އިސްދޫ ބަނދަރު ތަރައްޤީ ކުރުމުގެ މަޝްރޫޢު ނިމިއްޖެ

ލ. އިސްދޫ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތް ނިމިއްޖެކަމަށް އެ މަސައްކަތް ކުރާ ކުންފުނި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފިއެވެ.

އެމްޓިސީސީން ބުނީ މަޝްރޫއުގެ މަސައްކަތް އެއްކޮށް ނިމުނީ މިދިޔަ އޮގަސްޓު މަހުގެ 14 ވަނަ ދުވަހު ކަމަށެވެ.

އެމްޓީސީސީން މައުލޫމާތު ދޭގޮތުގައި މި މަޝްރޫގެ ދަށުން 31،820 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 380 މީޓަރުގެ ސަރަހައްދެއްގައި އެއްގަމު ތޮށިލުން ހިމެނެއެވެ.

އަދި 208 މީޓަރުގެ ސަރަހައްދެއްގައި ބޭރު ތޮށި ލުމާއި 98 މީޓަރު ސަރަހައްދެއްގެ ރިވެޓްމެންޓު ޖެހުމާއި، 1810 އަކަމީޓަރު ޞަރަހައްދެއްގައި ޕޭވްމަންޓްހެދުން ހިމެނެއެވެ.

މީގެ އިތުރުން އެގާރަ މީޓަރު ދިގު އެގާރަ މީޓަރު ފުޅާ ރޭމްޕެއް ހެދުމާއި ބްރިޖެއް އެޅުމާއި، ބަނދަރު ބައްތިއާއި ނެރު ބައްތި ހަރުކުރުމުގެ މަސައްކަތް ހިމެނެއެވެ.

މިއީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގް އެންޑް އިންފްރާސްޓްރަކްޗަރގެ ފަރާތުން އެމްޓީސީސީ އާއި ހަވާލުކޮށްގެން ކުރިއަށްގެންދާ  34.79 މިލިއަން ރުފިޔާގެ މަޝްރޫއެކެވެ.