ކާފިއު ގަޑި އިތުރުކޮށް، އެނޫން ގަޑިތަކުގައި ހުއްދަ ނެތި މަގުމައްޗަށް ނުނިކުމެވޭ ގޮތަން ހަދަނީ

މާލޭގައި ކާފިއު ހިންގާ ގަޑި ހަވީރު 4:00 ން ހެނދުނު 8:00 އަށް ހިންގަން ފަށަން ނިންމައި، އެ ނޫން ގަޑިތަކުގައި ބޭރަށް ނުކުންނަށް ފުލުހުންގެ ހުއްދަ ހޯދަން ޖެހޭ ގޮތަށް ހަދައިފި އެވެ.

އަލަށް ގެނައި މި ބަދަލަށް އަމަލު ކުރަން ފަށާނީ މިމަހުގެ 26 ވާ ބުދަ ދުވަހުން ފެށިގެން ދެ ހަފްތާ އަށެވެ.

ނޫސްވެރިންނަށް މައުލޫމާތު ދެއްވަމުން ޗީޕް ސުޕްރިޓެންޑެންޓް އޮފް ޕޮލިސް އަބްދުﷲ ޝަރީފު ވިދާޅުވީ ކާފިއު ނޫން ގަޑިތަކުގައި ގެއިން ބޭރަށް ނުކުންނަށް ދޫކުރާނީ ގެއަކަށް ދެ ފާސް ކަމަށެވެ. އަދި އެ ފާސް ދޫކުރާނީ މިދިޔަ އަހަރުގެ ލޮކްޑައުންގައި އަމަލު ކުރި އުސޫލުން ގޭގެ ކަރަންޓު މީޓަރު ނަމްބަރަކަށް ކަމަށް އޭނާ ވިދާޅުވި އެވެ.

ޝަރީފު ވިދާޅުވީ އެ ޕާސް ދޫކުރެވޭނީ ދުވާލުގެ ކާފިއު ނޫން ގަޑިތައް ދެ ބަޔަކަށް ބަހާލައިގެން ކަމަށެވެ. އެއީ ހެނދުނު 8:00 އިން މެންދުރު 12:00 އަށް އަދި އަނެއް ޕާމިޓްތައް ދޫކޮށްފައި ހުންނާނީ މެންދުރު 12:00 އިން ހަވީރު 4:00 އާ ހަމައަށް ކަމަށް ވިދާޅުވިއެވެ.

ފާސް ދޫކުރާ ފަރާތް ނޫން އެހެން ފަރާތަކަށް ފާސް ހިފައިގެން ބޭރުގައި ނޫޅެވޭނެ ކަމަށާއި އުޅޭނަމަ އޮންނަ އުސޫލުގެ ތެރެއިން ޖޫރިމަނާ ކުރާނެ ކަމަށް ޝަރީފު ވިދާޅުވި އެވެ. އޭނާ ވިދާޅުވީ އެ ގެއަކަށް ދޫކުރާ ފާސް އެހެން މީހެއްގެ ނަމަށް ބަދަލު ކުރެވޭނީ ކޮންމެ 72 ގަޑިއިރަކުން އެއް ފަހަރު ކަމަށެވެ.

ކުރިއެެކޭ އެއްގޮތަށް ފުލުހުން މެދުވެރިކޮށް ފާސް ހޯދުމަށް ޕޯޓަލް އާއި ފޯން މެދުވެރިކޮށް އެދެވޭނެ ކަމަށް ވިދާޅުވި އެވެ.