އީރާނު ހަނގުރާމަ ފަށަން ޓްރަމްޕް އެއްބަސް ކުރުވޭތޯ ބަލަން އިޒްރޭލުގެ މޮސާޑުގެ ވެރިޔާ އެމެރިކާއަށް ފޮނުވައިފި

އިސްތިއުމާރީ އިޒްރޭލުގެ ޖާސުސީ އިދާރާ މޮސާޑުގެ ވެރިޔާ ރޯމަން ގޮފްމަން، އެމެރިކާގެ ސީއައިއޭގެ ޑައިރެކްޓަރު ޖޮން ރެޓްކްލިފާ ބައްދަލުކުރުމަށް ހުކުރު ދުވަހު ވޮޝިންގޓަނަށް ގޮސްފައިވާ ކަމަށް އެމެރިކާގެ ޚަބަރު ވެބްސައިޓް އެކްސިއޮސް އިން ރިޕޯޓުކޮށްފައިވެއެވެ.

ގޮފްމަން ވޮޝިންގޓަނުގެ އިތުރުން މިއާމީއަށް ވެސް ދަތުރުކޮށް، ވައިޓް ހައުސްގެ މަންދޫބު ސްޓީވް ވިޓްކޮފާ މަޝްވަރާ ކުރާނެ ކަމަށް ބެލެވޭ ކަމަށް އެ ރިޕޯޓުގައި ބުނެފައިވެއެވެ. އީރާނާ ދެކޮޅު އަސްކަރީ ފިޔަވަޅު އަލުން ފެށުމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ، ޓްރަމްޕަށް ބާރު އެޅަމުންދާ ދަނޑިވަޅެއްގައި މި ދަތުރު ކުރެވުނީއެވެ.

ނަތަންޔާހޫ އާއި ޓްރަމްޕާ ދެމެދު ހޫނު ފޯނު ކޯލެއް ކުރެވުނު ކަމަށް ފެތުރުނު ޚަބަރުތައް ނަތަންޔާހޫގެ އޮފީހުން ބުރާސްފަތި ދުވަހު ދޮގުކޮށް، އެއީ "ފޭކް ނިއުސް" ކަމަށް ބުންޏެވެ. ނަމަވެސް އިޒްރޭލުގެ ޔޫނެޓް ނޫހުން ރިޕޯޓުކޮށްފައިވާ ގޮތުގައި، އީރާނުގެ މައްސަލައަށް ފޯކަސް ކުރެވުނު އެ ފޯނު ކޯލް ވެގެން ދިޔައީ ވަރަށް ދަތި މަޝްވަރާއަކަށެވެ. ޔޫނެޓުން ނެގި އެއް މަސްދަރުން އެ ކޯލް ސިފަކޮށްފައިވަނީ "ނަރަކައިގެ ހަޅޭކުގެ ކުރިމަތިލުމެއް"ގެ ގޮތުގައެވެ.

ދެ ލީޑަރުންގެ ވިސްނުން މިހާރު ވަނީ ވަރަށް ތަފާތުވެފައެވެ. ޤަޠަރުގެ ބޮޑުވަޒީރު ޝެއިޚް މުޙައްމަދު ބިން ޢަބްދުއްރަޙްމާން ބިން ޖާސިމް އާލް ޘާނީއާ ބައްދަލުކުރެއްވުމަށް ފަހު ޓްރަމްޕް ބުނީ މަޝްވަރާތަކުގައި "ޕޮސިޓިވް މޮމެންޓަމް" އެބައޮތް ކަމަށާއި، މިހާރު އޮތް ހާލަތުގައި ބާއްވާނީ ކަމަށެވެ. "ވީ އާ ޖަސްޓް ކީޕިންގް އިޓް އެޓް ދި ސްޓޭޓަސް ކޯ" ކަމަށް ޓްރަމްޕް ބުންޏެވެ. ނަމަވެސް ނަތަންޔާހޫ އަންގާރަ ދުވަހު ކްނެސެޓުގައި ބުނީ އީރާނުގެ ނިއުކްލިއާ ނުރައްކާ ދާއިމީ ގޮތަކަށް ނައްތައިލެވެން އޮތީ ހަމައެކަނި އީރާނުގެ ވެރިކަން ވެއްޓިގެން ކަމަށެވެ.

"އީރާން އިން އިޒްރޭލު ނެތިކޮށްލުމުގެ ރޭވުން ދޫކޮށެއް ނުލާނެ،" އައު ކްނެސެޓުގެ ހުވާކުރުމުގެ ރަސްމިއްޔާތުގައި ނަތަންޔާހޫ ބުންޏެވެ. އޭނާ އިތުރަށް ބުނީ "މި ވުޖޫދީ ނުރައްކާ ދާއިމީ ގޮތެއްގައި ނައްތައިލެވޭނެ ހަމައެކަނި ގޮތަކީ ދީނީ ވެރިކަން ވައްޓައިލުން" ކަމަށެވެ. ފައިނޭންޝަލް ޓައިމްސް ރިޕޯޓުކޮށްފައިވާ ގޮތުގައި ނަތަންޔާހޫ ދަނީ ކޮންމެ ދުވަހަކު ޓްރަމްޕަށް ގުޅައި ތެހެރާނަށް ހަމަލާ ދިނުން އަލުން ފެށުމަށް އެދެމުންނެވެ.

މި ނުތަނަވަސްކަން އުފެދިފައި ވަނީ ދެ ލީޑަރުންނަށް ވެސް އިންތިޚާބީ ނާކާމިޔާބީތަކާ ކުރިމަތިވެފައިވާ ދަނޑިވަޅެއްގައެވެ. ނަތަންޔާހޫގެ ލިކުޑް ޕާޓީ އިސްވާ ބްލޮކަށް 120 ގޮނޑީގެ ކްނެސެޓުން ލިބޭނެ ކަމަށް ބެލެވެނީ 53 ގޮނޑި ކަމަށާއި، 61 ގޮނޑީގެ އަޣުލަބިއްޔަތު ނުލިބޭ ކަމަށް ރިޕޯޓުތައް ބުނެއެވެ. ހަމަ އެހެންމެ ޓްރަމްޕުގެ ރިޕަބްލިކަން ޕާޓީއަށް ވެސް ނޮވެމްބަރުގެ މިޑްޓާމް އިންތިޚާބުގައި ކޮންގްރެސްގެ ކޮންޓްރޯލް ގެއްލިފައިވެއެވެ. މި އަހަރު ފެބްރުއަރީ މަހު ފެށި އެމެރިކާ-އިޒްރޭލުގެ ހަމަލާތަކާ ގުޅިގެން އީރާނުން ރައްދު ހަމަލާ ދީ، ހޮރްމޫޒް ކަނޑުއޮޅި ބަންދުކުރި ފަހުން، ޖޫން މަހު ހަމަލާ ބަދަލުކުރުން ހުއްޓައިލުމުގެ އޮނިގަނޑަކަށް ދެ ފަރާތުން އެއްބަސްވި ނަމަވެސް، ހޮރްމޫޒް އާއި ނިއުކްލިއާ މައްސަލައާ މެދު ޚިޔާލު ތަފާތުވެ އެ އެއްބަސްވުން ރޫޅިފައިވެއެވެ.