ރާއްޖޭގެ ރަސްމީ ރިޒާވް އޮކްޓޫބަރު މަހު 614.6 މިލިއަން ޑޮލަރަށް އަރާފައިވާ ކަމަށް އެމްއެމްއޭގެ ތަފާސްހިސާބުތަކުން ދައްކައިފިއެވެ.
އެމްއެމްއޭ އިން ނެރެފައިވާ ސްޓެޓިސްޓިކްސްގައި ވާގޮތުން، ސެޕްޓެންބަރު މަހު ރާއްޖޭގެ ރިޒާވްގައި ހުރީ 371.2 މިލިއަން ޑޮލަރެވެ. އެހެން ނަމަވެސް، އޮކްޓޫބަރު މަހު އެ އަދަދު ހުރީ 614.6 މިލިއަން ޑޮލަރުގައެވެ.
ރިޒާވް އިތުރުވެފައިވާ މައިގަނޑު ސަބަބަކީ ރިޒާވް ބޭންކް އޮފް އިންޑިއާ (އާރްބީއައި)އިން ކަރަންސީ ސްވޮޕްގެ ގޮތުގައި 400 މިލިއަން ޑޮލަރު ލިބިފައިވުންކަމަށް އެމްއެމްއޭއިން ބުނެއެވެ.
މި ފައިސާގެ ތެރެއިން 120 މިލިއަން ޑޮލަރު ރާއްޖޭގެ ބޭންކުތަކުގައި އިންވެސްޓްކޮށްފައިވާ ކަމަށް ވެސް އެ އޮތޯރިޓީން މައުލޫމާތު ދީފައިވެއެވެ. މި ނިންމުމުގެ ސަބަބުން އެމްއެމްއޭގެ ރިޓާން އޮޕްޓިމައިޒްކުރުމުގެ މަގުސަދު ހާސިލުވުމުގެ އިތުރުން މާލީ ދާއިރާގެ ހަމަޖެހުމާއި ކުރިއެރުމަށް އެހީތެރިވެދީ، މުޅި އިގުތިސާދަށް އޭގެ ފައިދާ ކުރާނެކަމަށް އެމްއެމްއޭ އިން ބުންޏެވެ.
ރަސްމީ ރިޒާވް އިތުރުވީ ނަމަވެސް، ޔޫސަބަލް ރިޒާވްގެ އަދަދުގެ ގޮތުގައި ފެންނަނީ 31.5 މިލިއަން ޑޮލަރެވެ. އެމްއެމްއޭ އިން ނެރެފައިވާ ނޫސްބަޔާނުގައި ވާގޮތުން، ޔޫސަބަލް ރިޒާވް ޑޭޓާ ހިސާބުކުރަނީ ރާއްޖޭގެ ބޭންކުތަކުގައި އިންވެސްޓްކޮށްފައިވާ 120 މިލިއަން ޑޮލަރު ހިމަނައިގެންނެވެ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް