އީރާނުން ޕާކިސްތާނަށް ދިން ހަމަލާތަކުގައި ދެ ކުއްޖަކު މަރުވެއްޖެ

އީރާނުން ޕާކިސްތާނަށް ދިން ހަމަލާތަކުގައި ދެ ކުއްޖަކު މަރުވެ ތިން މީހަކު ޒަހަމްވެފައިވާ ކަމަށް ޕާކިސްތާނުން ބުނެފިއެވެ.

ޕާކިސްތާނުން ބުނީ އެ ހާދިސާއާ ގުޅިގެން އިސްލާމްއާބާދުގައި ހުންނަ ތެހެރާނުގެ އެންމެ އިސް ޑިޕްލޮމެޓް ހާޒިރުކޮށްފައިވާ ކަމަށެވެ.

ޕާކިސްތާނުގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ ޕާކިސްތާނުގެ ސިޔާދަތަށް އަރައިގަތުމަކީ ބަލައިގަނެވޭނެ ކަމެއް ނޫން ކަމަށާއި އެކަމުގެ ސަބަބުން ބޮޑެތި ނަތީޖާތަކެއް ނުކުންނާނެ ކަމަށެވެ.

އަންގާރަ ދުވަހުގެ ރޭ ހިނގި ހަޅުތާލުގެ ސަބަބުން ކުށެއް ނެތް ދެ ކުއްޖަކު މަރުވެ، ތިން އަންހެން ކުއްޖަކު ޒަހަމްވެފައިވާ ކަމަށް އެ ޖަމިއްޔާއިން ބުންޏެވެ.

އީރާނުގެ ދައުލަތުގެ މީޑިއާއިން މީގެ ކުރިން ބުނެފައިވަނީ ތެހެރާނުން ޕާކިސްތާނުގައި ހަތިޔާރު އެޅި ޖަމާއަތެއް ކަމަށްވާ ޖައިޝް އަލް އަދުލްގެ ދެ މަރުކަޒަކަށް ހަމަލާ ދީފައިވާ ކަމަށެވެ. އިރްނާގެ ނިއުސް އެޖެންސީ އާއި ދައުލަތުގެ ޓީވީން ބުނެފައި ވަނީ ހަމަލާތަކުގައި މިސައިލާއި ޑްރޯން ބޭނުންކޮށްފައިވާ ކަމަށެވެ.

"އާމީ އޮފް ޖަސްޓިސް" ޖައިޝް އަލް އަދްލް އަކީ 2013 ވަނަ އަހަރުން ފެށިގެން އީރާނުގެ ބޯޑަރު ގާޑުންނާ ދެކޮޅަށް ނުރައްކާތެރި ހަމަލާތައް ދެމުން އަންނަ ޖަމާއަތެކެވެ. އެ ޖަމިއްޔާއިން މީގެ ކުރިންވެސް ވަނީ ބޯޑަރު ފުލުހުންނަށް ބޮން އެޅުމާއި ރަހީނުކުރުމުގެ އަމަލުތައް ހިންގާފައެވެ.

އީރާނުގެ ސަލާމަތީ އެންމެ އިސް އިދާރާއާ ގުޅިފައިވާ ނޫރުނިއުސް އިން ބުނީ އެ ބޭސްތައް ހުރީ ބަލޫޗިސްތާން ޕްރޮވިންސްގައި ކަމަށެވެ.

ޕާކިސްތާނުގެ ބަޔާނުގައި ހާދިސާ ހިނގި ތަނެއް ހާމަކޮށްފައި ނުވި ނަމަވެސް ޕާކިސްތާނުގެ ސަލާމަތީ ދެ އޮފިޝަލަކު އެސޯސިއޭޓެޑް ޕްރެސް ނިއުސް އެޖެންސީއަށް މައުލޫމާތު ދެމުން ބުނީ އީރާނުގެ ހަމަލާތަކުގެ ސަބަބުން ބޯޑަރުގެ 50 ކިލޯމީޓަރު (30 މޭލު) ބޭރުގައި އޮންނަ ބަލޫޗިސްތާނުގެ ޕަންޖްގުރް ޑިސްޓްރިކްޓްގެ މިސްކިތަކަށް ބޮޑެތި ގެއްލުންތަކެއް ލިބިފައިވާ ކަމަށެވެ.

ތެހެރާނާއި އިސްލާމްއާބާދުން އެކަކު އަނެކަކަށް ތުހުމަތު ކުރަނީ ހަތިޔާރު އެޅި ޖަމާއަތްތަކަށް އެކަކު އަނެކަކުގެ ސަރަހައްދުން ހަރަކާތްތެރިވުމުގެ ފުރުސަތު ދޭ ކަމަށެވެ.

"ޕާކިސްތާނުން އަބަދުވެސް ބުނަނީ ޓެރަރިޒަމަކީ މި ސަރަހައްދުގެ ހުރިހާ ގައުމަކަށް ވެސް އޮތް އާންމު ނުރައްކަލެއް ކަމަށާއި އެކަމަށް ގުޅިގެން ފިޔަވަޅު އަޅަން ޖެހޭ ކަމަށް." ފޮރިން މިނިސްޓްރީގެ ބަޔާނުގައި ވެއެވެ. އަދި އެއްފަރާތްކޮށް ހިންގާ މިފަދަ އަމަލުތަކަކީ އަވަށްޓެރި ގައުމުތަކުގެ ރަނގަޅު ގުޅުމާ އެއްގޮތަށް ހިންގާ އަމަލުތަކެއް ނޫން ކަމަށާއި އެކަމުގެ ސަބަބުން ދެގައުމުގެ މެދުގައި އޮންނަ އިތުބާރާއި ގުޅުން ވަރަށް ބޮޑަށް ހީނަރުވެދާނެ ކަމަށެވެ.

މިދިޔަ ހޯމަ ދުވަހު އީރާނުން ވަނީ ސީރިއާގެ އުތުރުގެ ސަރަހައްދަށް އައިއެސް ޖަމާއަތަށް އަމާޒުކޮށް މިސައިލް ހަމަލާދީ އިރާގަށް މިސައިލް ފޮނުވާލާފައެވެ.

އިރާގުން އަންގާރަ ދުވަހު ވަނީ އާންމުންގެ ގިނަ ބަޔަކު ޝަހީދުކޮށްލި ހަމަލާތަކަކީ އިރާގުގެ އިސްތިގުލާލާ ހިލާފު ހަމަލާތަކެއް ކަމަށް ސިފަކޮށް ތެހެރާނުން އެގައުމުގެ ސަފީރު އަނބުރާ ފޮނުވާލާފައެވެ.