ގޯއްޗާއި ފްލެޓަށް އެދުމުގެ މުއްދަތު ހަމަވަނީ، ފޯމު ސަބްމިޓް ވިކަން ޔަގީން ކުރޭ!

ސަރުކާރުން ހުޅުވާލާފައިވާ ބިންވެރިޔާ އަދި ގެދޮރުވެރިޔާ ސްކީމަށް ފޯމު ހުށަހަޅާ ފަރާތްތަކުގެ ފޯމު ސަބްމިޓުވިކަން ޔަގީން ކުރުމަށް ހައުސިން މިިނިސްޓްރީން އިލްތިމާސްކޮށްފި އެވެ.

މިދިޔަ ޖޫން މަހު ހުޅުވާލި މި ސަރުކާރުގެ ފުރަތަމަ ބޯހިޔާވަހި ކަމުގެ ސްކީމަށް ފޯމު ހުށަހެޅުމުގެ ފުރުސަތު މިމަހުގެ 15 ވަނަ ދުވަހު ހަމަވާނެ އެވެ. މި ސްކީމްގެ ދަށުން މާލޭ ރައްޔިތުންނަށް ގޯއްޗާއި މާލޭ މީހުން ހިމެނޭހެން މާލޭގައި 15 އަހަރު ދިރިއުޅެފައިވާ މީހުންނަށް ދެ ކޮޓަރިއާއި ތިން ކޮޓަރީގެ ފްލެޓަށް އެދެވެ އެވެ.

ހައުސިން މިނިސްޓްރީން މިއަދުު ކުރި އިއުލާނެއްގައި ބުނީ ފޯމު ހުށަހެޅުމުގެ ސުންގަޑި ހަމަވާއިރު ސަމާލުކަން ދޭންޖެހޭ ގިނަ ކަންކަން އެބަހުރި ކަމަށެވެ. އޭގެ ތެރެއިން މިހާރު މުހިންމު ބައެއްކަންކަން ފާހަގަވެފައިވާ ކަމަށް ބުނެފައި އެވެ.

އެގޮތުން ޖޮއިންޓް އެޕްލިކޭޝަން (އެކަކަށް ވުރެ ގިނަ މީހުންގެ ނަމުގައި ހުށަހަޅާފައިވާ އެޕްލިކޭޝަން)ގައި، ކޯ-އެޕްލިކަންޓުންގެ ގޮތުގައި ބައިވެރިވާ ބައެއް މީހުން ޕޯޓަލް މެދުވެރިކޮށް އިގުރާރު އެޕްރޫވްނުކޮށް އޮތުމުގެ ސަބަބުން ފޯމު ސަބްމިޓް ނުވެ ހުންނަކަން ވަރަށް ގިނައިން މިހާރު ފާހަގަކުރެވޭ ކަމަށެވެ.

އެކަކަށް ވުރެ ގިނަ މީހުންގެ ނަމުގައި ހުށަހަޅާ އެޕްލިކޭޝަން ސަބްމިޓް ވާނީ، އެ އެޕްލިކޭޝަނުގައި ބައިވެރިވާ ހުރިހާ މީހުން، އެ މީހެއްގެ އީފާސް މެދުވެރިކޮށް ގެދޮރުވެރިން ޕޯޓަލް އަށް ވަދެ، އެ ފޯމުގެ ބައިވެރިއެއްގެ ގޮތުގައި ހިމެނުމާ މެދު އެ މީހެއްގެ ރުހުން ދިނުމުން ކަމަށް މިނިސްޓްރީން ބުންޏެވެ.

އެފަދަ ފަރާތްތަކުން ޖެހޭނީ ގެދޮރުވެރިން ޕޯޓަލްއަށް ވަދެ "'ބައިވެރިވާ ފަރާތްތަކުގެ އިގުރާރު'ގައިވާ 'އާއެކޭ' ނުވަތަ 'ނޫނެކޭ'ގެ ތެރެއިން ބޭނުންވާ ގޮތެއް ހިޔާރުކާށެވެ.

މީގެ އިތުރުން ބައެއް ފަރާތްތަކުން ފޯމު ފުރަން ފެށުމަށް ފަހު ނުނިންމާ ހުރުމުގެ މައްސަލަތައްވެސް ފާހަގަކޮށްފައިވެ އެވެ. އެ ފަރާތްތަކަށް ހައުސިންގް މިނިސްޓްރީން މިހާރު ދަނީ އެސްއެމްއެސް މެދުވެރިކޮށް ފޯމު ފުރިހަމަކޮށް ސަބްމިޓް ކުރުމަށް އަންގަމުންނެވެ،

ބިންވެރިޔާ ސްކީމްގެ ދަށުން ހުޅުމާލެ އާއި ގުޅީފަޅުން ދޫކުރާ 3،000 ގޯތި އަދި ގެދޮރުވެރިޔާ ސްކީމްގެ ދަށުން ހުޅުމާލެއިން ދޫކުރާ 4،000 ފްލެޓު ދޫކުރާނެ އެވެ. ސަރުކާރުން ބުނީ ބިން ލިބޭ ފަރާތްތަކަށް އަންނަ އަހަރު ކުރީކޮޅު އަދި ފްލެޓު ލިބޭ ފަރާތްތަކަށް އަންނަ އަހަރުގެ މެދުތެރޭގައި ލިޔުން ހަވާލު ކުރެވޭނެ ކަމަށެވެ.