އެންމެ ލަނޑެއްވެސް ނުޖެހި ސާފް ޗެމްޕިއަންޝިޕް ރާއްޖެއަށް ނިމިއްޖެ

ބަންގްލަދޭޝްގައި ކުރިޔަށްދާ ސާފްޗެމްޕިއަންޝިޕު މުބާރާތުން ރާއްޖެ ކަޓައިފި އެވެ.

މި މުބާރާތުގައި ރާއްޖެ ފުރަތަމަ ކުޅުނު މެޗުން ޕާކިސްތާނު އަތުން ބަލިވީ 3-0 ންނެވެ. ރާއްޖެއަށް މުބާރާތް ނިމުނީ މިއަދު އިންޑިއާ އާއި ދެކޮޅަށް ކުޅުނު މެޗުން 1-0 ން ބަލިވެގެންނެވެ.

ރާއްޖެއާ ދެކޮޅަށް އިންޑިއާއިން މެޗުގެ ކުރިހޯދީ 38 ވަނަ މިނެޓުގައި ލިބުނު ޕެނަލްޓީއަކުންނެވެ. މިއީ އިންޑިއާގެ ވިންގާ އަބްދުލް ރަބީހަށް ރާއްޖޭގެ ޑިފެންޑަރު ހުސައިން ސިފާއު ޔޫސުފް (ކުރޯ) އޭރިއާ ތެރެއިން ކުރި ފައުލަކަށް ލިބުނު ޕެނަލްޓީއެކެވެ.

މިފަހަރުގެ މުބާރާތުގައި ރާއްޖެ އޮތީ ވަރުގަދަ ޓީމުތައް ހިމެނޭ ގްރޫޕު ބީގައި އެވެ.

މިއީ ސާފްޗެމްޕިއަންޝިޕްގައި ރާއްޖެ ހޯދި އެންމެ ދަށް ނަތީޖާއެވެ. މީގެ ކުރިން މުބާރާތުން ކެޓި ނަމަވެސް ލަނޑެއް ނުޖެހި މުބާރާތް ނިންމާލާފައެއް ނުވެ އެވެ.