިކުރި ނަމަވެސް، ބޭންކް އޮފް މޯލްޑިވްސް ގޭޓްވޭގެ ތެރެއިން އެ ވިޔަފާރިތަކަށް އެމެރިކާ ޑޮލަރުން ފައިސާ ލިބޭނެ ކަމަށް އެމަނިކުފާނު ވިދާޅުވިއެވެ. އެ ޑޮލަރު، ރެމިޓެންސް މެދުވެރިކޮށް ބޭރުން މުދަލާއި ޚިދުމަތް ގަތުމަށް ބޭނުންކުރެވޭނެ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

ޖެނުއަރީ 1 އިން ފެށިގެން އެ ދާއިރާއަށް ޚާއްޞަ ޓެކްސް-ފްރީ ޒޯންތަކެއް ޤާއިމުކުރާނެ ކަމަށާއި، ތިން އަހަރަށް ހިންގާ ފުރަތަމަ ޕައިލެޓް ޕްރޮޖެކްޓް ފަށާނީ އައްޑޫ ސިޓީގައި ކަމަށް އެމަނިކުފާނު ވިދާޅުވިއެވެ. އެ ޒޯނުގައި ސަރުކާރުން ދޫކުރާ ބިމަށް ފުރަތަމަ އަހަރު ކުލި ނުނެގޭނެއެވެ. އަދި އިންކަމް ޓެކްސް މަޢާފުކޮށް، ކޯޓާގެ ލުޔެއް 20 އިން 30 އަށް ދެވޭނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.

ސަރުކާރުން ވިޔަފާރިތަކަށް ދައްކަންޖެހޭ ފައިސާއިން، އެ ވިޔަފާރިތަކުން ސަރުކާރަށް ދައްކަންޖެހޭ ޓެކްސް ކަނޑައިދެވޭނެ ގޮތް ހަމަޖެހިފައިވާ ކަމަށްވެސް އެމަނިކުފާނު ވިދާޅުވިއެވެ. ޖީއެސްޓީއަށް ރަޖިސްޓްރީކުރަން ޖެހޭ ތްރެޝޯލްޑް، ޖެނުއަރީ 1 އިން ފެށިގެން 1 މިލިއަން ރުފިޔާއިން 1.5 މިލިއަން ރުފިޔާއަށް އިތުރުކުރާނެއެވެ. އެ ތާރީޚުން ފެށިގެން އުފެއްދުމަށް އެތެރެކުރާ ރޯ މެޓީރިއަލުގެ އިމްޕޯޓް ޑިއުޓީ ސުމެއް ޕަސެންޓަށް ދަށްކުރަން ނިންމާފައިވާ ކަމަށާއި، މިކަންކަމަށް ބޭނުންވާ ޤާނޫނީ ބަދަލުތަކުގެ މަސައްކަތް ކުރަމުންދާ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

ޒުވާން ވިޔަފާރިވެރިންނަށް ދޫކުރާ ލޯނު ސްކީމުގެ ދެވަނަ ފިޔަވަހި ނޮވެމްބަރު މަހު ފަށާނެ ކަމަށް އެމަނިކުފާނު ވިދާޅުވިއެވެ. ނުކުޅެދުންތެރިކަން ހުންނަ ފަރާތްތަކަށް އިޤްތިޞާދުގައި ބައިވެރިވުމުގެ ހަމަހަމަ ފުރުޞަތު ފަހިކޮށްދޭނެ ކަމަށާއި، ޖިސްމާނީ ނުވަތަ އެހެން ޙާލަތެއްގެ ސަބަބުން އެއްވެސް މީހެއްގެ ފުރުޞަތަށް ހުރަސް އެޅުމަށް ޖާގަ ނުދެވޭނެ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

ރަސްމިއްޔާތުގައި ރައީސުލްޖުމްހޫރިއްޔާ ފަސް ޝަރަފުވެރި ރަނާއި ޚާއްޞަ އިނާމު ހަވާލުކުރެއްވިއެވެ. އަމިއްލަ ފަރުދުންގެ ވިޔަފާރި، ޖަމްޢިއްޔާ ޖަމާޢަތް، ޚާއްޞަ އެހީއަށް ބޭނުންވާ ފަރާތްތައް، ތަޢުލީމުދޭ މަރުކަޒު އަދި ސަރުކާރުގެ ކުންފުނިތަކުގެ ދާއިރާތަކުން ފުރަތަމަ ވަނަ ހޯދި ފަރާތްތަކަށް އިނާމުތައް ހަވާލުކުރެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދެވެ.

އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ މިނިސްޓްރީއާއި ބިޒްނަސް ސެންޓަރ ކޯޕަރޭޝަން (ބީސީސީ) ގުޅިގެން ބާއްވާ މި އެކްސްޕޯ، ހަތް ޑިސްޓްރިކްޓެއް ހިމެނޭ ގޮތަށް ހުޅުމާލޭ ސެންޓްރަލް ޕާކުގައި ނުވަ ދުވަހު ކުރިއަށްދާނެއެވެ. އެ އެކްސްޕޯ ރަސްމީކޮށް ހުޅުވާނީ އޮކްޓޫބަރު 25 ވާ އާދީއްތަ ދުވަހުގެ ރޭގަނޑުއެވެ.