ދުމާއި ދުންފަތުން ފުއްޕާމޭ ރައްކާތެރިކުރުމަށް ސަމާލުވާންވީ ފަސް ކަމެއް!

ސިނގިރެޓް ނުބޯ މީހުންނަށް ވެސް އެހެން މީހުންގެ ދުންފަތުގެ ދުމާއި ވައި ނުސާފުވުމުގެ ސަބަބުން ފުއްޕާމެއަށް ގެއްލުންވާ ކަމަށް ޞިއްޙީ ތަޖުރިބާކާރުން ބުނެފިއެވެ.

ދުންފަތާ ދުރުގައި ހުރުމަކީ ފުއްޕާމޭގެ ދުޅަހެޔޮކަމަށް އެޅޭ ވަރަށް މުހިންމު ފިޔަވަޅެކެވެ. އެހެންނަމަވެސް ސިނގިރެޓް ދުވަހަކު ވެސް ނުބޯ މީހުންނަށް ވެސް ކޮންމެ ދުވަހަކު ނޭވާލާ ވައިގެ ތެރޭގައި ހިމެނޭ ގެއްލުންދެނިވި މާއްދާތައް ހަށިގަނޑަށް ވާސިލުވެއެވެ.

އެހެން މީހުން ބޯ ސިނގިރެޓާއި ޝީޝާގެ ދުމާއި، ބޭރުތެރޭގެ ވައި ތަޣައްޔަރުވުމާއި، ގޭތެރޭގެ ވައި ނުސާފުކުރާ ތަކެއްޗާ ހެދި ފުއްޕާމެއަށް ނުރައްކާ ކުރިމަތިވެއެވެ. ދިގު މުއްދަތަކަށް މި ފަދަ މާހައުލެއްގައި ނޭވާލާ ނަމަ ނޭވާލުމުގެ ނިޒާމަށް ގެއްލުން ލިބި، ނޭވާ ހިއްލުމާއި ހިތާއި ފުއްޕާމޭގެ ބަލިތައް ޖެހުމުގެ ފުރުޞަތު ބޮޑުވެއެވެ.

އިންޑިއާގެ ޔަތާރްތު ސުޕާ ސްޕެޝަލިޓީ ހޮސްޕިޓަލުގެ ފުއްޕާމޭގެ ބަލިތަކާ ބެހޭ ޑައިރެކްޓަރު ޑރ. ވިޖޮ ކުމާރު އަގްރަވާލް ވިދާޅުވާ ގޮތުގައި، ފުއްޕާމޭ ރައްކާތެރިކުރެވޭނީ ހަމައެކަނި ދުންފަތް ބޭނުން ނުކޮށް ހުރެގެނެއް ނޫނެވެ. އެކަމަށް ޓަކައި ކޮންމެ ދުވަހަކު ފަސް ކަމަކަށް ސަމާލުވާން ޖެހެއެވެ.

ފުރަތަމަ ކަމަކީ، ކައިރީގައި ތިބި މީހުންގެ ދުންފަތުގެ ދުމަށް ހުށަހެޅުމުން ރައްކާތެރިވުމެވެ. ސިނގިރެޓް، ޝީޝާ ނުވަތަ ދުންފަތުގެ އެހެން ބާވަތެއް ބޭނުންކުރާ މީހެއް ކައިރީ އިނުމަކީ ނުރައްކާތެރި މާއްދާތަކަށް ހުށަހެޅުމެކެވެ. މި ނުރައްކާ އޮންނަނީ ހަމައެކަނި ތޮއްޖެހިފައިވާ ޢާންމު ތަންތަނަކު ނޫނެވެ. ގެ، އޮފީސް، އުޅަނދު ފަދަ ބަންދު ތަންތަނުގައި ދުން ގިނައިރު ވަންދެން ހަރުލައެވެ.

ދެވަނަ ކަމަކީ، ދޮރު ހުޅުވައި ނުވަތަ ފަންކާ ޖެއްސުމުން ދުންފަތުގެ ދުން އެއްކޮށް ފިލައިގެން ނުދާކަން ދެނެގަތުމެވެ. ވައި ދައުރުކުރުމަކީ ޙައްލެއް ނޫނެވެ. ބައެއް ފަރާތްތައް ދޮރު ހުޅުވާލީމާ ދުން ނެތި ދާނެ ކަމަށް ހީކުރި ނަމަވެސް، ދުންފަތް އެންދުމުން ނުކުންނަ ގެއްލުންދެނިވި ކުދި ޒައްރާތައް ވައިގެ ތެރެއިން އެއްކޮށެއް ނައްތައެއް ނުލެވެއެވެ. އެހެންކަމުން، ދުންފަތް ބޭނުންކުރާ މީހުން ތިބި ކޮޓަރިތަކުގައި ނީނުމާއި ގެއާއި ވެހިކަލާއި އޮފީސް ދުމާ ނުލައި ބެހެއްޓުން މުހިންމެވެ.

ތިންވަނަ ކަމަކީ، ބޭރުގައި ކަސްރަތު ކުރުމުގެ ކުރިން ވައިގެ ފެންވަރު ބެލުމެވެ. ވައި ވަރަށް ބޮޑަށް ނުސާފުވެފައިވާ ދުވަހެއްގައި ބޭރުގައި ދުވެ، ޖޮގް ކޮށް ނުވަތަ ބުރަ ކަސްރަތެއް ކޮށްފި ނަމަ ނުރައްކާތެރި ޒައްރާތައް ހަށިގަނޑަށް ވައްދާ މިންވަރު އިތުރުވެއެވެ. އެއާ ކޮލިޓީ އިންޑެކްސް (އޭކިއުއައި) ބެލުމަށް ފަހު، ނުސާފު ދުވަސްތަކުގައި ގޭތެރޭގައި ކަސްރަތު ކުރެވިދާނެއެވެ.

ހަތަރުވަނަ ކަމަކީ، ބޭރަށް ނިކުންނައިރު ރަނގަޅަށް ހެޔޮވަރުކޮށް އެން95 މާސްކެއް އެޅުމެވެ. ވައި ނުސާފުވެފައިވާ ދުވަހެއްގައި ބޭރަށް ދާން ޖެހިއްޖެ ނަމަ މާސްކު ވެގެން ދާނީ ރައްކާތެރިކަމުގެ ފިޔަވަޅަކަށެވެ. އެހެން ނަމަވެސް، މާސްކަކީ ވައިގެ ތަޣައްޔަރުކަމުން ފުރިހަމައަށް ހިމާޔަތްކޮށްދޭ އެއްޗެއް ނޫން ކަމަށާއި، ވައި ވަރަށް ބޮޑަށް ނުސާފުވެފައިވާ ވަގުތުތަކުގައި ބޭރުގައި ހޭދަކުރާ ވަގުތު މަދުކުރުން ވެސް ލާޒިމު ކަމަށް ޑރ. އަގްރަވާލް ފާހަގަކުރައްވައެވެ.

ފަސްވަނަ ކަމަކީ، ގޭތެރޭގެ ވައި ނުސާފުކުރާ ތަކެއްޗަށް ސަމާލުވުމެވެ. ގޭތެރޭގައި ދުން އަރާ ބާވަތްތައް އެންދުމުން ވައިގެ ފެންވަރަށް އަސަރުކުރެއެވެ. ގޭތެރެ ރަނގަޅަށް ވައި ދައުރުވާ ގޮތަށް ބެހެއްޓުމާއި، ގިނައިން ފެން ބުއިމާއި، ތަރުކާރީއާއި މޭވާ ހިމެނޭ ދުޅަހެޔޮ ކާނާ ކެއުމަކީ ޢާންމު ޞިއްޙަތަށް ފައިދާ ހުރި ކަންކަމެވެ. އެހެންނަމަވެސް ދުމާއި ވައި ތަޣައްޔަރުވުމަށް ދާއިމީ ގޮތެއްގައި ހުށަހެޅިފައި ހުރުމުގެ ގެއްލުން އެ އާދަތަކުން މުޅިން ފޫ ނުބެއްދޭނެ ކަމަށް ޑރ. އަގްރަވާލް ވިދާޅުވެއެވެ.

ދުންފަތް ބޭނުން ނުކުރާ މީހުންނަށް ވެސް ފުއްޕާމޭ ހިމާޔަތް ކުރުމަކީ ކޮންމެ ދުވަހެއްގެ ޒިންމާއެކެވެ. ހަމައެކަނި ސިނގިރެޓާ ދުރުގައި ހުރުމުގެ ބަދަލުގައި، ދުމާއި ނުސާފު ވައި ހިމެނޭ މާހައުލުތަކުން ވީހާ ވެސް ބޮޑަށް ދުރުހެލިވުމަކީ ފެންވަރު ރަނގަޅު ނޭވާއެއް ޔަގީން ކުރުމަށް ކޮންމެ ފަރުދެއް ވެސް ކުރަން ޖެހޭ ކަމެކެވެ.