ކެނެޑާގައި ބޭއްވި އާންމު އިންތިޚާބުގައި އެޤައުމުގެ ލިބަރަލް ޕާޓީން ހޯދި ކާމިޔާބީއާ ގުޅިގެން، އެޕާޓީއަށާއި، ކެނެޑާގެ ބޮޑުވަޒީރުކަމަށް އަލަށް އިންތިޚާބުވެވަޑައިގެންނެވި ޖަސްޓިން ޓްރޫޑޯއަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ތަހުނިޔާ ވިދާޅުވެއްޖެއެވެ.
ރައީސުލްޖުމްހޫރިއްޔާގެ މެސެޖުގައި، ދިވެހި ސަރުކާރާއި، ރައްޔިތުންނާއި، އެމަނިކުފާނުގެ އަމިއްލަ ނަންފުޅުގައި، ޖަސްޓިން ޓްރޫޑޯއަށާއި ލިބަރަލް ޕާޓީގެ މެންބަރުންނަށް ތަހުނިޔާ ވިދާޅުވެފައިވެއެވެ. އަދި ޖަސްޓިން ޓްރޫޑޯގެ ޒަޢާމަތުގައި، ކެނެޑާއަށް އިތުރު ފާގަތިކަމާއި ކުރިއެރުން ލިބިގެންދާނެކަން ޔަޤީން ކުރައްވާ ކަމުގައި ރައީސުލްޖުމްހޫރިއްޔާ ވިދާޅުވެފައިވާ ކަމަށް ރައީސް އޮފީހުން ވިދާޅުވެ އެވެ.
މީގެ އިތުރުން، ދިވެހިރާއްޖެއާއި ކެނެޑާއާ ދެ ޤައުމުގެ ދެމެދުގައި އޮތް ގާތް ގުޅުން އިތުރަށް ވަރުގަދަ ކުރެއްވުމަށް މިސަރުކާރުން އަބަދުވެސް އެއްބާރުލުން ދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވާފައިވާކަމަށްވެސް ރައީސް އޮފީހުން ވިދާޅުވެ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް