ކާބޯތަކެތީގެ ހިދުމަތްދޭ ތަންތަނާއި ފިހާރަތަށް ހައެއް ޖަހަންދެން ހުޅުވާފައި ވެހެއްޓޭނެ

މާލޭގެ ކާފިއު ގަޑިއަށް ގެނައި ބަދަލާއި އެކު ކާބޯތަކެތީގެ ހިދުމަތްދޭ ތަންތަނާއި ފިހާރަތައް ހުޅުވައިގެން ހިދުމަތްދެވޭ ވަގުތު އިތުރުކޮށްފި އެވެ.

އެޗްޕީއޭއިން ވަނީ މިއަދުން ފެށިގެން މާލޭގައި ކާފިއު ހިންގާ ގަޑިއަށް ބަދަލު ގެނެސްފައި އެވެ. އެގޮތުން ކޯވިޑް-19 ކޮންޓްރޯލް ކުރުމަށް އަޅާފައިވާ ފިޔަވަޅުތަކުގެ ތެރެއިން މިއަދުން ފެށިގެން މާލެ ސަރަހައްދުގައި ކާފިއު ހިންގާނީ ހަވީރު 6:00 ން ފަތިހު 4:00 އަށް ކަމަށް އެޗްޕީއޭއިން ބުނެ އެވެ.

އިކޮނޮމިކް މިނިސްޓްރީން ބުނީ އެ ބަދަލާއި އެކު ކާބޯތަކެތީގެ ހިދުމަތް ދޭ ތަންތަން ހުޅުވާފައި ބެހެއްޓޭނީ ހެނދުނު ހެނދުނު 8:00 ން ހަވީރު 6:00 އަށް ކަމަށެވެ. މި ވަގުތުތަކުގައި އެފަދަ ތަންތަނުން ދެވޭނީ ޓޭކްއަވޭ އާއި ޑެލިވަރީގެ ހިދުމަތް އެކަންޏެވެ.

އަދި ފުލުހުންގެ ހުއްދައާއެކު އެފަދަ ތަންތަނަށް ހެނދުނު 6:00 ން ދަންވަރު 12:00އާ ހަމައަށް ޑެލިވަރީގެ ހިދުމަތް ދެވޭނެ ކަމަށް ވެސް އެ އިއުލާނުގައި ވެ އެވެ.

މި މުއްދަތުގައި ފިހާރަތައް ވެސް ހުޅުވާފައި ބެހެއްޓޭނީ ހެނދުނު 8:00 ން ހަވީރު 6:00 އަށެވެ. މި ވަގުތުތަކުގައި ހުއްދަ އޮންނަ މީހުންނަށް ފިހާރަތަކަށް ވަދެ ވިޔަފާރި ކުރެވޭނެ އެވެ. އަދި ހެނދުނު 6:00 ން މެންދަމު 12:00 އަށް ފުލުހުންގެ ހުއްދައާ އެކު ފިހާރަތަކުން ޑެލިވަރީގެ ހިދުމަތް ދެވޭނެ އެވެ.

މި ބަދަލުތައް ގެނެސްފައިވަނީ މިއަދުން ފެށިގެން މި މަހުގެ ނިޔަލަށެވެ.

އެޗްޕީއޭއިން ކާފިއު ވަގުތު ކުޑަ ކުރި ނަމަވެސް ހެނދުނު 8:00 ން ހަވީރު 6:00 އަށް އާންމުތަންތަނަށް ނުކުމެވޭނީ ފުލުން ދޫކުރާ ފާހާއި އެކު އެވެ.