ޕާކިސްތާނާއި އަފްޣާނިސްތާނުގެ ގުޅުން: ޕާކިސްތާނަށް ފިލާވަޅުތަކެއް!

ޕާކިސްތާނުގައި ތިބި އަފްޣާނިސްތާނުގެ ބައެއް މީހުން އެ ގައުމުގައި ގާނޫނާ ހިލާފަށް އުޅޭ ކަމަށް ބުނެ ޕާކިސްތާނުގެ ކެއާޓޭކަރ ސަރުކާރުން ވަރަށް ބޮޑަށް ފާޑުކިޔައިފި އެވެ.

ޓެރަރިސްޓް ހަމަލާތައް އިތުރުވަމުންދާ ދަނޑިވަޅެއްގައި އެ ގައުމުގައި ބޭއްވި ނޭޝަނަލް އެކްޝަން ޕްލޭން (އެންއޭޕީ)ގެ އެންމެ މަތީ ކޮމިޓީގެ ބައްދަލުވުމަށް ފަހު އޮކްޓޯބަރު މަހުގެ 3 ވަނަ ދުވަހު ބޭއްވި ނިއުސް ކޮންފަރެންސެއްގައި ކެއާޓޭކަރ އިންޓީރިއާ މިނިސްޓަރު ސަފްރާޒް ބުގްޓީ ވަނީ އެ މީހުންނަކީ "ގަވައިދާ ހިލާފަށް އުޅޭ ރެފިއުޖީން" ކަމަށް ސިފަކުރައްވައި 1 ނޮވެމްބަރު 2023 ގެ ކުރިން ގައުމު ދޫކޮށް ދިއުމަށް އަންގަވާފަ އެވެ.

މިނިސްޓަރު ވިދާޅުވީ ޕާކިސްތާނުން ގަވައިދާ ހިލާފަށް ޕާކިސްތާނުގައި ތިބޭ މީހުންނާ މެދު ހަރުކަށި ފިޔަވަޅު އަޅާނެ ކަމަށެވެ. އޭގެ ތެރޭގައި އަފްޣާނިސްތާނުގެ ރައްޔިތުން ވެސް ހިމެނޭ ކަމަށާއި އެ މީހުން ހައްޔަރުކޮށް އެމީހުންގެ އުފަން ގައުމަށް ބޭރުކުރާނެ ކަމަށެވެ.

މިއީ އަފްޣާނިސްތާނުގެ ސަރަހައްދުގެ ތެރޭގައި ތިބި ކަމަށް ތުހުމަތުކުރެވޭ ތަހްރީކޭ ތާލިބާން ޕާކިސްތާން (ޓީޓީޕީ)ގެ މެމްބަރުންނާ ދެކޮޅަށް ފިޔަވަޅު އެޅުމަށް އަފްޣާނިސްތާނުގެ ތާލިބާނުންނަށް ޕްރެޝަރު އުފެއްދުމުގެ ހަރަކާތެއްގެ ގޮތުގައި ބަލަމުންދާ އިރު، ޕާކިސްތާނުގައި ދިރިއުޅޭ އަފްޣާނިސްތާނުގެ 4.2 މިލިއަން މީހުންގެ ތެރެއިން މަދުވެގެން ތިން މިލިއަން މީހުން ދިރިއުޅެމުން ދަނީ ގާނޫނީ އެއްވެސް ލިޔެކިޔުމެއް ނެތި ކަމަށް ބުގްޓީ ވަނީ ބުނެފަ އެވެ.

އޭގެ ރައްދުގައި އަފްޣާނިސްތާނުގެ ތާލިބާނުން ވަނީ ޕާކިސްތާނުގެ އަމަލުތަކަށް ވަރަށް ބޮޑަށް ފާޑުކިޔާފަ އެވެ. އަދި އެ ޖަމާއަތުގެ ތަރުޖަމާނު ވަނީ އަފްޣާނިސްތާނުގެ ރެފިއުޖީންނާ މެދު ޕާކިސްތާނުން އަމަލުކުރާ ގޮތަކީ ބަލައިގަނެވޭނެ ކަމެއް ނޫން ކަމަށް ބުނެފަ އެވެ. ތަރުޖަމާނު ވިދާޅުވީ އަފްޣާނިސްތާނުގެ ރެފިއުޖީންނަކީ ޕާކިސްތާނުގެ ސަލާމަތީ ކަންކަމާ ގުޅުން ހުރި ބައެއް ނޫން ކަމަށާއި ޕާކިސްތާނުގެ އޮފިޝަލުން އެމީހުންނަށް އުނދަގޫކޮށްގެން ނުވާނެ ކަމަށެވެ.

މިއީ ސިޔާސީ ހަމަނުޖެހުމާއި، އިގްތިސާދީ ކާރިސާތަކާއި، ޚާރިޖީ ސިޔާސަތުގެ ނުތަނަވަސްކަން ފަދަ އެތައް ގޮންޖެހުންތަކަކާ ޕާކިސްތާނަށް ކުރިމަތިވެފައިވާ ދަނޑިވަޅެކެވެ. ހާއްސަކޮށް އަފްޣާނިސްތާނުގެ ތާލިބާނުން އެގައުމުގައި ބާރު ގަދަވެފައިވާ ދަނޑިވަޅެއްގައި އަފްޣާނިސްތާނާ ގުޅުން ގޯސްވުމަކީ އިސްލާމްއާބާދާއި ރާވަލްޕިންޑީގެ ކަންބޮޑުވުމެކެވެ. ޕާކިސްތާނުގައި ޓެރަރިޒަމްގެ ހަމަލާތައް އިތުރުވަމުން ދާނަމަ، އެކަމުގެ ސަބަބުން ގުޅުން އިތުރަށް ހީނަރުވެ، އަފްޣާނިސްތާނުގެ ތާލިބާނުންނަށްވުރެ ޕާކިސްތާނަށް ބޮޑެތި އަސަރުތަކެއް ކުރާނެ ކަމަށް ބެލެވެއެވެ.

އަފްޣާނިސްތާނުގެ ތާލިބާނުންނަށްވުރެ ބޮޑަށް ޕާކިސްތާނަށް މި ކަންކަމުގެ ސަބަބުން ބޮޑެތި އަސަރުތަކެއް ކުރާނެ ކަމަށާއި، 2021 ވަނަ އަހަރުގެ އޮގަސްޓް މަހު އަފްޣާނިސްތާނުގެ ތާލިބާނުން އަފްޣާނިސްތާނަށް އައުމަށްފަހު ޕާކިސްތާނުގެ ވެރިކަންކުރާ ފަރާތްތަކުންވެސް އަދި ޕާކިސްތާނުގެ ރައްޔިތުންވެސް އުންމީދު ނުކުރާ ފަދަ ކަމެއް ކަމަށް ބެލެވެއެވެ.