އިސްރާއީލުން އީރާނުގެ ސަރަޙައްދުތަކަށް ދިން ވައިގެ ޙަމަލާތަކެއްގައި އިސްލާމިކް ރެވޮލިއުޝަނަރީ ގާޑް ކޯޕްސް (އައިއާރްޖީސީ) ގެ އިންޓެލިޖެންސް އޯގަނައިޒޭޝަންގެ ވެރިޔާ މުޙައްމަދު ކާޒެމީ އާއި އޭނާގެ ނައިބު ޙަސަން މޮހަޤެޤް މަރުވެފައިވާކަން އައިއާރްޖީސީން ކަށަވަރުކޮށްދީފިއެވެ.
އީރާނުގެ މީޑިއާ އަދި އައިއާރްޖީސީގެ މަޞްދަރުތަކުން ހާމަކުރި ގޮތުގައި އިތުރު އިސް ކޮމާންޑަރެއް ކަމުގައިވާ މުޙްސިން ބާޤެރީ އާއި ނަން ހާމަނުކުރާ އައިއާރްޖީސީގެ ސެކިއުރިޓީގެ 3 މުވައްޒަފުން ވެސް މި ޙަމަލާތަކުގައި މަރުވެފައިވެއެވެ. މި ޙަމަލާތައް އަމާޒުކުރެވިފައިވަނީ ޓެހްރާނާއި އޭގެ ވަށައިގެންވާ ސަރަޙައްދުތަކުގައި ހުރި މުހިންމު އަސްކަރީ އަދި އިންޓެލިޖެންސް މަރުކަޒުތަކަށް ކަމަށް ބުނެވެއެވެ.
މީގެ ކުރިން، އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ވަނީ ފޮކްސް ނިއުސްއަށް ދިން އިންޓަވިއުއެއްގައި ކާޒެމީ އާއި މޮހަޤެޤް މަރާލެވިފައިވާކަމަށް ވަރަށް ބޮޑަށް އިޝާރާތްކޮށްފައެވެ. އޭނާ ބުނީ: "ދެންމެއަކު އަހަރެމެންނަށް ޓެހްރާނުގައި ހުރި އިންޓެލިޖެންސްގެ އެންމެ އިސްވެރިޔާ އާއި އޭނާގެ ނައިބު ވެސް މަރާލެވިއްޖެ. އަހަރެމެންގެ ހިތްވަރުގަދަ ޕައިލެޓުން ޓެހްރާނުގެ އުޑުމަތީގައި އެބަތިބި، އަދި އަހަރެމެން އަސްކަރީ މަރުކަޒުތަކާއި ނިއުކްލިއަރ މަރުކަޒުތަކަށް އަމާޒުކުރަމުން މި ދަނީ."
މި ކަށަވަރުކުރެވުނު މަރުތަކަކީ ހުކުރު ދުވަހު އިސްރާއީލުން ފެށި ހަނގުރާމައިގެ ތެރޭގައި މަރުވެފައިވާ އީރާނުގެ އިސް އަސްކަރީ ވެރިންގެ ދިގު ލިސްޓަށް އިތުރުވި މަރުތަކެކެވެ. އެހެނިހެން ފާހަގަކޮށްލެވޭ މަރުތަކުގެ ތެރޭގައި އައިއާރްޖީސީގެ ކޮމާންޑަރ އިން ޗީފް ޙުފް ޙުސައިން ސަލާމީ، އަސްކަރިއްޔާގެ އެންމެ އިސްވެރިޔާ މުޙައްމަދު ބާޤެރީ، އެއަރޯސްޕޭސް ފޯސްގެ ކޮމާންޑަރ އަމީރުޢަލީ ޙާޖީޒާދާ، އަދި ސީނިއަރ ޖެނެރަލް ޣުލާމްޢަލީ ރަޝީދު ހިމެނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް