އިރާގުގައި ހުރި އެމެރިކާގެ އެމްބަސީގެ ބައެއް މުވައްޒަފުންނަށް އެނބުރި ދިޔުމަށް އަންގައިފިއެވެ. އަދި މެދުއިރުމަތީގައި ތިބި އެމެރިކާގެ ސިފައިންގެ އާއިލާތަކަށް އެނބުރި ދިޔުމުގެ ފުރުސަތު ދީފައިވެއެވެ. މިކަން މިހެން ވެގެން ދިޔައީ އެމެރިކާ އާއި އިރާނާ ދެމެދު އޮތް ގުޅުން ގޯސްވަމުން ދިޔުމާ ގުޅިގެންނެވެ.
އެމެރިކާގެ އިސްވެރިން ބުނާ ގޮތުގައި އިރާނުގެ އެހީތެރިކަން ލިބިގެން އިރާގާއި އެހެނިހެން ގައުމުތަކުގައި ހަރަކާތްތެރިވާ ހަނގުރާމަވެރި ގްރޫޕްތަކުން އެމެރިކާގެ މަސްލަހަތުތަކަށް ގެއްލުން ދިނުމަށް ރާވަމުންދާކަމުގެ ހެކިތައް ފެންނަމުންދެއެވެ. އަދި އެމެރިކާގެ ސިފައިންނާއި ސްޓޭޓް ޑިޕާޓްމަންޓުން އެކުގައި މަސައްކަތް ކުރަމުންދަނީ އެއްވެސް ކަމެއް ދިމާވެއްޖެނަމަ ތައްޔާރަށް ތިބުމަށް ކަމަށެވެ.
އެމެރިކާ އާއި އިރާނާ ދެމެދު އައު ނިއުކްލިއަރ އެއްބަސްވުމަކާ ބެހޭގޮތުން ކުރެވެމުންދިޔަ މަޝްވަރާތައް ވަނީ މިހާރު ހުއްޓިފައެވެ. މި މަޝްވަރާތައް ނާކާމިޔާބު ވެއްޖެނަމަ އެމެރިކާގެ އަސްކަރީ މަރުކަޒުތަކަށް ހަމަލާދޭނެކަމަށް އިރާނުން އިންޒާރުދީފައިވެއެވެ. އެމެރިކާގެ އިސްވެރިން ބުނެފައިވަނީ ބޭނުންވެއްޖެ ހިނދެއްގައި ޢަމަލުކުރުމަށް ތައްޔާރަށް ތިބިކަމަށެވެ.
އިސްރާއީލުންވެސް ބުނެފައިވަނީ އިރާނުގެ ނިއުކްލިއަރ މަރުކަޒުތަކަށް ހަމަލާދޭން ޖެހިދާނެކަމަށެވެ. ނަމަވެސް ޓްރަމްޕް ބުނެފައިވަނީ އޭނާ އިސްކަންދެނީ ސުލްހަވެރި ހައްލަކަށް ކަމަށެވެ.
މާހިރުން ބުނާ ގޮތުގައި މި ކަންތައްތަކުގެ މާނައަކީ ކޮންމެހެން ހަނގުރާމައެއް ފެށޭނެކަމެއް ނޫނެވެ. ނަމަވެސް މިއީ އެމެރިކާއިން މިފަދަ ހަނގުރާމައަކަށް ތައްޔާރުވަމުންދާކަން ދައްކުވައިދޭ ހެއްކެކެވެ. އަދި މިއީ މަޝްވަރާތަކުގެ ތެރެއިން އިރާނަށް ޕްރެޝަރު ކުރަން ކުރާ ކަމެއްކަމަށްވެސް ވެދާނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް