ގައްދޫ ބަނދަރު ތަަރައްގީ ކުރުމުގެ މަޝްރޫއު ފަށަން ސައިޓް މޮބިލައިޒްކޮށްފި

ގދ. ގައްދޫ ބަނދަރު ތަރައްޤީ ކުރުމުގެ މަޝްރޫޢުގެ އަމަލީ މަސައްކަތް ފެށުމަށް ތައްޔާރުވެއްޖެ އެވެ.

އެމްޓީސީސީން ބުނީ މަޝްރޫއު ފެށުމަށް މިހާރު ސައިޓް މޮބިލައިޒްކޮށްފައިވާ ކަމަށެވެ. އެ މަސައްކަތް ކުރީ މިދިޔަ ހޮނިހިރު ދުވަހު އެވެ.

މި މަޝްރޫޢުގެ ދަށުން ގައްދޫގެ 23,017 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމަށް ހަމަޖެހިފައިވެ އެވެ. އަދި 320 މީޓަރުގެ ސަރަޙައްދެއްގައި އެއްގަމުތޮށި ލާނެ އެވެ.

މީގެ އިތުރުން 35 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 320 މީޓަރުގެ ސްކައުރިންގ އޭޕްރަންއެއް ހެދުމާއި، 1,600 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުމާއި، 232 މީޓަރުގެ ސަރަޙައްދެއްގައި ބޭރުތޮށި ލުމަށް ހަމަޖެހިފައިވާ ކަމަށް އެމްޓީސީސީން ބުނެ އެވެ. މި މަޝްރޫއ އެއްކޮށް ނިމޭއިރު 26 މީޓަރު ދިގުމިނުގެ 2 މީޓަރު ފުޅާމިނުގެ ބްރިޖެއް ހެދުމާއި، މަގުބައްތި ހަރުކުރުމާއި ނެރުބައްތި ހަރުކުރުމުގެ މަސައްކަތް ހިމެނެ އެވެ.

މި މަޝްރޫޢަކީ 38.4 މިލިއަން ރުފިޔާގެ މަޝްރޫއެ ކެވެ.