ފަރަންސޭސި ފުޓްބޯޅައިގެ އެންމެ ވަރުގަދަ ކްލަބުތަކުގެ ތެރެއިން އެއް ކްލަބު ކަމުގައިވާ އޮލިމްޕިކް ލިޔޯނޭ އަށް ލިބުނު ބޮޑު ހިތްދަތިކަމެއްގެ ގޮތުގައި، ފަރަންސޭސި ފުޓްބޯޅައިގެ މާލީ ބެލެހެއްޓުމުގެ އިިދާރާ، ޑީ.އެން.ސީ.ޖީ އިން ރަސްމީކޮށް އެ ކްލަބު ލީގް 2 އަށް ވައްޓާލައިފިއެވެ. މި ކަން ފަރަންސޭސި ޕްރޮފެޝަނަލް ލީގް (އެލް.އެފް.ޕީ) އިން ވަނީ އަންގާރަ ދުވަހު ކަށަވަރުކޮށްދީފައެވެ.
ލީގް 1 ގެ 7 ފަހަރުގެ ޗެމްޕިއަނުން ކަމުގައިވާ، މިހާރު އެމެރިކާގެ ވިޔަފާރިވެރިއެއް ކަމަށްވާ ޖޯން ޓެކްސްޓަރ މިލްކުކުރާ މި ކްލަބަށް ވަނީ އޭގެ ކުރީ ދުވަހު ބޭއްވުނު އަޑުއެހުމެއްގައި، ފާއިތުވި ނޮވެމްބަރު މަހު އެޅި މާލީ ހަނިކުރުންތައް ނެގުމަށް ރެގިއުލޭޓަރުންނަށް ގަބޫލުކޮށް ނުދެވިފައެވެ. ރަޔާން ޗެރްކީ އަދި މެކްސެންސް ކަކުރެޓް ފަދަ މުހިންމު ކުޅުންތެރިން ވިއްކާލައި އަދި ޓެކްސްޓަރ ކްރިސްޓަލް ޕެލަސްއަށް ކޮށްފައިވާ އިންވެސްޓްމަންޓް އަނބުރާ ގެނައުން ފަދަ ފަހުގެ ޚަރަދު ކުޑަކުރުމުގެ ފިޔަވަޅުތައް އެޅި ނަމަވެސް، ޑީ.އެން.ސީ.ޖީ އިން ވަނީ ރެލެގޭޓް ކުރުމުގެ ނިންމުން ދަމަހައްޓާފައެވެ.
ލިޔޯނޭ އިން ވަނީ މި ނިންމުން "ވަގުތުން" އިސްތިއުނާފު ކުރާނެ ކަމަށް ބުނެފައެވެ. އިސްތިއުނާފު ކާމިޔާބު ނުވެއްޖެނަމަ، ރެއިމްސް އިން އަންނަ ސީޒަންގައި ލީގް 1 ގައި އެމީހުންގެ ޖާގަ ހޯދާނެއެވެ. ފާހަގަކޮށްލެވޭ ކަމަކީ، މި ކްލަބު 1989 އިން ފެށިގެން ދެވަނަ ފަންތީގައި ކުޅެފަ ނުވާކަމެވެ. އަދި ހަމައެހެންމެ މި ސީޒަންގައި 6 ވަނައަށް ނިންމާލައި ޔޫރަޕާ ލީގްގެ ޖާގައެއް ވެސް ހޯދާފައިވެއެވެ.
ނިންމުމުގެ ކުރިން ޓެކްސްޓަރ ވަނީ އިތުބާރާއިއެކު "މާލީގޮތުން ހުރިހާ ކަމެއް ރަނގަޅު" ކަމަށް ބުނެފައެވެ. ނަމަވެސް ޑީ.އެން.ސީ.ޖީ އިން އެކަމާ އެއްބަސްވެފައެއް ނުވެއެވެ.
އެއްޒަމާނެއްގައި ފަރަންސޭސި ފުޓްބޯޅައިގައި ރަސްކަންކުރި ލިޔޯނޭ އިން ވަނީ 2002 އިން 2008 އާ ހަމައަށް ވިދިވިދިގެން 7 ލީގް 1 މުބާރާތް ކާމިޔާބުކޮށްފައެވެ. މި ނިންމުމަކީ މި ކްލަބަށް ދިމާވި ތާރީޚީ ވެއްޓުމެކެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް