އިސްރާއީލުގެ މާލިއްޔާ ވަޒީރު ބެޒަލެލް ސްމޮޓްރިޗް އިސްރާއީލުގެ ބޭންކުތަކަށް ފަލަސްތީނުގެ މާލީ މުއައްސަސާތަކާއެކު މުޢާމަލާތު ކުރުމަށް ދީފައިވާ މުހިންމު އިސްތިސްނާއެއް ބާޠިލުކޮށްފިއެވެ. މިކަމުގެ ސަބަބުން ފަލަސްތީނު ސަރަޙައްދުތަކުގައި މާލީ ހަލަބޮލިކަމެއް ކުރިމަތިވެދާނެކަމުގެ ބިރު މިހާރު ވަނީ އުފެދިފައިވެއެވެ.
އިސްރާއީލުގެ މާލިއްޔާ މިނިސްޓްރީން ބުނެފައިވަނީ، ފަލަސްތީނު އޮތޯރިޓީން އިސްރާއީލާ ދެކޮޅަށް ކުރިއަށްގެންދާ "ޝަރުޢީ ހައިސިއްޔަތު ނަފީކުރުމުގެ ކެމްޕޭން" ގެ ސަބަބުން، ފަލަސްތީނުގެ ބޭންކުތަކާއެކު މަސައްކަތްކުރުމުގައި އިސްރާއީލުގެ ބޭންކުތަކަށް ލިބިދީފައިވާ ޤާނޫނީ ޒިންމާތަކުން ރައްކާތެރިކަން ދޭ އިންޑެމްނިޓީ ބާޠިލުކޮށްފައިވާ ކަމަށެވެ.
މި ފިޔަވަޅުގެ ސަބަބުން މުހިންމު މާލީ ގުޅުންތަކެއް ކެނޑިގެން ހިނގައިދާނެކަމުގެ ބިރު އެބައޮތެވެ. ފަލަސްތީނުގެ ބޭންކިންގ ނިޒާމު ބޮޑަށް ބަރޯސާވަނީ މި އިސްތިސްނާގެ މައްޗަށެވެ. އެއީ ބޯޑަރު ހުރަސްކޮށް ކުރެވޭ މުޢާމަލާތުތައް ކުރުމަށާއި، ވެސްޓް ބޭންކުގައި މައިގަނޑު ގޮތެއްގައި ބޭނުންކުރެވޭ ފައިސާކަމުގައިވާ އިސްރާއީލުގެ ޝެކެލްއަށް ހޯދުމަށްޓަކައެވެ.
2024 ވަނަ އަހަރު ގިނަ ޔޫރަޕުގެ ޤައުމުތަކުން ފަލަސްތީނަކީ ދައުލަތެއްގެ ގޮތުގައި ބަލައިގަތުމާއި ގުޅިގެން، ސްމޮޓްރިޗް ވަނީ މި ފިޔަވަޅު އަޅާނެކަމުގެ އިންޒާރު ދީފައެވެ.
2024 ވަނަ އަހަރުގެ ޖުލައި މަހު، ޖީ7 ޤައުމުތަކުން ވަނީ އިސްރާއީލަށް މިފަދަ ފިޔަވަޅެއް ނޭޅުމަށް ގޮވާލާފައެވެ. އެފަދަ ފިޔަވަޅެއް އެޅުމުން ފަލަސްތީނުގެ އިޤްތިޞާދު ހަލަބޮލިވެދާނެކަމަށް އިންޒާރުދީފައެވެ. އެމެރިކާގެ ޓްރެޜަރީ ސެކްރެޓަރީ ޖެނެޓް ޔެލެން ވެސް ވަނީ މި މާލީ ގުޅުންތައް ކަނޑާލުމުން "އިންސާނީ ހަލަބޮލިކަމަކަށް" މަގުފަހިވެދާނެކަމަށް އިންޒާރުދީފައެވެ.
މިހާރު، ފަލަސްތީނުގެ ބޭންކުތަކަށް މާލީގޮތުން އެކަހެރިވުމުގެ ނުރައްކާ ވަނީ ކުރިމަތިވެފައިވެއެވެ. އަދި މުސާރަ ދިނުމާއި، ފައިސާ ފޮނުވުމާއި، ވިޔަފާރީގެ މުޢާމަލާތުތަކާ ގުޅޭގޮތުން ޔަޤީންކަން ނެތް ހާލަތެއް ވަނީ އުފެދިފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް