ޕީޕީއެމް އިން ފުލުހުންގެ ސާރޖެންޓް މުޙައްމަދު ޝިނާންގެ ހިތްވަރަށް އައްސަރިބަހާއި ސާބަސް ރައްދުކޮށްފިއެވެ.
އެ ޕާޓީން ނެރުނު ބަޔާނެއްގައި ބުނީ ޔޯގާ ހަރަކާތް ހުއްޓުވި މައްސަލައިގެ ތަޙްޤީޤުގައި ފުލުހުން ޢަމަލު ކުރަމުންދަނީ ވެރިންނަށް އަޅުވެތިވެ އެއްވެސް ހަމައެއް ލަމައެއްނެތި ކަމަށް ވިދާޅުވެ، ހިތްހަމަނުޖެހުން ފާޅުކޮށް ފުލުހުންގެ ވަޒީފާއަށް ނިކުމެވަޑައިނުގަންނަވަން ނިންމަވާފައިވާ ކަމަށެވެ.
އެކަމަށްޓަކައި ސާރޖެންޓް މުޙައްމަދު ޝިނާންގެ ހިތްވަރަށް ޕްރޮގްރެސިވް ކޮންގްރެސް ކޯލިޝަންގެ ފަރާތުން ސާބަހާއި ތަޢުރީފް ދަންނަވާ ކަމަށް ބުނެފައިވެއެވެ.
އެ ކޯލިޝަނުން ބުނީ "ސާރޖެންޓް ޝިނާންގެ ތިޔަ ނިންމެވުމަކީ މިސަރުކާރުގެ ނާއިންސާފާއި އަޅުވެތިކަމާއި ދެކޮޅަށް ނިންމެވި ވަރަށް މުހިއްމު ނިންމެވުމެއް ކަމުގައި" އެ ކޯލިޝަނުން ޤަބޫލު ކުރާ ކަމަށެވެ.
"ދިވެހި ޤައުމަށް ބޭނުންވަނީ ތިޔަފަދަ ހިތްވަރުގަދަ، ޤާބިލު، ޣައިރު ޤާނޫނީ ޢަމަލުތަކަށް ނޫނެކޭ ބުނަން ކެރޭ ފަހުލަވާނުންނެވެ. ހަމަ އެއާއެކު ތަންފީޒީ އިދާރާތަކުގައި ތިއްބެވި ބޭފުޅުންނަށްވެސް ސާޖެންޓް ޝިނާންގެ މި މަތިވެރި ނިންމެވުމުން މިސާލު ނަންގަވައި މި ސަރުކާރުގެ އަނިޔާވެރިކަމާއި ދެކޮޅަށް ތެދުވުމަށާއި ސަރުކާރުގެ އިސްވެރިން ކުރާ ޣައިރު ޤާނޫނީ އަމުރުތަކަށް ތަބާނުވުމަށް ގޮވާލަމެވެ." ޕްރޮގްރެސިވް ކޯލިޝަން ގެ ބަޔާނުގައި ބުނެފައިވެއެވެ.
މީގެ އިތުރުން މިވަގުތަކީ ޤައުމުގެ މިނިވަންކަން ދިފާޢުކޮށް އަޅުވެތިކަމުން ސަލާމަތް ކުރުމަށްޓަކައި ހުރިހާ އެންމެން އަތުގުޅާލައިގެން މަސައްކަތް ކުރަންވީ ވަގުތު ކަމުގައި ވެސް އެ ކޯލިޝަނުން ދެކޭ ކަމަށް ވަނީ ބުނެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް