ރޯދަ މަހު އައިޖީއެމްއެޗުން ބައެއް ޚިދުމަތްތައްދޭނެ ގަޑިތަކަށް ބަދަލު ގެނެސްފި

ކުރިޔަށް އޮތް ރަމަޟާންމަހު ސަރުކާރުގެ މައި ހޮސްޕިޓަލް އިންދިރާ ގާނދީ މެމޯރިއަލް ހޮސްޕިޓަލް (އައި.ޖީ.އެމް.އެޗް) އިން ބައެއް ޚިދުމަތްތައް ފޯރުކޮށްދޭ ގަޑިތަކަށް ބަދަލުތަކެއް ގެނެސްފި އެވެ.

މިކަން ހާމަކޮށް އައިޖީއެމްއެޗުން ބުނީ، 1444 ވަނަ އަހަރުގެ ރަމަޟާންމަހާއި ޝައްވާލުމަހުގެ ފުރަތަމަ 7 ދުވަހު ހޮސްޕިޓަލުގެ ބައެއް ޑިމާޕްމަންޓްތަކުން ޚިދުމަތް ފޯރުކޮށްދޭ ގަޑިތަކަށް ބަދަލުގެނެސްފައިވާކަމަށެވެ.

ސްޕެޝަލިސްޓް އޯޕީޑީ ކޮންސަލްޓޭޝަންގެ ޚިދުމަތް ރަމަޟާންމަހު ލިބޭނީ ހެނދުނު 9 އިން ހަވީރު 4 ޖެހުމާއި ހަމައަށް ކަމަށް އައިޖީއެމްއެޗުން ބުނެފައި ވެއެވެ.

އަދި ލެބޯޓްރީގެ ޚިދުމަތްތަކަށް ބަލާއިރު ޓެސްޓުތައް ހެދުން ކުރިއަށްދާނީ ހެނދުނު 8 އިން ހަވީރު 5 ޖެހުމާއި ހަމައަށް ކަމަށާއި ކައިގެން ދެގަޑިއިރުފަހުން ހަދާ ލޭގެ ޓެސްޓުތައް ހެދުން ރަމަޟާންމަހު ކުރިއަށްދާނީ ރޭގަނޑު 8 އިން 10 ދެމެދު ކަމަށް އެހޮސްޕިޓަލުން ހާމަކޮށްފައި ވެއެވެ.

އައިޖީއެމްއެޗުން ބުނީ އަލްޓްރާސައުންޑް ސްކޭން ހެދުމާއި ސީޓީ ސްކޭން ހެދުން ކުރިއަށްދާނީ ހެނދުނު 9 އިން މެންދުރުފަހު 3 އަކާއި ހަމައަށް ކަމަށެވެ.

އައިޖީ އެކްސްރޭ ނަގައިދިނުން ކުރިއަށްދާނީ ހެނދުނު 8 އިން މެންދުރުފަހު 3:30 އަށް ކަމަށާއި އެމް.އާރް.އައި ހެދުމުގެ ޚިދުމަތް ފޯރުކޮށްދޭނީ ހެނދުނު 8 އިން ރޭގަނޑު 9 އަކާ ހަމައަށް ކަމަށް އެ ހޮސްޕިޓަލުން ހާމަކުރެއެވެ.

މީގެ އިތުރުން އީ.ސީ.ޖީ ހެދުމުގެ ޚިދުމަތް ހެނދުނު 8:30 އިން މެންދުރު 2:30 އަށް، އަދި ޕިޒިއޯތެރަޕީގެ ޚިދުމަތް ހެނދުނު 8 އިން މެންދުރު 2:30 ފޯރުކޮށްދޭނެ ކަމަށް އައި.ޖީ.އެމް.އެޗްއިން ހާމަކުރެއެވެ.

ރޯދަމަހު ޚިދުމަތްދޭ ގަޑިތަކަށް ބަދަލުގެނެސްފައިވީ ނަމަވެސް އެ ހޮސްޕިޓަލުން ބުނީ ޓްރޯމާ އެންޑް އިމަރޖެންސީގެ ޚިދުމަތް 24 ގަޑިއިރު ލިބޭނެ ކަމަށެވެ.