މެޒޯ މޯޑުގެ ސަބަބުން ބަރުލަމާނީއަށް ގިނަ ބައެއްގެ ވޯޓު ގެއްލޭނެ: މޫސާ އަންވަރު

ރާއްޖޭގެ މަޝްހޫރު ލަވަކިޔުންތެރިޔާ މުހައްމަދު މާޖިދު (މެޒޯ މޯޑް)ގެ ސަބަބުން ބަރުލަމާނީ ނިޒާމަށް ގިނަ ބައެއްގެ ވޯޓު ގެއްލޭނެ ކަމަށް ދިވެހި ސޯޝަލް މީޑިއާ އެކްޓިވިސްޓް މޫސާ އަންވަރު ބުނެފިއެވެ.

މޫސަ ބުނީ ރިޔާސީ އިންތިހާބުގެ ދެވަނަ ބުރުގައި ޖެއްސުން ކުރުމަށްފަހު، ބަރުލަމާނީއަށް ވޯޓު ހޯދަން ދާން ޖެހޭނީ އެމްޑީޕީގެ އާއްމު މެމްބަރުން ކައިރިއަށް ކަމަށެވެ.

https://twitter.com/moosaanvar/status/1705513602545791125

މޫސަ މިހެން ބުނީ، ރިޔާސީ އިންތިހާބުގެ ދެވަަނަ ބުރުގައި ދަ ޑިމޮކްރެޓްސްއިން ވަކި ކޮޅަކަށް ނޭރުުމުން، ދެން ބޭނުމީ 'އިބޫ ނޫން ގޮތެއް' ކަމަށް މެޒޯ ބުނުމާ ގުޅިގެންނެވެ.

މެޒޯ ބުނީ، ޑިމޮކްރެޓްސްއިން ނިންމިގޮތް ބާއްވާފައި އަމިއްލަ ނިންމުމާ އެއްގޮތަށް ކުރިއަށް ދާން ވިސްނާ ކަމަށެވެ.

ރިޔާސީ އިންތިހާބުގެ ދެވަނަބުރުގައި އެއްވެސް ބަޔަކަށް ތާއީދު ނުކުރަން ދަ ޑިމޮކްރެޓްސްއިން ވަނީ ނިންމާފައެވެ.

ޑިމޮކްރެޓްސްއިން ބުނީ، ދެވަނަ ބުރުގައި ކުރިއަށް ދާނެ ގޮތެއް ނިންމުމަށް  ބޭއްވި އެ ޕާޓީގެ އިންޓަރިމް ކައުންސިލްގެ ނިންމާފައިވަ ގޮތުގެމަތިން، ޕީޕީއެމް/ ޕީއެންސީ ކޯލިޝަނުން އަދި އެމްޑީޕީއިންވެސް އެއްބަސްވެފައި ނުވާތީ، ދެވަނަ ބުރުގައި އެއްވެސް ޕާޓީއަކަށް ތާއީދު ނުކުރަން ނިންމާފައިވާ ކަމަށެވެ.

ކުރީގެ ރައީސް މުހައްމަދު ނަޝީދު އިސްވެ ހުންނަވައިގެން އުފެއްދެވި ދަ ޑިމޮކްރެޓްސް ޕާޓީން ބޭނުންވަނީ ރާއްޖޭގައި މިހާރު އޮތް ރިޔާސީ ނިޒާމު، ބަރުލަމާނީ ނިޒާމަކަށް ބަދަލު ކުރާށެވެ. އަދި އެކަމާ ގުޅޭގޮތުން ވަނީ ޕާޓީތަކާ މަޝްވަރާ ކޮށްފައެވެ،

އެކަމާ ގުޅިގެން ރައީސް އިބްރާހިމް މުހައްމަދު ސޯލިހު އެއްބަސްވެ ވަޑައިގެންނެވީ ރިޔާސީ އިންތިހާބުގެ ދެވަނަ ބުރަށްފަހު ނިޒާމު ބަދަލު ކުރުމުގެ ވޯޓު ނެގުމަށް ކަމަށާއި ނަމަވެސް އެގޮތް ބޭނުން ނުވާ ކަމަށް ދަ ޑިމޮކްރެޓްސްއިން ވަނީ ބުނެފައި ވެއެވެ.

އެކަމާ ގުޅޭގޮތުން އިދިކޮޅު ޕީޕީއެމްއާ މަޝްވަރާ ކުރުމުން އެޕާޓީން އެގޮތަށް ގަބޫލެއް ނުވިއެވެ. އޭގެ ފަހުން ނަޝީދު މަސައްކަތް ކުރެއްވީ، ޖަލުގައި ހުންނެވި ޕީޕީއެމްގެ ރައީސް އަބްދުﷲ ޔާމީން އަބްދުލްގައްޔޫމާ ބައްދަލު ކުރައްވާށެވެ. ނަމަވެސް ނިޒާމު ބަދަލު ކުރުމަށް ޝައުގުވެރިކަން ނެތުމާއެކު ޔާމީން ވަނީ އެ ބައްދަލުވުމަށް އިންކާރު ކުރައްވާފައެވެ.

ނަޝީދު ނިސްބަތްވެވަޑައިގަންނަވާ ދަ ޑިމޮކްރެޓްސް ޕާޓީގެ ގިނަ އެކްޓިވިސްޓުން ބުނަމުން ދަނީ ރައީސް ސޯލިހުގެ ފަހަތްޕުޅަށް އަރަން ބޭނުން ނުވާ ކަމަށެވެ.