ރައީސްގެ ދަތުރުފުޅު ކެންސަލްވީ ހުމާއި ރޯގާ ޖެހިވަޑައިގެން

އާލާސްކަންފުޅާ އުޅުއްވާތީ، ރިޔާސީ އިންތިހާބުގެ ކެމްޕޭނަށް ރައީސް އިބްރާހިމް މުހައްމަދު ސޯލިހު އަރިއަތޮޅަށް ކުރައްވާ ދަތުރު ފުޅުގައި މިއަދު ވަޑައިގަންނަވަން ހަމަޖެހިފައިވާ ދަތުރުފުޅު ކެންސަލް ކުރައްވައިފިއެވެ.

މި ދަތުރުފުޅުގައި ރައީސް އިއްޔެ ވަޑައިގެންނެވީ އއ ތޮއްޑޫ، ރަސްދޫ، ބޮޑުފޮޅުދޫ، މަތިވެރި، މާޅޮސް، ފެރިދޫ އަދި އުކުޅަހަށެވެ. އަދި މިއަދު ވަޑައިގަންނަވަން ހަމަޖެހިފައި އޮތީ ހިމަންދޫ، ހަންޏާމީދޫ، ދިއްދޫ، ދަނގެތި، ދިގުރަށް، ކުނބުރުދޫ، އޮމަދޫ އަދި މަހިބަދޫއަށެވެ

އެކަމާ ގުޅިގެން "ދުވަސް" އަށް މައުލޫމާތު ދެއްވަމުން ރައީސް 'އިބޫއަސްލަމް' ކެމްޕޭން މެނޭޖަރު މާރިޔާ ދީދީ ވިދާޅުވީ، ރައީސްގެ ދަތުރުފުޅު ކެންސަލްވީ އާލަސްކަންފުޅާ އުޅުއްވާތީ ކަމަށެވެ.

"ވަރަށް ބޮޑަށް މިއުޅޭ ރޯގާ ޖެހިވަޑައިގެން ހުންފުޅު އަހިސްގެން" މާރިޔާ ވިދާޅުވިއެވެ.

ކެމްޕޭނަށް ރައީސް އެންމެ ފަހުން ވަޑައިގަތީ ނ. އަތޮޅަށެވެ.

އޭގެ ކުރިން ދ، ގދ އަދި ގއ އަތޮޅުގެ ރަށްރަށަށްވެސް ރައީސް ވަޑާއިގެންނެވިއެވެ..

އެ ދަތުރުފުޅުގައި ދ އަތޮޅުގެ މީދޫ، ރިނބުދޫ، ބަނޑިދޫ، ހުޅުދެލި، މާއެނބޫދޫ، ކުޑަހުވަދުއަށް ވަޑައިގެންނެވިއެވެ.

އޭގެ ފަހުން އަންގާރަ ދުވަހު ގދ ކާޑެއްދޫ އަށް ވަޑައިގަންވަނަވައި، ގއ އަދި ގދ ގެ ރަށްރަށަށް ދަތުރު ކުރެއްވިއެވެ. އެގޮތުން ރައީސް ވަނީ  މަޑަވެލި، ހޯޑެއްދޫ، ނަޑެއްލާ ، ރަތަފަންދޫ، ފިޔޯރީ، ގައްދޫ، ވާދޫ، ފަރެސްމާތޮޑާ، ދެއްވަދޫ، ކަނޑުހުޅުދޫ، ގެމަނަފުށި، ކޮނޑޭ،  ވިލިނގިލި، ދާންދޫ، ކޮލަމާފުށި، މާމެންދޫ އަދި ވިލިނގިއްޔަށް ވަޑައިގަންނަވާފައެވެ.

އަންނަ ސެޕްޓެމްބަރު މަހުގެ ނުވަ ވަނަ ދުވަހު ބޭއްވުމަސް ހަމަޖެހިފައިވާ ރިޔާސީ އިންތިހާބުގައި އެމްޑީޕީ ކޯލިޝަންގެ ފަރާތުން ވާދަ ކުރައްވާ ކެނޑިޑޭޓް، ރައީސް ސޯލިހުގެ ރިޔާސީ ކެމްޕެއިން ފައްޓަވާފައި ވަނީވެސް  ށ. އަތޮޅުންނެވެ.

އެގޮތުން ކޮމަންޑޫއިން ފެއްޓެވި ކެމްޕޭންގައި އެ އަތޮޅު ފޯކައިދޫ، މަރޮށި އަދި ނޫމަރާއަށް ވަޑައިގެންނެވިއެވެ.

އޭގެ ފަހުން ކ. އަތޮޅުގެ  ކ. ގުޅި، ގުރައިދޫ އަދި މާފުއްޓަށާއި މ. ކޮޅުފުށި، ނާލާފުށި، މުލި އަދި މުލަކުގެ އިތުރުން ވ. ރަކީދޫ، ކެޔޮދޫ، ފެލިދޫ، ތިނަދޫ އަދި ފުލިދޫއަށް ވަޑައިގެންނެވިއެވެ. އަދި ހއ. އަތޮޅުގެ10 ރަށަކަށްވެސް ވަޑައިގެންނެވިއެވެ. އެއީ  ހޯރަފުށި، ތުރާކުނު، އުލިގަމު، މޮޅަދޫ، އިހަވަންދޫ، މާރަންދޫ، ތަކަންދޫ، ކެލާ، ވަށަފަރު އަދި ދިއްދުއަށެވެ. އެއަށްފަހު އެމަނިކުފާނު ކެމްޕޭނަށް ވަޑައިގެންނެވީ ޏ. ފުވައްމުލަކަށެވެ. އަދި އޭގެ ފަހުން ށ. އަތޮޅާށާއި ހދ އަތޮޅަށް ވަޑައިގެންނެވިއެވެ.